¹ Nehoni amepo nimona Lin'eloi limweya lili no okolo ko litunda kuwilu kukeya pashi. Lyavatile livui, ne peulu o mutwi walyo shime pakalile likongolo. Shihanga shalyo neli shalipitula eci liyuwa ne maulu alyo neli alipitula eci ithsini yo mulilo. ² Lyakwatelelile kabukaana mu lyoko lyalyo, ko kuthsikuliwa. Alyopo lilyata pa lukulu lwale ko liulu lyo shilyo no kulyata pa kaye ko liulu lyo shimoo. ³ Nehoni alyopo likuwa ko liywi lyoshokulu eci nyime vuma. Ou lyakuwile, mishika mutanu nathzili athzopo thziamba no maywi athzo. ⁴ Mishika mutanu nathzili ou thzaambile, nafotile ci nin'ole, unone amepo niyuva liywi kutunda kuwilu ko liamba ci, ''Oswaye ei thzinaamba mishika mutanu nathzili. Lelo wain'ola.'' ⁵ Nehoni lin'eloi namonine ko linemana pa likulu lwale no pakaye alyopo liimekela lyoko lyalyo lyo shilyo muwilu. ⁶ Alyopo liethza koyu yoya kuyoyelela, oyu waumbile liwilu nei ilimo yoihe, kaye nei ilimo yoihe, no likulu lwale nei ilimo yoihe, ne lin'eloi alyopo liamba, ''Kakwakukala kuthzihama kalo. ⁷ Unone pa liyuwa elyo lin'eloi lyomushitanu na eli lyakutateka kushika tolombita thzalyo, ei inaholekiwa ya Nyambi kenge yakumaneneniwa, eci eli naambela maywi oawa kwa angamba enji apolofta.'' ⁸ Liywi nayuvile kutunda kuwilu alyopo liamba kukwange kalo: ''Othze, okashimbe buka thzinathsikuliwa ethzi thzili mulyoko lyo lin'eloi linemana paa likulu lwale no pakaye.'' ⁹ Nehoni amepo nithza kwa lin'eloi no kukaliambela ci linipe kabukaana. Alyopo liniambela ci, ''Oshimbe kabukaana okalye. Kenge kalulisha mulila lyoe, unone mukanwa koe kenge kutowala eci oki.'' ¹⁰ Amepo nishimba kabukaana mulyoko lyo lin'eloi no kukalya. Mukanwa kange kwatowalile eci oki, unone munyima thzo kukalya, mulila lyange amopo kulula. ¹¹ Nehoni munu ayepo niambela ci, ''Waloela kupolofita kalo ya anu owangi, matunga, mishovo, no afumu.''