¹ U Paulo akisa sona ku Delibe na ku Layisitila, keta umufundiwa yumo ilyita lyake Timoti akawa kulakula, umwana wa mayi wa chiyuda yuyo akawa wakusuwila lole uwise akawa mu Giliki. ² Abowamwabo wawo wakaba ku Layisitila naku Ayikoniyamu bakayugha ifyisa ifyake. ³ U Paulo akalondagha ukuti abuke nawe, po akamwegha nukumutumula papo abayuda bakabako kubuyo bulabula, sona boshi bakamanya ukuti utata wake akaba mu Giliki. ⁴ Mwo bakubuka bakwenda mutwaya, bakendelagha indaghilo shisho shikapinyiwa nabatumiwa pamupene nabosongosongo babo bakaba mu Jelusalemu ukuti bashikongaghe. ⁵ Po amachalichi ghakakachiwanga mu lwitiko sona inambala yikabalagha ishiku lyoshi. ⁶ U Paulo na banine bakenda mu fighaba fya Pulagiya na Galatiya, papo bakakanishiwa nu mbepo mwikemo ukuti bafumushe amashu mu chighawa cha Asiya. ⁷ Mwo bapalamila ukufika ku Masiya, bakalonda baye ku Bisaniya, lole umbepo wa Yesu akabakanisha. ⁸ Mwo bakupululila ku Masiya, bakaya bilomoka muchigha cha Tilosi. ⁹ Ichisetuka chikamobonekela u Paulo pabushiku: U mundu wa ku Masedoniya akimilila palapala, akasumagha kukwke akatingi, ''Wise ku Masedoniya wise utwafweko.'' ¹⁰ Mwo u Paulo atesha ichisetuka, paponapapo tukinong'ona ukuti tuyye ku Masedoniya, nifundo yakuti u Chala akatwitisha ukuti tuye tubalumbilile amashu. ¹¹ Tukati twenda mubwato ukufuma ku Tilosi, tukenda tukaya ku Samotilase, po ningelo lyake tukenda tukaya ku chighawa cha Nepolisi. ¹² Ukufuma kula tukaya ku Filipi, chicho chikaba chighaba cha Masedoniya, ichighaba chicho chikaba chakulondiwa ngani mukaya kalakala na baloma babo bakachilaghilagha, po tukikala muchighaba chilachila amashiku amingi ngani. ¹³ Pishiku lya pa sabata tukabuka kuse ku lupaso kuko tukinong'onagha ukuti kungaba amalo aghakwiputila. Tukikala pase nukubayughisha abakolo babo bakisa pamupene. ¹⁴ Umukolo yumo ingamu yake Lidiya, yuyo akaghulishanga imyenda ya pepo ukufuma ku chighaba cha Tiyatila, yuyo akamwiputagha u Chala, akatuteghelesha. U Malafyale akighula indumbula yake ukuti apulikishange fifyo u Paulo akayughagha. ¹⁵ Mwo oshiwa, akatusuma akati, ''Pala mwandesha ukuti ne wanaloli pamaso gha Malafyale, sakuno mwise mwikalaghe mu nyumba yangu.'' Po akatunyengelela. ¹⁶ Po shikisa shamanyikwa, mwo tukubuka ku buyo bwa nyiputo, tukakomana numulindu yumo yuyo akaba nimbepo sha bulaghushi. Akisa nu malafyale wake yuiyo akapagha ichuma ichingi ngani ukwisila mubulaghushi bwake. ¹⁷ Umukolo uyu akamukonga u Paulo pamupene nutwe akakolela, akatingi, ''Abandu aba babombi ba Chala uwapamwanya ngani. Bakufumusha kukwinyu isila ya kupokiwa.'' ¹⁸ Akabomba ifi amashiku amingishe. Lole mwo u Paulo akalalanawe, akasanuka akati ku mbepo shila, ''Ngukulamula mangamu ya Yesu Kilisituufumemomumwake.'' Po shikafuma pakabalilo kalakala. ¹⁹ Mwo umalafyale wake atesha ukuti ulusubilo lwabo ulwakukabilamo