¹ Nehoni amepo nimona mu lyoko lyo shilyo lyoyu nakala pa shipula sho ufumu vuka thzinan'oliwa peulu no kunyima, thzinalamateliwa no maswayo mutanu na eli. ² Amepo nimona lin'eloi lyoshokolo ko likuwelela ni liywi lyoshokulu ci, ''Elye loela kuthsikula vuka no kutundisha maswayo athzo?'' ³ Kwithsa shanga yofoci o muwilu nji omuno mukaye oyu watweshile kuthsikula vuka nji kuthzitala. ⁴ Amepo nilila manene mukonda kwithsa oyu wawaniwile ci yoliyo twesha kuthzisikula nji kuthzitala. ⁵ Unone yumweya kwa akulu ayepo niambela ci, ''Lelo walila. Omone! Nyime oshikuta sha Juda, muthzithzi wa Davida onalee. Atwesha kuthzithsikula no kutundisha maswayo athzo o mutanu na eli. ⁶ Amepo nimona nguana kunemana pakaci ko shipula sho ufumu no mukaci ko iumbiwa ine yokuyoya no mukaci ka akulu. Kuma amonahalile eci napaiwa. Kuma akalile no manyiya mutanu na eli no meho mutanu na eli, athzo mipepo thza Nyambi thzo mutanu na thzili atumine mu kaye. ⁷ Ayepo thza kukashimba vuka mu lyoko lyo shilyo lyoyu wakalile mu shipola sho ufumu. ⁸ Ou amanine kushimba vuka eyo iumbiwa ine yokuyoya na akulu makumi eli na ane awopo atongama pashi pa lupala lwa nguana. Munu no munu kuma akwatwlelile harepa no lilonga lyo gauda lyokuyala insense, ayo ilombelo ya anu a Nyambi oshokenu. ⁹ Awopo emba limbo lyolipe: ''Waloela kushimba vuka no kuthsikula maswayo athzo. Mukonda kuma wapaiwile, ne ko onyinga woe onawanena Nyambi anu kutunda ku mikuta thzothzihe, ku mishobo thzothzihe, ku anu wahe, no ku litunga lyolihe. ¹⁰ Onawakwama mafumu no a pulisita okukwamena Nyambi wetu, ne kenge akuvuthsa pakaye. ¹¹ Nehoni amepo nitaneka no kuyuva mulumo o man'eloi aa athzilukile kupaka mukaci shipula sho ufumu no iumbiwa yokuyoya no akulu. Neli angi-angi okukana kutwa kutala. ¹² Aopo amba ko liywi lyoshokulu, ''Aloela nguana, oyu wapaiwile, kutambula okolo, lufumo, onyanyami, n'asho lilema, kutethzima, no kushangaliwa.'' ¹³ Amepo niyuva iumbiwa yoihe ei yakalile muwilu nei yakalile pakaye no mushi thzo kaye no mu likulu lwale- yoihe ilimo- ko iamba ci, ''koyu nakala mu shipula sho ufumu no nguana kukale kushangala, kulemeka, kutethzima, no okolo kokukna kupwa.'' ¹⁴ Iumbiwa ine yokuyoya ayopo iamba ci, ''Ameni!'' Ne akulu o makumi eli na ane awopo atongama pashi no kulombelo oyu yoya mwoyo okukana kupwa.