¹ Abandu bamo bakisa ukufuma ku Yudeya ukuya ku Anthioki nu kubamanyisha abo. Wamwabo, ukuti, ''Pene po mwabutiwa ukuyana ni ndaghilo sha Mose, mutangapokiwa.'' ² Ifi fikamupangisha u Pabuli nu Banabasi ukuba munongwa ingulu nukukangana nabo. Po u Pabuli nu Banabasi, pamupene nabanine ukufuma mukati mwabo,bakasaliwa ukuya ko Yelusalemu pakukomana na batumiba nabosongosongo ukuyana ni busho ili. ³ Po lole, pakut bakatumiwa ni chalichi, bakenda nukupululila mu Fonisha namu samaliya sona nukufumusha isha lupinduko lwa ba kuse. Bakisa nulusekelo ulukulu kubobamwabo. ⁴ Bwo bakwisa ku Yelusalemu, bakapokeliwa naba chalichi sona abatumiwa abasongo nukulingania fyoshi fyo u Chala abomba nabo. ⁵ Abandu bamo bo bakasubilagha, bobakaba ba chibukutila cha ba Falisayi bakima nukuyugha ukuti,'' Chakulondiwa ukuti babutiwe nu ku balaghila ukuti basunge indaghilo sha Mose.'' ⁶ Po abatumiwa nabosongosongo bakabungana pamupene ukuti bendemo mumakani ghala. ⁷ Bwo bendamwo, u Peteli akimilila sona akay`ugha akati kukwawo ''Bo wamwitu, Mukumanya ukuti akabaliro akisa kala u Chala akabika ukusala pakati papinyu, ukuti numulomu wangu abakuse bapulike ishu lyawulumbilili, nukusubila. ⁸ Chala, we kumanya indumbula, akishimikisha ku babo pakubapa umbepo mwikemo, ngati bwo akawombela kukwitu. ⁹ Atakabika ubupambane nawumo pakati pitu na pabawo, bwo ashisuka indumbula shawo mu lwitiko. ¹⁰ Ngapo choni cho mukumughela u Chala, pakuti mubaghile ukufwala ichigholigholi mushingo shaba tumiwa cho abapapi bitu pamu utwe tutabaghile ukunyamula? ¹¹ Lole tukusubila ukuti titukapokiwe ukwendela mu chisa cha malafyale Yesu, ngati mwo bakabela.'' ¹² Ichilundilo choshi chikaba myee bwo chikupulikisha kwa Banabas nu pawuli bakulingania isha fimanyikwilo ni fiswigho fyo u Chala akababombela aba kuse ukwendela mumwabo. ¹³ Bwo baleka ukulingania, u Yakobo akamubula, akati '' Bo wamwitu, pulika kukwangu, ¹⁴ U Simoni akalingania mwo u Chala pabwandilo akabatulila nichisa abakuse ukuti eghemo abandu ukufuma mumwabo ukuba bake. ¹⁵ Amashu gha bakunguluka ghakwitikisha ishi, ukuyana namo shilembiwe, ¹⁶ 'Pabumalilo bwa fyoshi ifi nguya pakughalukila, po nguya pakusenga sona inyumba ya Devidi, yo yikaba; nguya pakwisa nukunosha sona ifisami, ¹⁷ Pakuti abandu bo bakashalikila bamulondeleshe u Chala, ukongania boshi aba kuse bo bitishiwe mungamu gangu.' ¹⁸ Ifi fyofyo umalafyale akuyugha, wini yo abomba shishishi sho shikamanyikwa ukufuma mukabalilo kakale. ¹⁹ Polole ninong'onite pakuti manye tubatamyange bo bakuse bobaghalukile kwa Chala. ²⁰ Lole titubasimbile babo ukuti bepukeko kububibi bwa fifwani, ukufuma kukbulowe nu kulya ingama ya finyamana fyo fyaniongiwa pamu ibanda, ²¹ Pakuti u Mose afumukitwe mutwaya twoshi ukwanda mungulilo shabwandilo sona akulumbililiwa mumasinagogi usabata weshi,'' ²² Po fikabaneka ukuba akisa kubatumiwa nakubakulumba, na kubachalichi boshi, pakusala umuyuda yo wi banabasi, nu silasi, bo bakaba balongoshi babo bamwitu, nukubatuma ku Anthioki nu Pabuli sona nu Banabasi, ²³ Pakusimba ukwendela munyobe shabo, '''Pakufuma kubatumiwa nabakulumba, kubobamwinyu,nakubo bamwitu abakuse aba m anthioki,Siliya,namu Sisiliya; Tukubalamuka! ²⁴ Pakuti tupulikite ukuti abandu bamu bafumitemwo mwitu, kwambula kulamuliwa nutwe, sona babangwanishishe umwe namashu gho ghakubalasa mundumbula shinyu, ²⁵ Chikuboneka akisa kukwitu, twe tuli ninyinongóno shimushene, pakusala abandu nukubatuma kukwinyu pamupene nu Banasi nu Pabuli, ²⁶ Abandu bo bakutamiwa nubumi bwawo panongwa ya malafyale Yesu Kilisitu. ²⁷ Po lole twatuma u Yuda nu Sayilasi, bo tibakabatumile umwe ifindu fimufyene munjugha shabo. ²⁸ Pakuti fikuboneka akisa kwa mbepo mwikemo nakukwitu, pakuti manye tubike umushigho papinyu pakulusha ifindu fyofikulondiwa; ²⁹ mwikanishe ku findu fyo fikemeshiwe kufifwani, ibanda, ifindu fyo finiongiwe, nakubulowe. Pala mwikanisha ukufuma kufindu tichikabe chisa. Shala akisa.'' ³⁰ Po bwo, babafumya, bakisa ku Anthioki; bwo bachibungania ichilundilo pamupene, bakababelengela ukalata. ³¹ Bwo babelenga ukalata, bakasekela panongwa ya kubakasha. ³² U Yuda nu Silasi, nabakunguluka, bakabakasha abo bamwabo namashu amingi nukubakasha. ³³ Bwo bataghapo akabalilo pala, bakabatuma mumutende ukufuma kubo bamwabo nakubo bakabatuma. ³⁴ Lole chikaboneka akisa ukuti u Silasi ashale kulakula. ³⁵ Lole u Pebuli nu Banabasi bakikala mu Anthioki, pakakumanyisha nukulumbilila {pamupene nabanine abingi} amashu gha Chala. ³⁶ Bwo ghakindapa amashiku u Pabuli akati kwa Banabasi,'' isagha tunyokele sona nukkuya pakukomana nabobamwabo mukaya koshi ko tukalumbilila ilishu lya Chala, nukubaketa mo babelile.'' ³⁷ Banabasi akalondagha ukuti bamweghe u Yohani yo wi Maliko nukubuka nawe. ³⁸ Lole u Pabuli akinongóna ukuti chitachisa ukumwegha u Maliko, yo akabaleka mu pamphyilia sona atakabukilila nabo mumbombo. ³⁹ Po ishi shikanyamusha ubushita kupulikana ukukulu, po bakalekana umunine nu munine, lole u Banabasi akamwegha u Maliko bakabuka ku Cyprus. ⁴⁰ Lole u Pabuli akamusala u Sayilasi nukubuka bwo basubiliwa nabobamwabo mu chisa cha Chala. ⁴¹ Po akabuka mu syria nu Cilicia, nukufikashs ifyalichi.