¹ amepo nitake nguana ou athsikulile shilamatela shofoci kutunda kwei yo mutanu na ili, ne amepo niyuva shiumbiwa shimweya kweyo iumbiwa ine yokuyoya ko shiamba ko liywi lyoshokulu lyo kulipitula eci mushika, ''Okeye!'' ² Amepo nitaneka ne kwakalile kakambe kokakenu. Oyu wakathzinine ko nakwata ota, no kupiwa huthsi thzo ufumu. wakeile eci mukakulea kunapaelela. ³ Nguana ou athsikulile shilamatela sho mushili, amepo niyuva shiumbiwa yomushili yokuyoya ko shiamba ci, ''Okeye!'' ⁴ Nehoni akopo kupuna kakambe- koshokihu. Oyu wakathzinine wapiwile okolo okutundisha kuliyala kuli mukaye, ci anu o mukaye alipae. Oyu wathzinine aka kakambe wapiwie muele oshokulu. ⁵ Nguana ou athsikulile shilamatela sho mushihatu, amepo niyuva shiumbiwa sho mushihatu ko shiamba ci ''Okeye!'' Amepo nimona kakambe kokelu, oyu wakathzinine onakwatelela ekala ili mulyoko lyenji. ⁶ Amepo niyuva eshi yayuvahalle eci liywi mukaci ko iumbiwa ine yokuyoya ko liamba ci, ''Mbilikani thzofoci thzo witi thziuliwe dinare thzofoci no mambilikani ahatu o mavu auliwe dinare thzofoci, unone mwaipisha maathzi no waine.'' ⁷ Nguana ou kuthsikulile shilamatela sho mushine amepo niyuva liywi lyo shiumbiwa sho mushine ko liamba ci, ''Okeye!'' ⁸ Amepo nimona kakambe kokukenunuka. Oyu wathzinine po esiwa ufu, ayepo mushupwela oyu nemanena shivaka shakwa kufa. Apiwile okolo okuendisha shipinthzi sho mushine sho kaye, ci apae ko mwele, njala, ekola, no iyama yopano pakaye. ⁹ Nguana ou athsikulile shilamatela sho mushitanu, amepo nimona mushi thzo katala myoyo thzawa napaiwa mukonda o liywi lya Nyambi no upaki akalile nao. ¹⁰ Kuma akuwelelile ko liywi lyoshokulu ci, ''Kenge kwakupita shikati sho kukuma papi, muendishi wenu yoihe, shokenu no shemwa, shime apa wakuatulela awa ayoya pa kaye, nou mbo pa mulandu o onyinga wetu?'' ¹¹ Nehoni munu no munu kokwo ayepo piwa shito shoshikenu, ne awopo atongweliwa ci atatelele shikatiana tango shime ou thzakukwana palo thza angenjo angamba na apo awa aloea kupaiwa, eci eli napaiwa nawo, kothzinapu. ¹² Nguana ou athsikulile shilamatela shomushitanu nashofoci, amepo nitaneka ne kuma kwakalile kunyanganya ko kaye kokukulu. Liyuwa lya elaulile eci thsaka thzoshowilu, no ngonda thzapilukile eci onyinga. ¹³ Matukwethzi o muwilu aopo awela pashi, eci shitondo sho feiga koshikulumuka no mupepo koshishime kupya oshuka ko unyungiwa ko lipepo lyoshokulu. ¹⁴ Liwilu lyapwile eci pepa thzipetathzekiwa. Mikinya thzothzihe no makanda oahe yatundishiwile omu yakala. ¹⁵ Nehoni mafumu opano pashi no anu okulemekiwa, nakakuendisha mashwalale, no mafumanyi, no anu owakolo, na anu wahe, apika na nakakuliyala awopo aliholeka mumateke o mumawe no mu mawe o mu mikinya. ¹⁶ Awopo ambela mikinya no mawe ci, ''Mutuwele! Mutuholeke ku shihanga shoyu nakala mushipula sho ufumu no kuanji wa nguana. ¹⁷ Mukonda mayuwa oshokala ounji wo anakumu. Elye oyu twesha kuimana?''