¹ Mwo bafika ku Ikoniyamu u Paulo nu Banabasi bakingila pamupene mu sinagogi iya bayuda nukwanda ukuyugha boshi abayuda na bagiliki bakasubilagha. ² Lole abayuda babo batakapulikilagha bakanyamusha imyoyo ya bakuse sona bakapangisha imyoyo yabo ukubabila abowamwabo. ³ Po bakikala akabalilo akatali, nukuyugha nubukifu namaka gha Malafyale, mwo abapa ubokamboni bwa mashu gha chisa. Akabapa ichishimikisho cha fiswigho fifyo fikabombiwanga nutukono twa Paulo nu Banabasi. ⁴ Lole abandu bamukaya bakaghawanikana; bamu bakaba kulubafu lwa Bayuda, abingi bakaba ku bafundiwa. ⁵ Boshi abakuse na bayuda (pamupene nabalongoshi babo) bakapanga ukuti bagheliwe nukunyasha sona nukubakoma namabwe, ⁶ lole Mwo bamanya ifi, bakakindila ku Layikoniyani akaya ka Lasitilana Delibe nukushungulila ichighaba chila, ⁷ kuko bakabukilila pakufumusha amashu. ⁸ Ku Lisitila umundu yumo akikala, ukushita ukuba namaka mutulundi twake, ukufuma kwa ng'ina, atakendaghapo. ⁹ Umundu uyu akapulika u Paulo akuyugha. U Paulo akamuketelesha sona akatesha ukuti umundu uyu ali nulusubilo bakwitikishiwa ukuti abe akisa. ¹⁰ Po akisa ayugha nawe umwakukwesha amashu, ''Imilila nutulundi twako.'' Po umundu yula akanyela nukwanda ukwenda ukushungulila. ¹¹ Mwo ichilundilo chaketelesha fifyo u Paulo abomba, bakakwesha amashu nukuyugha muchilayikoniya, ''Utwo chala twika pasi nukwisa kukwitu tuto tuli isa mundu.'' ¹² Bakamwitisha u Banabasi ''Zeus'' sona u Paulo ''Heremes,'' chifukwa akaba mulongoshi wakuyugha. ¹³ Umuputi uwaku Zeus yuyo itemphile lyake likaba kuse kwakaya aka, bakegha abokambaku abakufula ningata mumilyango; umwene nichilundilo bakalondagha ukwikemeshewa. ¹⁴ Lelo mwo abafundiwa, Banabasi nu Paulo, bapulika ifi, bakanyepula imyenda sona mwalubilo bakabuka kuko kukaba ichilundilo, nukwanda ukulila, ¹⁵ ''Bandu, choni chicho mukubomba ifindu ifi? Nutwe twebandu, twe fipeliwa isa mwemwe. Tukubabula amashu amisa ukuti mufileke ifindu fyamwalwe ifi nukunyokela kwa Chala ubabwumi, yuyo akapela ichisu chakumwanya nichapase, ninyanja nafyoshi fifyo fili mumwo. ¹⁶ Mufyinja ifyakale, akitikishanga woshi ukwenda isila ishabo nulwabo. ¹⁷ Lole mupaka nulu, takabalekagha bene ukushita bimilili, mu ifi akamupa ifyisa nukumupa ifula ukufuma kumwanya sona mukabalilo akisa, ukumwisusha indumbula yake nichakulya nulusekelo.'' ¹⁸ Pamupene namashu agha, u Paulo nu banabasi bakapangisha ukuti abandu manye bikemeshe. ¹⁹ Lole abayuda bamu abaku Anthiyoki na Ikoniyamu bakisa nukunyengelela ichilundilo. Bakamutisa u Paulo namabwe sona bakamutishamwo mukaya, bakinong'onagha ukuti afwile. ²⁰ Lole mwo abafundiwa bimilila nukumushungulila, akimilila nu kwingila mukaya. Ishiku ilinine, akabuka ku Delibe pamupene nu Banabasi. ²¹ Mwo ba fumusha amashu amisa mukaya kala nukubapela abingi akuba bafundiwa, bakanyokela ku Layisitila, ku Ikoniyamu, naku Anthiyoki. ²² Bakabukilila ukubalimbikisha abafundiwa imyoyo yabo nukubakasha ukuti babukilishe nulwitiko, ukuyugha ukuti, ''tubaghile ukwingila ku bunyafwale bwa Chala ukwendela mukiuyimba ukwingi.'' ²³ Mwo babasala ukuba balongoshi babo mu chalichi chili choshi, sona bakiputagha nukufunga ukulya, bakaba bakusubaliwa kwa Malafyale, yuyo bakamusubilagha. ²⁴ Po bakenda ku Pisidiya nukwisa ku Pamphyliya. ²⁵ Mwo bayugha amashu ku Peliga, bakilomoka ku Ataliya. ²⁶ Ukufuma kula bakalobosania kuya ku Anthiyoki, kuko bakipeleka muchisu cha Chala pa mbombo yo bamalisha. ²⁷ Mwo bafika mu Anthiyoko nukubungana muchalichi pamupene, bakayugha fyoshi fifyo u Chala abomba nabo, namumwo abighulila imilyango ya lwitiko ku bakuse. ²⁸ Bakikala akabalilo akatrali nabafundiwa.