¹ Munyima weyi enu amepo nitaneka, nepo nimona shelo sho shiyahamwa muwilu. Liywi lyo mutatekelo eli nayuvile kuma lyaambile kukwange eci tolombita, ku liamba ci, ''Okeye kuno, ne kenge nikumonisha ei yakukwamahala mumanyima wei enu.'' ² Popo mupepo awopo unishmba, ne po nimona shipula sho shifumu shakalile muwilu, munu konekalapo. ³ Oyu wakalile po shime amonahalile eci mawe o jaspa no kanelia. Kwakalile likongolo lyathzingulukile shipula sho ufumu. Likongolo shime lyamonahalile eci liwe lyo emelaudi. ⁴ Kwakalile ipula yo ufumu makumi eli na ine ei yathzingulukile esho shipula sho ufumu, ne awa akalile apo pa ipula yo ufumu neli akulu o makumi eli na ane(24), awa avatile eto yoshokenu, no mahuthsi o gauda ku mitwi thzo. ⁵ Mu shipula kwatundile myethso, kuvuma no mishika. Malambi okuyuma o mutanu na eli shime ayuumine palupala lo shipula, malambi neli mipepo mutanu na thzili thza Nyambi. ⁶ Palupala lo shipula kwalile likulu lwale lyo shiponi, eci kristale. Mukaci no mu manganga o shipula kwalile iumbiwa ine yokuyoya, yokuyala meho kulupala no kumanyima. ⁷ Siumbiwa shomutatekelo shokuyoya neli shalipitula eci nyime, shomushli shiumbiwa sho kuyoya neli shalipitula eci namani, shomushihatu shiumbiwa sho kuyoya shakalile no shihanga eci munu, ne shomushine shiumbiwa sho kuyoya neli shokupila eci ngonga unduka. ⁸ Ei iumbiwa ine yokuyoya shiumbiwa no shiumbiwa shakalile no mando mutanu na lyofoci, yayalile meho peulu no mushi. Ushiku no mutenya kayashiyangile kuamba ci, ''Onakene, onakene, onakene Fumu Nyambi shokolo, oyu wakalile ko, oyu li ko, oyu wakukeya.'' ⁹ Ei iumbiwa yokuyoya ou shangala, kulemeka, no kukandelela koyu nakala mushipula, oyu yoya moyo o liyele, ¹⁰ awa akulu o makumi eli na ane atongama pa lupala loyu nakala mu shipula sho ufumu no kumulombela oyu yoya mwoyo o liyele. Alishupula mahuthsi o ufumu no kuapaka pa lupala lo shipula sho ufumu, kwa amba ci, ¹¹ ''Waloela, Fumu wetu no Nyambi wetu, kutambula kutethzima no lilema no okolo, mukonda yowe wombile enu yoihe, ne ko kuhima koye yakalile ko no kuumbiwa.''