¹ ''On'olele lin'eloi lyo keleke thzo mu Sadisi ci: 'A maywi oyu li no mipepo mutanu na thzili thza Nyambi no matungwethzi mutanu na eli. ''Nalimuka ekwama yoe. Walimukiwa ci wayoya, unone onafu. ² Opinduke otanalishe eyi inashilako unone nayo yafota kufa, mukonda kaniwanine ekwama yoe ci iwa mu meho a Nyambi wange. ³ Nehoni, ovuluke, ei onatambula nei onayuvu. Oimamele, ne ohumbe. Unone ngeci kopinduka, kenge nakukeya eci mwithzi, kalo kowakulimuka shikati nakukukeyela. ⁴ Unone oli mathzina oapu mu Sadisi aa anakana kuvundavunda eto yo, ne kenge akuenda nange, kwanavata yoshokenu, mukonda yawaloela. ⁵ Oyu wakutwesha kenge akuvatekiwa eto yoshokenu, kalo kanakutundisha lithzina lyengi mu buka thzo mwoyo, kalo kenge nakuamba lithzina lyenji kwa Tata, no ku man'eloi enji. ⁶ Oyu li matwi, ayuve eshi uamba mupepo ku makeleke.''' ⁷ ''On'olele lin'eloi lyo keleke thzo mu Filadefia ci: 'A maywi oyu nakene no shemwa- onakwata kii thza Davida, ou ayanjulula kwithsa oyu twesha kuyanjela, kalo ou ayanjela kwithsa oyu twesha kuyanjulula. ⁸ '''Nalimuka ekwama yoe. Omone ninakuyanjululela shelo ethzi akana kutwesha kuyanjela munu yomuhe. Nalimuka ci oli no n'ashoana, unone onamamela liywi lyange kalo kohamulile lithzina lyange. ⁹ Omone! kenge nakukwama awa ali ku sinagoge thza Satani, awa aliisha ci Ajuda unone kali Ajuda, unone akwa n'anda- kenge niwakwama ci akutongamene ku maulu oe, kalo kenge akulimuka ci nakuhima. ¹⁰ Pakulandelele etumina yange ko mwoto, name kenge nakukutundisha kushikati sho ieleko eshi shikeya ku kaye kokahe, kunaeleka awa ali mukaye. ¹¹ Pano pano nikeye. Okwatelele eshi oli nasho ci kupile oyu kunyanga huthsi thzoe thzo ufumu. ¹² Oyu wakutwesha kenge nakumukwama shithsini mu tempele thza Nyambi. Kakutunda mo kalo, ne kenge nakumun'ola lithzina lya Nyambi wange, lithzinza lyo mbongi thza Nyambi wange (Jelusalema omupe, oyu tunda kuwilu kwa Nyambi wange), no lithzina lyange lyolipe. ¹³ Oyu li matwi ayuve eshi uanba mupepo ku makeleke.''' ¹⁴ ''On'olele lin'eloi lyo keleke thzo mu Laodisea ci: 'Aa maywi a Ameni, okusepahala no paki oshemwa, mukakuendisha ei aombile Nyambi. ¹⁵ ''Nalimuka ekwama yoe ne koombola nji kupya. Nafota ci nga waomboa nji kupya! ¹⁶ Honi, mukonda waenya pohuma- kopile nji kuombola- pano pano nikushanje mukanwa kange. ¹⁷ Mukonda wamba ci, 'Nili no lufumo, nili no itenga yoingi, ne kwthsa ei nifota.' Unone kolimuka ci yowe li mu ukalu oshokulu manene, onayanda, oshihutu, onafu meho kalo oli shin'ekan'eka. ¹⁸ Oteelele ei nikutongwele: Oule kukwange gauda naloishiwa ko mulilo ci okale no lufumo, no eto yoikenu nene ci ovate ne ci lelo wafa honyi thzo kukala shin'ekan'eka no maathzi o kupaka mu meho oye ci omone. ¹⁹ Naanjipela no kukutulula yomuhe oyu nihima. Nehoni, otanalishe kalo ohumbe. ²⁰ Omone, ninemana pa shelo ne nangongota. Ngeci munu ayepo yuva liywi lyange ne ayanjulula shelo, kenge niingena munjiyo yhzenji no kukalya nenjinaye naye alye nange. ²¹ Oyu wakutwesha kenge akukala nange mu muvuthso wange, eci eli natweshile name no kukala na Tata mu muvuthso wenji. ²² Oyu li no matwi ayuve eshi uamba mupepo ku makeleke.'''''