¹ ''Balumyana nabotata, pulikisha kubutuli bwo nguya pakubapa umwe lululu.'' ² Bwo ichilundilo chapulika u Paulo akuyugha kukwabo munjugha ya chihebeli bakaba myee. Po akati, ³ ''Ne muyuda, mbapiwe mu Talisasi uwa ku Sisiliya, lole manyile mukaya kakaka pafilundi fya Gamaliyeli. Ngamanyishiwa musila ingafu isha mundaghilo sha botata bitu. Nipile kwa Chala, isa mumwo numwe mubelile umusughu. ⁴ Ngafwimiwa musila yiyiyi mupaka kubufwe, ukupinyiwa nukubuka nabo ku jele boshi abalisha na bakolo, ⁵ isa mumwo boshi abalongoshi bapamwanya nabosongosongo bangashimikisha. Ngapokela abokalata ukufuma kukwabo abakufuma kubowamwitu aba mu DSamasika, po ngubuka kula ukuti inje mbeghe nise nabo mu yelusalemu bwo ba[injiwe ukuti bise balangiwe. ⁶ Shikabombiwa mwo ngwenda ukubuka kupipinaku Damasika, pakati pa musi umwakunyomosha ubwelu ubukulu bukabala ukushungulila une. ⁷ Ngawa pase nukupulika ilishu likuti kukwangu, 'Sabuli, Sabuli, choni chicho ukufwima une?' ⁸ Ngamula, 'Wewini, Malafyale?' Akati kukwake, 'Ne Yesu wa ku Nazaleti, yuyo uwe kumufwima.' ⁹ Boshi bo bvakaba nune bakaketa ubwelu, lole batakapulika ishu lya yuyo akayughagha nune. ¹⁰ Ngati, 'Mbombe choni, Malafyale?' Umalafyale akati kukwangu, 'Nyamuka buka ku Damasika kulakula koko kuya pakubushiwa fyoshi fifyo fibatikiwe ukuti uwe ubomnbe.' ¹¹ Ndakaketagha papo ubwelu bukabala ngani, pakulongoshiwa ninyobe sha babo ngaba nabo, ngafika mu Damasika. ¹² Mula mwo ngakumana nu mundu yuyo akitishiwa ukuti Ananiya, uwakwiyipa ukuyana ni ndaghilo sona akayughiwa nabayuda babo bakikalagha mulamula. ¹³ Akisa kukwangu, akima papipi nune, akayugha akati, 'Wamwitu Sabuli, keta sona.' Mukabalilo kalakala ngamuketa. ¹⁴ Po umwene akati, 'U Chala wabotata akusalite uwe ukuti umanye ubwighane bwake, ukuti ukabakete abagholofu, nukupulika ishu ukufuma mumulomo wake. ¹⁵ Pakuti tiukabe we kamboni wake ku bandu boshi ukuyana nafifyo wafiketa nukufipulika. ¹⁶ Ngimba ukulindila ichoni? Nyamuka, oshiwa, nukusuka imbibi shako, pakwitisha ingamu yake.' ¹⁷ Bwo nanyokela ukuya ku Yelusalemu, sona bwo ngwiputa mutempheli, shikabombiwa ukuti nambilile ichisetuka. ¹⁸ Ngamubona akuyugha kukwangu, 'Endelela sona fumamwo mu Yelusalemu nakalinga, papo tebakupulike ubushimikishi bwako ubwa une.' ¹⁹ Ngayugha ngati, 'Malafyale, bope abenecho bakumanya ukuti ngabapinya nukubakoma bala bo bakasubilagha mumwako muma Sinagogi ghoshi. ²⁰ Bwo ibanda lya Sitefani ukamboni wako lyakupuka, nune ngimilila nukwitikisha, sona ngusungililagha ifwalo shabo babo bakamughogha.' ²¹ Lole akayugha kukwangu, 'Buka, papo tingutume kubutali ngani kuba kuse.''' ²² Bakamupulikisha mupaka pabumalilo. Po bakakwesha amashu bakati, ''Mutishemo uyu mu chisu, papo atabaghile ukuti abe kubwumi.'' ²³ Po bwo bakolela, nukutaya imyenda yabo, nukuponia imifumbi mumwanya, ²⁴ u kapitagho usongo akalamula u Paulo ukuti bise nawe kubuyo bwakwikalako abasilikali. Akalaghila ukuti abaghile alalushiwe nukukomiwa ukuti umwenecho mwene amanye choni chicho bakamupomelagha isa bulabula. ²⁵ Bwo bamupinya ningoye, u Paulo akayugha ku mulongoshi yuyo akimilila palufafu, ''Ngimba chakubaghila ukuti umwe mumutamyange umundu yuyo mu Roma sona yuyo atabikiwe lumo pabulongi?'' ²⁶ Bwo umulongoshi apulika ishi, umwene akabuka ku mulongoshi usongo nukumubula, ukuti, ''Tiubombeki? Papo umundu uyu mwenekaya wa Roma.'' ²⁷ Umulongoshi usongo akisa nukuyugha kukwake nukuti, ''Mbushe une, we mwenekaya waku Roma?'' U Paulo akati, ''Inga.'' ²⁸ Umulongoshi usongo akamula, ''ngalipila indalama inyingi ukuti imbe ne mwenekaya.'' Lole u Paulo akati, ''une ngapapiwa mwomukaya ka Roma.'' ²⁹ Po abandu babo bakayanga pakumushikisha bakamuleka nakalinga. Umulongoshi usongo wepe akapasha, bwo apulika ukuti u Paulo akawa mwenekaya wa ku Roma, papo akamupinya. ³⁰ Mwishiku ilingi, umulongoshi usongo akalondagha ukuti amanye ubwanaloli akuyana nubulongi bubwo abayuda bakaba nabo kwa Paulo. Akamusatula ingoye nukulaghila abalongoshi abosongo nichilundilo ukuti bakomane. Po akisa nu Paulo nukumwikasha pakati papabo.