¹ Po u Fesitasi akingila muchighaba chila, sona mwo pakinda amashiku ghatatu, akabuka ukufuma ku Kesaliya mupaka ku Yelusalemu. ² Abaputi abosongosongo na bayuda abakumanyikwa bakisa ninongwa kwa Paulo, sona bakamubusha u Fesitasi mubwanaloli ³ bakamubusha ukuti abafwe kulufafu ifya kwa Paulo ukuti baye bamubike ku Yelusalemu, chifukwa bakitendekeshangaukuti bamughoghe musila ⁴ U Fesitasi akamula uktui u Paulo akapinyiwa ku Kesaliya, sona yuyo akabuka ukulakula mwo pendashe panandi. ⁵ Po akayugha akati, ''babo bangakwasnisha babuke pamupene nutwe. Pala palipo chimo chicho anangite, tumupe inongwa.'' ⁶ U Fesitasi akikala amashiku kupululila pa eyiti na teni po akisa aya ku Kesaliya, sona pishiku lyabubili akikala pa chitengo ichakulongela inongwa nukulamula ukuti baye nu Paulo kukwake. ⁷ Bwo afika, abayuda abamu Yelusalemu bakimilila papipi palapala bakisa nififukwa ifyakumupikila inongwa lole fitakaba nubumboni. ⁸ U Paulo akipoka mwene akati, ''Ndapangite nachimo ichibibi ichakususania nu lulaghilo ulwa Bayuda pamu ulwakususania nitemhpeli pamu nukususania nu Kayisala.'' ⁹ Lole u Fesitasi akalongagha ukuti abayuda bamughane, po akamwamula u Paulo akati, ''ukulonda ukuti uye ku Yelusalemu pakulongiwa nune pa findu ifi?'' ¹⁰ U Paulo akati, ''Ngwikala mamaso pa chitengo cha bulongi icha Kayisala, po ngwenela ukulongiwa. Ndamunangile nayumo umuyuda, isa mumwo mukumanyila akisashe. ¹¹ Pala napanga chimo sona pala napanga chicho chikwenelela ubufwe, ndakukana pakufwa. Lole pala ubwanaloli nabumo pafifyo bakususha, atalipo nayumo yuyo angambika ku babo. Nguyisamya inongwa ukuya kwa Kayisala.'' ¹² Mwo u Fesitasi ayugha nabosongosongo, akamula, ''Waya ninongwa kwa kayisala. Kwa Kayisala ko tubuke!'' ¹³ Mwo pakinda amashiku ghamu, umwene u Agilipa nu Benesi bakafika ku Kesaliya, bakendela ifya mbombo pakuya kwa Fesitasi. ¹⁴ Bo bikala kulakula amashiku amingi, u Fesitasi akayibika inongwa iya Paulo kwa mwene akati, ''U mundu yumo bakamuleka kunyuma nu Felikisi ngati mupinyiwa. ¹⁵ Mwo ndi Muyelusalemu, abaputi abosongosongo pamupene nabosongo babayuda bakisa ninongwa iya mundu uyu kukwangu, sona bakasumaukuti bamughoghe. ¹⁶ Ngabamula ngati ta nyiho isha ba Roma ukumupa yumo inongwa mwo akali atalonganite nababo bamupile inongwa sona atapokelite ulusako ukuti ipoke mwene kunongwa. ¹⁷ Po mwo bikala pamupene kuno, ndakalindilila, lole ishiku lyabubili ngikala pachitengo cha kulongela inongwa sona ngamulamula umundu yula ukuti bamwingishe. ¹⁸ Mwo bobakumupa inongwa bimilila, nayimo inogwa yiyo bakamupa yiyo yikaba yanaloli. Mubuyo bwake bakasusania nawe ifya kuyana nakiputile ¹⁹ nifya u Yesu yuyo akafwa, yuyo u Paulo akuti ali kubwumi. ²⁰ Ndakaba nubwanaloli ukuti ka ningabushikisha bule akapango aka, po ngamubushikisha pala ingabushikisha ukuti abuke mu Yelusalemu ukuti iye bamulonge kulakula pa fifyo bakamususha. ²¹ Lole mwo u Paulo asuma ukuti asungiwe tashi mu jele mwo akulindilila ifundo iya mwene, ngalamula ukuti asungiwe mu jele mupaka po ngwisa pakumutuma kwa kayisala.'' ²² U Agilipa akti kwa Fesitasi, ''nune ngalonda imbulikishe ku mundu uyu.'' ''Ningelo,'' U Fesitasi akati, ''Tumupulike.'' ²³ Ilyaningelo lyake, u Agilipa nu Benesi bakisa muchinyumba nabasilikali abiosongo nabandu abakumanyikwa mu kaya. Mwo u Fesitasi alamula, bakisa nu Paulo kukwabo. ²⁴ U Fesitasi akati, ''Mwene Agilipa, namwebandu mweshi mwe muli pano nutwe, mukumutesha umundu uyu; ichilundilo choshi icha bayuda chikatingi ne mubibi mu Yelusalemu nakunoshe, sona bakambwatilagha ukuti manye abe kubwumi sona. ²⁵ Ngisa namanya ukuti atakabomba nachimo chicho chikamwenelesha ukuti afwe; lole chifukwa chakuti akasamikisha inonga kwa mwene, nginong'ona ukuti imutume kulakula. ²⁶ Lole ndanafyo nafimo nafimo ifyenecho fifyo ningalemba kwa Malafyale wangu. Pachifukwa ichi nisa nawe kukwinyu, nganingani kukwako mwene Agilipa, ukuti imbe nafyo ifyingi ifyakulemba ukuyana ninongwa iyi. ²⁷ Pakuti chikuboneka chakushita mahala kukwangu ukuti imutume umupinyiba po sona kushita ukulemba inongwa yiyo bakumupa.''