¹ Nehoni amepo nimona shikondwama kushitunda mu likulu lwale. Kuma shakalie no manyiya likumi no mitwi mutanu na thzili. Kumanyiya asho kuma kwakalile mahuthsi o ufumu, ne ku mutwi no mutwi kuma kwakaie lithzina lyo kushomolola Nyambi. ² Eshi shikondwama namonine shalipitula eci njoo. Maulu asho alipitula eci maulu o bele, kanwa kasho kalipitula eci kanwa ko nyime. Drakone ayepo shipa okolo wenji, no shipula shenji sho ufumu, no kushitawethza kuvuthsa. ³ Mutwi umweya wesho shikondwama kuma wamonahalile ci unakuluka nene, unone apo nakuluka kunapolo. Kaye kokahe kakomokile ne awopo ashupwela shikondwama. ⁴ Awopo alombela drakone kalo, mukonda onapa okolo wenji o kuendisha kwa shikondwama. Awopo alombela shikondwama, nasho, kalo kwaambanga ci, ''Elye lipitula na shikondwama?'' kalo ''Elye twesha kulwa nasho?'' ⁵ Shikondwama ashopo shipiwa kanwa aka katwesha kuamba maywi o kulishangala no maywi o kushomolola. Kuma nashitawethziwa kuendisha pa makumi ane o myaka no myaka thzili(42). ⁶ Honi shikondwama ashopo shiyahamisha kanwa kasho no kuamba yo kushomolola Nyambi, kushomolola lithzina lyenji no tabanakele, nawa ali kuwilu. ⁷ Shikondwama ashopo shitawethziwa kulwisha anu a Nyambi okukena ne ashopo shiwatwesha. Kalo, kuma nashipiwa okolo okuendisga ikuta yoihe, anu wahe, mishobo thzothzihe no maunga oahe. ⁸ Wahe awa ali pa kaye kenge akushilombela, munu yomuhe oyu lithzina lyenji kalin'oliwole mu buka thzo mwoyo, thza Nguana oyo wapaiwile kutunda apo kaye kashisheliwile. ⁹ Yomuhe oyu li matwi, ayuve. ¹⁰ Ngeci munu analoisheliwa kumuniwa , oyu munu kenge akumuniwa. Ngeci munu onaloisheliwa ku paiwa ko mwele oyo munu kenge apaiwa ko mwele, oyo munu kenge akupaiwa ko mwele. ¹¹ Nehoni amepo nimona shikondwana shimweya eshi shitunda pa kaye. Kuma shakalile no manyiya eli eci mwana lingu, ne kuma nashiamba eci drakone. ¹² Ashopo shikwama ko okolo ouhe wo shikondwama shomutatekelo kukwasho, ne ashopo shikwama kaye kokahe nawa ayoya pa kaye kulombela shikondwama shomutatekelo,- esho nashipolo apa nashikuluka nene. ¹³ Ashopo shikwama ikomokisha yoikulu. Mane ashopo shiwisha mulilo kutunda kuwilu kuwishela pashi anu kwamona. ¹⁴ Ko ei imonisha, ashopo shipiwa okolo kwa shikondwama, ashopo shiangela awo natungu pa kaye, ashopo siwaambela ci akwame shikupulo kukwamena shikondwama- eshi nashikuluka ko mwele, unone shihsiyoya. ¹⁵ Ashopo shipiwa okolo okupa mwoyo ku shikupulo sho shikondwama ci shikupulo shitweshe no kuamba no kuletisha ci wahe awa akana kulombela shikondwama apaiwe. ¹⁶ Kalo ashopo shiootela anu wahe, owaonye nawa owakulu, aka kufuma no ehutu, aka kuliyala no apika, ci atambule nombolo pa lyoko lyo shilylo nji pa lupala. ¹⁷ Kwithsa munu natawethziwa kuula nji kuulisha shime oyu li no nombolo thzo shikondwama, ethzo, palo thziimanena lithzina lyasho. ¹⁸ Ei yaminangula ci munyanyame. Oyu yuvishisha atale palo thzo shikondwama. Mukonda palo thzo munu. Palo thzenji po 666.