¹ ''Ku Lin'eloi lyo ku keleke thzo mu Efese on'ole ci: 'Maywi oyu nakwatelela matngwethzi o mutanu na eli mu lyoko lyenji lyo shilyo no kuenda mukaci ko malampi o gauda o mutanu na eli, ² ''Nalimuka ekwama yoye, nei onakwama yoikalu, no muoto ou nokala nao, ne kotwesha kutawethza kuyoya na anu owamango, unone no eleka awa naliishi ci apositola unone kali apositola, ne onawana ci kali apositola oshemwa. ³ Onalithzuu mucima no kunyandela lithzina lyange, ne koayile. ⁴ Unone eshi nishomolola kukoye shinu shofoci, onashiyi shihemo shoe shomutatekelo. ⁵ Nehoni ovuluke ci kupi onau. Ohumbe ne okwame ei wakwamangile kumatatekelo. Ngeci kohumbu, kenge nakukeya kunatundisha lampi thzoe apa thzili. ⁶ Unone oli nei: Onathzimbi ekwama ya aka Nikolai, ei ninathzimbi name. ⁷ Oyu li no matwi, ayuve esho mupepo uamba ku makeleke. Oyu wakutweshe kenge nakumutawethza kulya ku shitondo sho mwoyo, ethzo paradise thza Nyambi.''' ⁸ ''On'olele lin'eloi lyo keleke thzo mu Simina ci: 'Maywi oyu li matatekelo no mahulelo, oyu wafile no kuyoya kalo: ⁹ ''Nalimuka makando oe no uhutu woe, unone oil no lufumo. Naliuka omango wao aliisha ci Ajuda, unone kali Ajuda. Woliyo sinagoge thza Satani. ¹⁰ Lelo wayapa makando aa akukeyela. Omone! Diavulosi panopano apake wamweya kukwenu mukamenga ci mwakuelekiwe, ne kenge mwakunyanda pa mayuwa likumi. Mukale owawa kukakuma pa kufa, ne kenge nakumipa huthsi thzo mwoyo. ¹¹ Oyu li matwi ayuve eshi mupepo uamba ku makeleke. Oyu wakutwesha kakuuuka ku lifu lyomushili.''' ¹² ''On'olele lin'eloi lyo keleke thzo mu Pegamo ci: 'Maywi oyu nakwata mwele o kulola oku no noku: '' ¹³ Nalimuka oku onakalanga, koliyo shili shikun'a sha Satani. Unone lithzina lyange onalikwata kutanalisha. Nalimuka ci konohamula shitawo shoe kukwange, shanga mu mayuwa a Antipasi paki wange, okusepahala wange, oyu apaile mukaci kenu, oku anakalanga Satani. ¹⁴ Unone nili nei shoshoonye ni kushomolola nayo: Oli na anu amweya awa anakwata kutanalisha ku ifundisha sha Balaamu, oyu wafundishile Balaki mokuingenishela ana isilaele owakwelume mu umango ci alye ilya inakwameniwa shitavelo sho tumponya no kuninga ci akale no lungu. ¹⁵ Kokuipitula, oshili na amweya awa anakwata kutanalisha ku ifundisha ya Anikolai. ¹⁶ Nehoni, ohumbe! Ngeci kohumbu, kenge nakukeya kukoe wanguwangu no kunawalwisha ko mwele ou uli mu kanwa kange. ¹⁷ Oyu li no matwi, ayuve eshi uamba mupepo ku makeleke. Oyu wakutwesha kenge nakumupa ku manna anaholekiwa, kalo kenge nakumupa liwe lyolikenu apa pana n'oliwa lithzina lyolipe, lithzina eli akana kulimuka munu yomuhe shime oyu nalitambula.''' ¹⁸ ''On'olele lin'eloi lyo keleke thzo mu Tiyatira ci: 'Aa oliyo maywi a Mwana Nyambi, oyu li no meho alipitula no malimi o mulilo no maulu alipitula no shifu shinaloishiwa: ¹⁹ ''Nalimuka ekwama yoe: Shihemo no shitawo shoe nekwama yoe kwa anu no kulithzua mucima koe. Nalimukaci eyi onakwama n'anyin'anyi yapita eyi nokwama kumatatekalo. ²⁰ Unone eyi ninakushomolola po eyi: Onashiyelela mbuyama Jezebele, oyu liisha ci mupolofita. Ko ifundisha yenji angela angamba ange ci akwame olungu no kulya elya inakwameniwa shitavelo sho tumponya. ²¹ Nanimupa shikati sho kuhumba, unone kafotile kuhumbela omango wenji. ²² Omone! kenge nimuhulwela po olili o kukola ne awa nalemekanga nenji kenge niwapaka mu makando oshokulu, shime ou akuhumbela omango o ekwama yenji. ²³ Kenge nakupaa anenji, ne makeleke oahe kenge akulimuka ci yame nitatubanga maayalo no micima thza anu. Kenge nakupa munu no unu kukwenu kuthza ko ekwama yenji. ²⁴ Unone kukwenu mwahe mu Tiyatira, ku munu yomuhe oyu kana kulandelela eyi ifundisha kalo kalimuka eyi atoya amweya ci othzungi wo enu ya Satani- kukwenu naamba ci, 'Kanipaka ulemu umweya kukwenu kalo.' ²⁵ Pano honi, mukwate kutanalisha kukumena apa nakukeya. ²⁶ Oyu wakutwesha ne akwama ekwama yange kukumena kumahulelo, kenge nakumupa okolo peulu o matunga. ²⁷ 'Kenge akuwaendisha ko mulamu o shifu, kenge akuwakuyaula tupathsi- pathsi eci okukuyaula nganja thzo oma,' ²⁸ eci eli nitambula ame kwa Tata, naye kenge nakumupa lilungwe(itungwethzi). ²⁹ Oyu li no matwi ayuve eshi uamba mupepo ku makeleke.'''