¹ Nehoni lin'eloi lyomushitanu alyopo lishika tolombita thzalyo. Amepo nimona litungwethzi kutunda kuwilu kuwela pa kaye. Litungwethzi alyopo lipiwa kii thzo shelo sho liteke lyokupila pandanda. ² Alyopo liyanjulula shelo sho kuliteke lyokupila pandanda. Akopo kupuna mushii ulipitula eci musii o lililo lyoshokulu. Liyuwa no mupepo ayopo ipiluka wilu ko musii utunda ku shelo sho liteke lyokupila pandanda. ³ Mbimba athzopo thzipuna mu mushii kukeya pa kaye, ne athzopo thzipiwa okolo eci okolo o nge pa kaye. ⁴ Athzopo thzitongweliwa ci thzaipisha muhonyi opa kaye nji enu yoihe inakuniwa nji etondo, unone thziipishe pohuma anu napili liswayo lya Nyambi palupala lo. ⁵ Kanathzitawethziwa kupaa awo anu, unone ci thziwahumbishe pohuma pa maonda mutanu. Kukola kawthzo kwalipitula eci kukola ko nge konahumu munu. ⁶ Mu mayuwa ao anu kenge akufota lifu, unone kakuliwana. kenge akuhima nene kufa, unone lifu kenge lyakuwacila. ⁷ Ethzo mbimba kuma thzamonahalile eci tukambe tuna loisheliwa ku mvo. Pa mitwi thzathzo pakalile sho kulipitula eci mahuthsi o gauda, ne ehanga yathzo yalipitulile eci ya anu. ⁸ Thzakalile no ouhunga eci huki thza ambuyama, no maeo eci o nyime. ⁹ Thzakalile no evata yo pambando yokulipitula eci evata yo pambando kucilisha kukuluka yo shifu, ne muvumo o mando athzo walipitula eci muvumo o makoloi aa akokiwa ko tukambe kundandumukela ku mvo. ¹⁰ Thzakalile no mithsila thzo mingunguya eci nge; mu mithsila thzathzo kwakalile ohungu on kuipisha anu pa maonda mutanu. ¹¹ Thzakalile no fumu okuthziendisha lingeloi lyo liteke lyokupila pandanda. Lithzina lyenji mu shiheveru neli Abadoni, ne mu shigelike kuma akalile no lithzina lyo Apoliyoni. ¹² Kubindama ko matatekelo kunapu. Otaneke! Munyima wei kuli no kukeya kuhumbishiwa kwili. ¹³ Lin'eloi lyomushitanu na lyofoci alyopo lishka tolombita thzalyo, ne amepo niyuva liywi kutunda ku manyiya o aletale thzo gauda ethzi thzili pa lupala lwa Nyambi, ¹⁴ kuambela lin'eloi lyomushitanu na lyofoci eli nalikwata tolombita ci, ''Oangulule man'eloi ane aa ana angeliwa ku lyawa lyoshokulu lyo Eufrate.'' ¹⁵ Man'eloi ane aa aloisheliwile esho shikati, elyo liyuwa, ethzo ngonda no owo mwaka aangululiwile ci apae shipinthzi shomushihatu kwa anu. ¹⁶ Ungi o mashwalale awa akalile pa miongo thzo tukambe neli 200,000,000. Nayuvile ungi wo. ¹⁷ Omu moliyo nanimonena tukambe mu shimona shange nawa nathzini po: Evata yoo yo pambando neli ya ukihu wo muilo, undilu wo wilu eci sulufula. Mitwi thzo tukambe thzalipitulile eci thzo nyime, ne mutunwa twato kwapunine mulilo, mushi, no sulufula. ¹⁸ Shipinthzi shomushihatu ya anu yapaiwile ko owo ukalu uhatu: mulilo, mushi, no sulufula ei yatundile mutunwa. ¹⁹ Mukonda okolo o tukambe kuma wakalile mutunwa twato no kumithsila thzato- mukonda mithsila thzato thzalipitulile eci mayoka ali no mitwi ethzi anakulukishanga anu. ²⁰ Anu wahe, awa nakana kupaiwa ko ou ukalu, kanahumbela ekwama yo moko o, nji kushiya kulombela madimona no tumbonya to gaudi, shiivera, kopa, mawe no itondo- enu ikana kumona, kuyuva, nji kuenda. ²¹ Kana humbela shanga, upaii wo, ulothzi wo, ohuka wo, nji withzi wo.