¹ Nehoni amepo nimona lin'eloi likeya kutunda kuwilu. Kuma lyakalile no kii thzo ku liteke lyokupila pandanda, kalo kuma lyakwatile liwenge lyolikulu mu lyoko lyalyo. ² Alyopo likwata drakoni, liyoka lyo kale aye diavulosi no satani, no kumuanga ita likumi yo myaka(1000). ³ Alyopo limukonjela mu liteke lyokupila pandanda. Alyopo liyanjela ku liteke no kukiya ko. Ei kuma yakwamahalile kengeya ci katele angele matunga kalo shime kukumena pa ita likumi(1000) yo myaka apathzipwa. munyima weyo, kenge akuangululiwa pa shikati shoshionye. ⁴ Nehoni amepo nimona ipula yo ufumu. Awa akalile mo awa napiwa okolo o kuatula. Kalo amepo nimona myoyo thzawa atetiwile mitwi mukonda wo upaki wa Jesu no liywi lya Nyambi. Kanalombelenga shikondwama nji shihanga shasho, kalo akanine kutambula nombolo pa lupala nji pa lyoko. Awopo ayoya, ne awopo avuthsa na Jesu ita likumi(1000) yo myaka. ⁵ Awa anafu awa ashiyalile wahe kapindukile shime ita likumi(1000) yo myaka ko inapu. Oku koliyo kupinduka ko matatekalo. ⁶ Ali no fiyathzi no kukena wahe awa aliwana mu kupinduka ko matatekelo! Lifu lyomushili kalili no okolo peulu thzo. Kenge akupiluka apulisita a Nyambi na Jesu ne kenge akuvuthsa nenji myata likumi(1000) yo myaka. ⁷ Munyima o kupwa ko ita likumi(1000)yo myaka, satani kenga akutundishiwa mu kamenga kenji. ⁸ Kenge akuthza kukahongaula anu mu mapeta ane o kaye-Gogo no Magogo- kuwawaneka pofoci kuwawanekela mvo. Kenge akuvula eci luheke lo mu likulu lwale. ⁹ Awopo athza mu ule wo lyanda lyo kaye no kukathziluka ana Nyambi okukena- mbongi thzihimiwa nene. Unone muilo awopo utunda kuwilu kanawamanisha wahe. ¹⁰ Satani, oyu wawahongaulile, ayepo konjeliwa mu liviya lyo mulilo wo silufula, omo akonjeliwile shikondwama no apolofita o n'anda. Kenge akunyandishiwa mutanya no ushiku kokukana kupwa. ¹¹ Nehoni namonine shipula sho ufumu shoshikenu noyu nakongongomana mo. Kaye no liwilu yacilile apa akaile, unone kayawanine shivaka kokuthza. ¹² Amepo nimona akakufa- wowakulu nawa owaonye- kwanemana pa lupala lo shipula sho ufumu, ne mabuka aopo athsikuliwa. Nehoni buka thzimweya athzopo thzithsikuliwa- buka thzo moyo. Akakufa kuma aatuliwile kwei inan'oliwa mu mabuka kuthza ko ekwama yo. ¹³ Likulu lwale alyopo lihusha akakufa awa akalile mo. Lifu no malalo ayopo ihusha akakukfa awa akalile kukwayo, ne akakufa awopo aatuliwa kuthza ko ekwama yo. ¹⁴ Lifu no malalo ayopo ikonjeliwa mu liviya lyo mulilo . Eli lyoliyo lifu lyomushili- liviya lyo mulilo. ¹⁵ Ngeci po lithzina lyo munu kaliwaniwile mu buka thzo mwoyo, oyo munu kuma akonjeliwile mu liviya lyo mulilo.