¹ Amepo nipiwa limbungu lilipitula eci mulamu o kutepisha. Amepo niambeliwa ci, ''Okatuke ne otepe tempele thza Nyambi no aletale, nawa analombelanga mo. ² Unone lelo watepa lilapa eli lili pola thzo tempele, mukonda linapiwa ku anu angana. Kenge akulyatangela mbongi pa makumi ane no maonda eli. ³ Kenge nakupa okolo ku mapaki ange eli ci apolofite pa mayuwa 1,260 kwanavata eto yo mathsaka.'' ⁴ Awa mapaki yoliyo itondo ili yo olive no ma lambi eli enema pa lupala lwa Fumu o kaye. ⁵ Ngeci munu po iipisha, kenge kutunda mulilo mutwa to no kutumeka akwathzimbo yo. Munu yomuhe oyu fota kuwakwama omango moliyo akupaiwela kengeyo. ⁶ Awa mapaki ali no okolo o kuyanjela kuwilu ci mvula aloka mu mayuwa apolofita. Ali no oklo okupilula meyu ci piluke onyinga no kufula kaye ko mipambi thzothzihe thzo ukalu ngeci ahima. ⁷ Ne ou amanisha upaki wo, shikondwama shitunda mu liteke lyokupila pandanda kenge sha kutateka mvo kuwalwisha. Ne kenge shakuwatwesha no kuwa paa. ⁸ Ivimbi yo kenge ikala mu mbongi thzoshokulu (Ethzo thziishiwa ci Sodoma no Engepita) omu angongoteliwile Fumu wo. ⁹ Anu wamweya kutunda kwa anu wahe, kutunda ku shikuta shoshihe, kutunda ku mishobo thzothzihe no kutunda ku matunga oahe kenge akulimonena ivimbi yo pa mayuwa ahatu no licika. Kakutawethza ivimbi yo kupakiwa mu mambumbo. ¹⁰ Awa ali mu kaye kenge akuloela kufa ko no kukina. Kenge akulipa ipiwa munu na mungenjenji mukonda awa apolofita eli kuma nahumbisha awa nakala mu kaye. ¹¹ Unone munyima o mayuwa ahatu no licika mwoyo okuyoya wa Nyambi kenge uwaingena ne kenge akukatuka. Awa akuwamona kenge akuyapa nene. ¹² Nehoni kenge akuyuva liywi lyoshokulu kutunda kuwilu ko liamba kokwo, ''Mukanduke mukeye kuno!'' Ne kenge akuthza mu mavui, akwethzimbo yo kwanawatanekela. ¹³ Munyima thzesho shikati kenge kwakua kulinyunga kokukuu ko kaye, ne shipinthzi sho ulikumi ku mbongi kenge shiwa. Anu okukuma pa 7,000 kenge akufa ko kulinyunga ko kaye, ne awa akuyoya kenge akuyapa no kulombela Nyambi o kuwilu. ¹⁴ Kuvindama komushili kunapu. Mumone! Kuvindama komushihatu kwakeya wanguwangu. ¹⁵ Nehoni lin'eloi lyomushotanu na eli alyopo lishika tolombita thzalyo, ne maywi oshokulu aopo amba muwilu kuamba ci, ''Muvuthso o kaye unapiluka muvuthso wa Fumu nou wa Kilesite wenji, ne kenge akuvuthsa kokukana kupwa.'' ¹⁶ Nehoni akulu o makumi eli no ane, awa anakala mu ipula yo yo ufumu pa meho a Nyambi, awpo awisha meho no kulombela. ¹⁷ Awopo aamba, ''Twakukandelela, Fumu Nyambi omukolo, oyu liko noyu wakalileko, mukonda onashimbi okolo woye oshokulu ne onatateka kuvuthsa. ¹⁸ Anu aanjipile, unone uanji woye uneya. Shikati shineya sho kuatula awa anafu ne ci nowe ope muyambo kwa angamba oye apolofita na anu a Nyambi o kukena, nawa nayapa lithzina lyoe, owaonye nawa owakulu. Shikati shoe shinakumu shokuipisha awa aipisha kaye.'' ¹⁹ Nehoni tempele thza Nyambi thzo kuwilu athzopo thziyanjuluka ne aleka thzo kuliyuva athzopo thzimonahala mu tempele. Kwakalile miethso, maywi ouanji, mishika, kulinyunga ko kaye, no mvula omukulu o mawe.