¹ Shimonisha shohsikulu ashopo shimonahala muwilu: mbuyama navata liyuwa, no ngonda mushi thzo maulu enji no huthsi thzo matungwethzi likumi na eli. ² Kuma akalile no lila, ne ayepo kuwa pakueleka, kuyuva kukola ko kuelelka. ³ Nehoni amepo nimona shimonisha shimweya muwilu: Mumone! kuma kwakalile drakone omukulu omukihu oyu wakalile no mitwi mutanu na thzili nomanyiya likumi, nekalo wakalile no mahuthsi o ufumu likumi ku mitwi thzenji. ⁴ Muthsila wenji awopo ufiyele shipinthzi shomushihatu sho matungwethzi kuwilu no kuawishela pa kaye. Drakone ayepo imana pa lupala lwa mbuyama kufota kueleka, ci mwana ou aelekiwa amumine. ⁵ Ayepo eleka mwana o mukwelume, mwanuke o mukwelume, oyu wakuvuthsa matunga oahe ko mulamu o shifu. Wanguwangu mwanenji ayepo shimbiwa kutwaliwa kwa Nyambi no ku shipula shenji sho ufumu, ⁶ ne mbuyama ayepo cilela mu mumbulwa kukutu, oko amuloishelile Nyambi shivaka, ci akanyungeliwe ko pa mayuwa 1,260. ⁷ Honi amopo kukala mvo muwilu. Mikaele no man'eloi enji awopo alwisha drakone, ne drakone no man'eloi enji nawo po alwa. ⁸ Unone drakone kanakala no okolo ne ayepo tweshiwa. Nehoni selikwithsa shivaka shenji no man'eloi enji muwilu. ⁹ Drakone omukulu- alyo liyoka lyo kale liishiwa Diabulosi nji Satani, oyu naangelanga kaye kokahe- ayepo wisheliwa pa kaye, no man'eloi enji aopo awisheliwa pofoci nenji. ¹⁰ Nehoni amepo niyuva liywi lyoshokulu muwilu eli lya ambile ci: ''Honi kuneya kuyoyishiwa no okolo no muvuthso wa Nyambi, no okolo wa Kilesite wnji. Mukonda muka kulundela apetu onawisheliwa pashi. Oyu nawalundelanga pa meho a Nyambi mutanya no ushiku. ¹¹ Anamutwsha ko onyinga wa Nguana no ko liywi lyo upaki wo , mukonda kanahimi mwoyo wo shanga pa kufa ko. ¹² Honine munyanyuke amwe miwilu nawa anatungu mo! Unone kuvindama kwa kaye no likulu lwale, mukonda diavulosi ona ulumuka kukeya kukwenu! Onayala uanji oukulu ne alimuka ci shikati shenji shionye! ¹³ Drakone ou amonine ci onawisheliwa pa kaye, ayepo kacithza mbuyama oyu waelekile mwana o mukwelume. ¹⁴ Unone oyo mbuyama ayepo piwa mando eli o ngonga shokolo eci aundukele ku shivaka analoisheliwa mu mumbulwa kukutu. Oku kuliyo kushivaka aka nyungeliwa, pa shikati shofoci, ikati yoingi, no licika lyo shikati- kutunda popepi na liyoka. ¹⁵ Liyoka alyopo limwaa meyu oangi kutunda mu kanwa kalyo eci lyawa ci aminishe ne amupukishe. ¹⁶ Unone kaye akopo kakwathsa buyama. Kaye akopo kayaamisha kanwa no kumina lyawa eli namwaa liyoka kutunda mu kanwa kenji. ¹⁷ Nehoni liyoka alyopo lingwenyena mbuyama ne alyopo lithza kukalwisha aka mukuta wenji wahe awa ashiyalile, awo amamela mulao wa Nyambi no kukwatelela upaki wa Jesu. ¹⁸ Nehoni drakone ayepo imana pa luheke lo pa n'alo thzo likulu lwale.