¹ Nehoni amepo nimana liwilu lyolipe no kaye kokape, mukonda liwilu lyo matatekelo no kaye ko matatekelo yapwile, ne kokwakukala kalo likulu lwale. ² Amepo nimona mbongi thzothzipe, Jelusalema omupe, kukeya pashi kutunda kuwilu kwa Nyambi, kunaloishiwa eci mwenga naloisheliwa munu wenji. ³ Amepo niyuva liywi lyoshkulu kutunda ku shipula sho ufumu ko liamba ci, ''Omone! shivaka anakalanga Nyambi shili na anu, ne kenge akala no. Kenge akukala anu enji, ne aye yemwa Nyambi kenge akukala no ne kenge akukakala Nyambi wo. ⁴ Kenge akupolola mihothzi ku meho o, Ne kakwakukala kufa kalo, nji kuliyuva unyengwe, nji kulila. Enu yokale inapu. ⁵ Oyu wakalile mu shipula sho ufumu ayepo ambaci ''Omone! Enu yoihe naikwama upe.'' Ayepo amba, ''Oin'ole mukonda aa mayewi asepahala kalo a shemwa.'' ⁶ Ayepo niambela ci, ''Ei enu inakwamahala! Yame Alufa no Omega, matatekelo no mamaneneno. Koyu nafu linotwa kenge nakumupa meyu kokukna kukula mu liviya lyo meyu o mwoyo. ⁷ Oyu twesha kenge akushwana ei enu, ne kenge nakukala Nyambi wenji, ne aye kenge akukala mwanange. ⁸ Unone awa ali no wowa, aka kupila shitawo, aka tuponganyi totumango, aka kupaa, aka luthziho, alothzi, aka kulomela athzimu, naka n'anda wahe, shivaka sho kenge shakukala libiya lyo mulilo o sulufula. Alyo lifu lyomushili.'' ⁹ Lin'eloi limweya ku man'eloi mutanu na eli alyopo likeya kukwange, eli lyakalile no tufuma mutanu natwili tunayala ukalu okumanenena, ne alyopo liamba, ''Okeya kuno. Nikumonishe mwenga, munu wa nguana.'' ¹⁰ Nehoni alyopo linishimba mu mupepo kunitwala ku mukinya oukulu no ule no kunimosha mbongi thzokukena Jelusalema kothzikeya pashi kutunda kuwilu kwa Nyambi. ¹¹ Jelusalema kuma akalile no kutethzima kwa Nyambi, ne kuethsa kwenji eci liwe lyoliwa lili no okwathsi, eci liwe lyo kilisitale jasipe. ¹² Thzakalile no limota lyoshokulu lyo kuthza muwilu no mashelo likumi no mashelo eli, no man'eloi likumi na eli pa mashelo likumi no mashelo eli. Pa mashelo nakun'oliwa mathzina o mikuta likumi na thzili thza ana a Isilaele. ¹³ Kumuvo yuwa kwakalile mashelo ahatu, ku mutulo kwakalile mashelo ahatu, ku mboela kwakalile mashelo ahatu, no ku mutokoyuwa kwakalile mashelo ahatu. ¹⁴ Limota lyo mbongi lyakalile napa alishishile po likumi no twili, ne pakalile mathzina apositola likumi na apositola eli a nguana. ¹⁵ Oyu wambile nange kuma akwatile mulamu o gauda o kutepisha mbongi, mashelo athzo, no mamota athzo. ¹⁶ Mbongi thzakalile no mapeta ane; ule wathzo walipitulile no wipi wathzo. Ayepo tepa mbongi no mulamu wenji o kutepisha, ita likumi no ita ili(12,000) yo mulamu o kutepisha (ule wathzo, wipi wathzo no muwilu wathzo neli kwakuma pofoci). ¹⁷ Ayepo tepa kalo limota thzalyo, 144 mu ukulu kuthza ko kutepa ko munu(oku kulipitula no mutepelo o lin'eloi). ¹⁸ Limota kuma naliumbiwa no mawe o jasipe ne mbongi athzo thza gauda thzokukena, eci shiponi shokumonahala. ¹⁹ Apa napa shishiwa limota kuma nakuloishiwa no mawe oawa oahe. Lyomutatekelo neli jasipe, kuhatoko lyo safire, lyomushihatu neli kalisedo, lyomushine neli emaraldi, ²⁰ lyomushitanu neli onikisi, lyomushitanu na lyofoci neli kaneliani, lyomushitanu na eli neli kirisoliti, lyomushitanu na hatu neli berili, lyomushitanu na ene neli topathzi, lyo ulikumi neli kirisopurasi, lyo ulikumi na lyofoci neli jasinithsi, ne lyo ulikumi na eli nei amethsisiti. ²¹ Ikwalo likumi na ili kuma yakalile yo lipelela; shikwalo no shikwalo kuma shakwamiwile pa pelela thzofoci. Makun'wa o mbongi neli a gauda thzokukena, eci shiponi shimonahala shuwana. ²² Kananimono tempele mu mbongi, mukonda Fumu Nyambi omukolo na Nguana woliyo tempele thzo mbongi. ²³ Mbongi kanathzifoto kalo liyuwa nji ngonda ci kukale mwethzi mukonda kutethzima kwa Nyambi kwa ethsile mu mbongi, ne lampi thzenji po nguana. ²⁴ Matunga kenge aenda ko mwethzi wethzi mbongi. Mafumu o mu kaye kenge aleta mo kutethzima ko. ²⁵ Ikwalo yathzo kaya kuyanjeliwa mutanya, ne kakwakula ushiku. ²⁶ Kenge akuleta mo kutethzima no lilema ko matunga, ²⁷ unone kwithsa yokukana kukena eshi shakuingena mo, nji munu yomuhe okukwama omango nji munu o n'anda, unone shime awo anan'oliwa mathzina o mu buka thza Nguana thzo mwoyo.