¹ Nguana ou nathsikula shilamatela sho mushitanu na eli, muwilu kwatutwalile pa shikatiana. ² Nehoni amepo nimona man'eloi mutanu na eli aa anemana pa lupala lwa Nyambi, ne aopo apiwa matolimbita mutanu na eli. ³ Akopo kukeya lin'eloi limweya, kolinakwatelea kafuma ko gauda ko insense, ko linemana pa aletale(katala) thzo insense. Alyopo lipiwa insense yoingi ci liipe ko ilombelo ya anu wahe okukena a Nyambi pa aletale(katala) thzo insense thzo gauda pa lupala lo shipula sho ufumu. ⁴ Mushi o insense- no ilombelo ya anu a Nyambi okukena- awoppo utuka pa lupala kwa Nyambi kutundelela mu lyoko lyo lin'eloi. ⁵ Lin'eloi alyopo lishimba kafuma ko insense no kukapaka mulilo opa aletale. Ne alyopo likakonjela pashi mukaye, akopo kukala mishika, maywi ouanji, myethso, no kulingunga ko kaye. ⁶ Man'eloi mutanu na eli aa akalile no matolombita aopo aliloishela kushika matolombita. ⁷ Lin'eloi lyo matatekelo alyopo lishika tolombita thzalyo, akopo kukala mvula o mawe no mulio unalivandakana no onyinga. Yakonjeliwile pa kaye ne shipinthzi sho mushitu sho kaye ashopo shitumekiwa, no shipinthzi shomushihatu sho itondo ashopo shitumekiwa, no muhonyi ouyu ouhe awopo upya. ⁸ Lin'eloi lyomushili alyopo lishika tolombita thzalyo, ne shinu shilipitula eci mukinya oshokulu uyuuma mulilo ashopo shikonjeliwa mu likulu lwale. Shipinthzi shomushihatu sho likulu lwale ashopo shipiluka onyinga, ⁹ shipinthzi shomushihatu kwei iyoya mu likulu lwale ayopo ifa, no shipinthzi shomushihatu ku isepe ayopo iipa. ¹⁰ Lin'eloi lyomushiatu alyopo lishika tolombita thzalyo, ne litungwethzi lyoshokulu alyopo liwa kuwilu, ko liyuuma eci lambi, kuwela pa shipinthzi shomushihatu sho maawa no pa man'ithsingi o meyu. ¹¹ Lithzina lyelyo litungwethzi po kalulwethzi. Shipinthzi shomushihatu sho meyu ashopo shipiluka kalulwethzi, ne anu owangi awopo afa kwao meyu nalulu. ¹² Lin'eloi lyomushne alyopo lishika tolombita thzalyo, ne shipinthzi shomushihatu ku liyuwa ashopo shitetiwa, no shipinthzi shomushihatu ku ngonda no ku matungwethzi ayopo itetiwa. Ne shipithzi shomushihatu kukwayo ashopo shipiluka milema; shipithzi shomushihatu ku mutanya no ushiku kanashikala no mwethzi. ¹³ Amepo nitaneka, ne amepo niyuva ngonga tuka tuka muwilu ko kuwa no liywi lyoshokulu, ''Kubindama, kubindama, kubindama kwawa ali pa kaye, mukonda o mivuma thzo matolombita aa anashiyala atamba kushikiwa ko man'eloi ahatu.