lwatila, bakamukola u Paulo nu Sayilasi nukubaghusila ku malo ghakughulikisha pamaso gha balongoshi. ²⁰ Mwo bamubika ku mulongi wa nongwa, bakati, ''Abandu aba bakutamya akaya kitu. Wayuda. ²¹ bakafumusha inyiho shisho shitakwitikishiwa nindaghilo sha baloma ukuti bapangaghe.'' ²² Po palapala ichilundilo chikamunyamukila u Paulo nu Sayilasi; abalonga nongwa bakanyepula amaselekesha nukughafula nukubalamula ukuti babakamo nifikoti. ²³ Bwo babakoma ngani, bakababika mu jele nukulamula umulindilili wa jele ukuti abasungilile akisa. ²⁴ Mwo apulikila ulaghilo, u mulindilili akabaponia mukatikati mwa jele nukubapinyilila ngani ifilundi fyabo kufiputula. ²⁵ Pakati paushiku u Paulo nu Sayilasi bakiputagha nukumwimbila u Chala inyimbo, abingi babo bakaba mu jele bakapulikishanga. ²⁶ Mwakunyomosha kukawa akasenyenda akakulu, nukuti ulwalo lwa nyumba yabapinyiwa lukaneng'enagha; papo napapo ifyighi fyoshi fikighuka, sona iminyololo ya weshi yoyo yikaba mula yikasatuliwa. ²⁷ Umulindilili akanyamuka ukufuma kutulo, akagha imilyango ya jele yighukite; akegha ichipeni sona akaba papipi ukuti ighoghe mwene papo akinong'onagfha ukuti abapinyiwa bala bafumitemo. ²⁸ Lole u Paulo akakolela amashu aghapamwanya, akatingi, ''Manye wifulashe wimwene, papo tweshi tulipo.'' ²⁹ Umulindilili akisa akolela ukuti kube ubwelu, akingila mukati, nukutetema nubwogha, akawa pamaso gha Paulo nu Sayilasi, ³⁰ sona akabafumya kuse nukuti, ''Baghindikiwa, imbombe sha choni ukuti imbokiwe?'' ³¹ Bakati, ''Subila mwa Malafyale u Yesu, sona timukapokiwe, uwe nawa munyumba yako.'' ³² Bakamuyughila amashu gha Malafyale, pamupene na weshi munyumba yake. ³³ Po umulindilili akabegha pakabalilo kalakala akabushiku, sona akabasukusha utukono twabo po yuyo na boshi munyumba yake bakoshiwa papo napapo. ³⁴ Po mwo akwisa nu Paulo nu Sayilasi munyumba yake akabapa ichakulya, akasekelela ngani na woshi awa munyumba yake, ukuti basubila mwa Chala. ³⁵ Pakabalilo kalakala pamusi, abalongi bakatuma amashu ku mulindilili, nukuti, ''Baleke abandu abo babukaghe.'' ³⁶ Umulindilili wa jele akatuma amashu kwa Paulo, akati, ''Abalongi batuma amashu kukwangu ukuti imbalekele mubukaghe. Pakabalilo aka fuma kuse, nukubuka mumutende.'' ³⁷ Lole u Paulo akababusha akati, ''Patukoma pakati pa chilundilo kushita kutulonga, napo twe Baloma sona bakatuponia mu jele. Po bakalonda ukuti pakabalilo aka batubweshe kubutitu? Awe! Baleke bise bene batulongoshe pakufuma.'' ³⁸ Abalindilili bakaya bababusha abalongi mwo bapulika ukuti u Paulo nu Sayilasi bakaba Baloma, bakoghopa. ³⁹ Abalonga inongwa bakisa nukupepesha nukubegha ukufuma nabo kuse, nukubabusha ukuti bafumemo mukaya kala. ⁴⁰ Po u Paulo nu Sayilasi bakafuma mu jele sona bakaya ku nyumba ya Lidiya. Mwo u Paulo nu Sayilasi babatesha abowamwabo, bakabalimbikisha nukufumamwo mukaya kala.