¹ Esthzi thzoliyo sinulo thza Jesu ethzi namupa Nyambi ci amonishe angamba enji ei yakukwamahala panopano. Wailimukishile ko kutuma lin'eloi lyenji kwa ngamba wenji Joani, ² oyu wapile upaki o liywi lya Nyambi no upaki wa Jesu Kilesite, yoihe enu namono. ³ Oli no fiyauthzi oyu okutala eshi shipolofita ko kuyelula ku liywi nawa atelela aa maywi o shipolofita no kumamela ei inan'oliwa mo, mukonda shikati pepi shili. ⁴ Ame Joani, ku makeleke o mutanu na eli omu Asia: Shihemo shikale nenu no kuliyala oku kutunda koyu liko, oyu wakalil ko, oyu wakukeya no kutunda ku mipepo thzo mutanu na thzili ethizi thzili ku shipula shenji sho ufumu, ⁵ no kutunda kwa Jesu aye paki o kusepahala, mweli omatatekelo kupinduka kwa afu, no muendishi o mafumu o kaye. Koyu watuhima kalo onatutundisha ku ivi yetu ko unyinga wenji- ⁶ onatukwama mafumu, apulisita a Nyambi wenji no Tata wenji-kutethzima no okolo okukana kupwa ikale kukwenji. Ameni. ⁷ Mumone akeya no mavui; meho oahe kenge akumunona, nawa amukin'ine kenge akumumona. Mikuta thzoyhzihe thzomuno mu kaye kenge thza kulila mukonda wenji. Ee Ameni. ⁸ ''Yame alufa no omega, o matatekelo no mahulelo,'' kwa amba Fumu Nyambi, ''oyu li ko, oyu wakalile ko, oyu wakukeya, Omukulu ku enu yoihe.'' ⁹ Ame Joani-mwapenu oyu mwaliwana nenji mu makando no mu muvuthso no kulitanalisha ko mucima oule oku kuli kwa Jesu- ¹⁰ nekalile muikanda li ishiwa Patimosi mukonda o liywi lya Nyambi no upaki wa Jesu. Hime nakalile mu mupepo pa liyuwa lya Fumu. Amepo niyuva munyima thzange liywi lyoshokulu lyo kulipitula eci tolombita. ¹¹ Alyopo liamba ci, ''Ei omona oin'ole mu vuka, ne othzitume ku makeleke o mutanu na eli -ku Efese, ku Simina, ku Pegamo, ku Tiyatila, ku Sadisi, ku Filadelufiya, no ku Laodisia.'' ¹² Amepo nipiluka ci nimone ci elye oyu mukwa liywai oyu amba nange, ou napilukile amepo nimona malampi mutanu na eli o gauda. ¹³ Pakaci ko malampi kuma kwakalile oyu lipitula eci Mwana Munu, ona vata eto yoshole yo kukakuma no ku maulu no mwiya o gauda pa muili. ¹⁴ Mutwi wenji no huki thzenji neli ikenu eci ohunga o mangu-ukenu eci ukenu o mpundwi-no meho enji neli alipitula eci malimi o mulio. ¹⁵ Maulu neli alipitula eci shifu shinakenishiwa, eci shifu shina nyongololiwa mu mulilo, no liywi lyenji neli lyalipitula eci shipupo sho meyu oangi aa apupa. ¹⁶ Hime akwatile matungwethzi mutanu na eli mu lyoko lyenji lyo shilyo, no mwele outwe oku no ku kuma watundile mukanwa kenji. Lupala lwenji neli lwatethzima eci liyuwa ko litwa manene. ¹⁷ Ou namumonine amepo niwela ku maulu enji eci munu okufa. Ayepo nipaka lyoko lyenji lyo shilyo no kuniambela ci, ''Lelo wayapa. Yame omatatekeo no mahulelo ¹⁸ oyu yoya. Kuma nafile, unone omone, nayoya kokukna kupwa! kalo nili no kii thzo lifu nolitunga lya afu. ¹⁹ Nehoni on'ole ei onamono, ei iiko pano tuli, nei yakukwamahala mumanyima wei. ²⁰ Eci kwei inaholekiwa ei aimanena mutungwethzi mutanu na eli aa onamono mulyoko lyange lyo shilyo, no malampi mutanu na eli: Matungwethzi mutanu na eli oliyo man'eloi o makeleke mutanu na eli, malampi mutanu na eli oliyo makeleke mutanu na eli.''