¹ U Paulo akabaketelesha abosongosongo akati, ''Bobamwitu, nikala na malwilwi amisa pamaso gha Chala mupaka ishiku ili.'' ² U muputi usongo u Ananiya akalamula boshi babon bakimilila palapala ukuti bamuchapule pamulomo. ³ Po u Paulo akati, ''U Chala takabakome, umwe mwe mushunguliwe nichibumba icha penthi umwelu. Mukali mukundonga nu lulaghilo, lole mukulamula ukuti ingomwe, umwakususania nululaghilo?'' ⁴ Boshi babo bakimilila palapala bakati, ''Ka momo ukumutukila umuputi usongo uwa Chala?'' ⁵ U Paulo akati, ''Ndakamanya , bobamwitu, ukuti akaba wisongo wabaputi. Pakuti shisimbiwe, manye uyughaghe ifibibi ifyamulongoshi wabandu bako.'' ⁶ Mwo u Paulo ashaghania ukuti ichighaba chimuchene chabosongosongo bakababa kusaduki chimu chikaba chaba bafalisayi, akayugha mwakukwesha mubosongosongo, ''Bowamwitu, nemufalisayi, umwana wabafalisayi. Chifukwa chakuti ndinulusubilo lwakushuka kubufwe ndipakulongiwa.'' ⁷ Mwo ayugha ifi, ukususania kukanda pakati pabafalisayi na basaduki, sona ichilundilo chikaghabingana. ⁸ Pakuti abasaduki bakutyi ukushuka kubufwe kutaliko, abangelo bataliko, sona imizimu yitaliko, loli abafalisayi bakwitika fyoshi ifi ukuti filiko. ⁹ Po ichiwawa ichikulu chikanda, abasimbi bamo babo bakaba muchighaba cha bafalisayi bakimilila nukususha, bakati, ''tutakumwagha nawe nachimo ichibibi umundu uyu. shingaba bule linga umbepo pamu umungelo ayughitekukwake?'' ¹⁰ Mo palapala panyamuka ukususania ukukulu umulongoshi umukulu akoghopa ukuti u Paulo tibamunyapulanie mutughaba, po akalamula abasilikali ukuti bike pasi nukumwegha pamaka ukufuma pakati pabosongosongo nukwisa nawe. ¹¹ ubushiku bulabula u Malafyale akimilila papipi nawe akati, ''utakoghopaghe, isa momwo ukashimishikisha ifya une mu Yelusalemu, po ushimikishe sona mu Roma ¹² Mwo kwacha, abayuda bamu bakayughisania kubutitu bakayugha bakati tabalyange pamu ukung'wa chimo mupaka bamughoghe u Paulo. ¹³ Abandu babo bakapangana kubutitu bakapululila pa fote. ¹⁴ Bakabuka kubaputi abosongo na bosongo bakati, ''twalumbila pabukulu ukuti manye tulya nachimo mupaka tumughoghe u Paulo. ¹⁵ Po panupanu, abosongosongo basume u mulongoshi usongo ukuti ise nawe kukwinyu, isa mumwo mungatumulila inongwa yake akisa ngani. ku utwe, twitendekeshishe ukumughogha mwo akali atisite pano.'' ¹⁶ Lole umwana wa muyemba wa Paulo akapulika ukuti wakughona nukulindilila, po akabuka nukuya ku buyo bwa basilikali nukumubusha u Paulo. ¹⁷ U Paulo akamwitisha yuyo umusilikali usongo akati, ''mweghe umulumyana uyu kwa mulongoshi usongo, pakuti ali nasho shimo ishakuti akubushe. ¹⁸ Po umusilikali usongo yula akamwegha umulumyana yula nukubuka nawe kwa mulongoshi usongo akati, ''U Paulo umupinyiwa anyitishishe kukwake, nukumbusha ukuti nise numumyana uyukukwako. Ali nifyakuyugha fimo kukwako. ¹⁹ U mulongoshi usongo akamukola pakakono nukubuka nawe kubuyo bwabushefu nukumubushikisha, ''Choni chicho ukulonda umbushe une?'' ²⁰ Umulumyana akati, ''abayuda bapulikana ukuti bakubushe uwe ukuti wise nu Paulo ningelo ku bosongo, ngati bakabuka pakumubusha akisa ifya nongwa yake. ²¹ Lole manye wibike kukwabo, chifukwa pali abandu fote babo bali pakumulindilila . Walumbile pabene, ukuti manye balye pamu ukung'wa mupaka bamughoghe. Napakabaliloshe aka bitendekeshishe, nukulindilila ukuti ubitikishe.'' ²² Po umulongoshi usongo akamwitikisha umulumyana yula ukuti abukaghe, mwo amulingania, ''manye umubusha yumo ukuti wisa wambusha ifindu ifi.'' ²³ Po akabitisha babili mu basilikali abosongo akati, ''Egha abasilikali 200 witendekeshe pakubuka kubutali ku Kesaliya, nabandu bambunda sevenite, nabangwebo 200. Tise munyamuke pa kabalilo ka nayini okoloko pabushiku.'' ²⁴ Akabalamula sona ukuti bapeleke ifinyamana fifyo u Paulo angakwanisha pakwendesha, nukumunyamula akisa mupaka kwa Felikisi umulongoshi pamu umulaghili. ²⁵ Po akalemba ukalata isa ulu: ²⁶ Kulodiyasi Layisasi kwa mughindikiwa ngani mulongoshi Felikisi, ngulamuka. ²⁷ Umundu uyu akapinyiwa na bayuda sona bakaba papipi ukuti bamughoghe ngabuka nabasilikali kukwabo ukuti imupoke, pakuti ngamanya ukuti akaba mundu wa ku Roma. ²⁸ Ngalonda imanye ichifukwa chicho bakamupila inongwa, po ngabuka nawe kubosongo. ²⁹ Ngisa namanya ukuti bakamulongagha ifya mabushikisho aghakuyana nindaghilo shabo. Lole patakaba nachimo chicho bakamulonga chicho chikamwenelesha ukuti afwe pamu bamupinye. ³⁰ Po bakisa bambusha ukuti bakapangana ukuti bamughoghe, papo napapo ngamutuma kukwako nukubalingania babo bakamupa inongwa ukuti wise nififukwa fyabo pamaso pako. Mushale.'' ³¹ Po abasilikali bakapulikila fifyo bakalamula. Bakamwegha u Paulo nukubuka nawe pabushiku kwa Anthipatilisi. ³² Pishiku lyabubili, abasilikali abingi bakabaleka abingi babo bakendeshanga imbunda ukuti babuke nawe sona abene bakanyokela ku buyo bwa basilikali. ³³ Mwo bobakendesha imbunda bafika ku Kesaliya nukubika ukalata kwa mulongoshi u Felikisi, bakamubika nu Paulo kukwake. ³⁴ Mwo umulongoshi awelenga ukalata, akababushikisha kuko u Paulo akafumilagha. Mwo ashimanya ukuti akafumagha ku Silisiya, ³⁵ akati, ''Tise ngupulike pala babo bakukulonga bisa panu.'' Po akalamula ukuti asungiwe pakatikati muchisu cha Helodi.