¹ Munyima wei amepo nimona man'eloi ane kwanemana mu mapeta ane o kaye, kwanakwata kutanalisha mipepo thzine thzo kaye ci kupile mupepo ou upepa pakaye, pa likulu lwale, nji pa itondo. ² Amepo nimona lin'eloi limweya kolitunda ku muvoyuwa, Lyakalile no liswayo lya Nyambi oyu yoya. Alyopo likuwa ko liywi lyoshokulu ku man'eloi apiwile okolo o kuipisha kaye no likulu lwale: ³ ''Lelo mwaipisha kaye, likulu lwale, nji etondo shime ou tumana kupaka liswayo palupala lwa angamba a Nyambi wetu.'' ⁴ Amepo niyuva apa akuma awa apakiwile liswayo: 144,000, awa apakiwile liswayo kutunda ku mikuta thzothzihe thza anu o isilaele: ⁵ 12,000 ku mukuta wa Juda kuma apakiwile liswayo, 12, 000 kutunda ku mukuta wa Rubeni, 12,000 kutunda ku mukuta wa Gadi, ⁶ 12,000 kutunda ku mukuta wa Ashari, 12,000 kutunda ku mukta wa Nafetali, 12,000 kutunda ku mukuta wa Manase, ⁷ 12,000 kutunda ku mukuta wa Simioni, 12,000 kutunda ku mukuta wa Livi, 12,000 kutunda ku mukuta wa Isakare, ⁸ 12,000 kutunda ku mukuta wa Zebuluni, 12,000 kutunda ku mukta wa Josefa, no 12,000 kutunda ku mukuta wa Benjamine kuma apakiwile liswayo. ⁹ Munyima wei enu amepo nitaneka, kalo kwakalile anu owangi okukana kutawa kutaliwa- kutunda ku matunga oahe, ku mikuta thzothzihe, ku anu wahe, no ku mishobo thzothzihe- kwanemana pa lupala lo shipula sho ufumu no palupala lwa Nguana. Kuma avatile eto oyikenu kwanakwatelela mitai thzo makaka mu moko o, ¹⁰ kalo kwakuwelela ko liywi lyoshokulu: ''Kuyoishiwa po kwa Nyambi wetu oyu nakala pa shipula sho ufumu, no ku kwa Nguana!'' ¹¹ Man'eloi oahe shime aimanine kuthzinguluka shipula sho ufumu no kuthzinguluka akulu no iumbiwa yokuyoya, ne aopo atongama pa lupala lo shipula sho ufumu. Aopo alombela Nyambi, ¹² kwa amba ci, ''Ameni! Kushangala, kutethzima, onyanyami, kukandelela, lilema okolo no n'asho ikale kwa Nyambi wetu kokukana kupwa! Ameni!'' ¹³ Nehoni yumweya ayepo niipula, ''Alye awa anavata eto yoikenu, kalo kupi atunda?'' ¹⁴ Amepo nimuambela ci, ''N'athsile, yamwe munalimuka,'' ne ayepo niambela ci, ''Awa woliyo anatundu mu makando oshokulu nene. Anahupu eto yo no kuikwama yoikenu mu onyinga wa Nguana. ¹⁵ Mukonda wei, anemana pa lupala lo shipula sho ufumu sha Nyambi, ne amulombela oshiku no mutenya mu tempele thzenji. Oyu nakala mu shipula sho ufumu kenge akuyandufumuna tende thzenji peulu thzo. ¹⁶ Kakufa njala kalo, nji kuyuva linotwa kalo. Mutenya kawa kuwatumeka, nji kupya ko mushovo upi. ¹⁷ Mukonda Nguana aye li pakaci ko shipula sho ufumu kenge akuwanyunga, no kuwamonisha likun'wa lyo kuthza ku meyu o mwoyo, ne Nyambi kenga akupolola mihothzi ku meho o.''