¹ Munyima thzoi enu amepo niyuva ei yayuvahalile eci liywi lyolikulu lyo anu owangi muwilu wawa aisha, ''Aleluya! kuyoyisha, kutethzima, no okolo ya Nyambi wetu. ² Miatulelo thzenji thzashemwa kalo thzinaloo, mukonda onaatula muka luthziho shokulu oyu nepisha kaye luthziho lwenji. Onamukulisha onyinga wa angamba enji.'' ³ Awopo amba lo mushili: ''Haleluya! Mushi watunda kukwe kokukana kupwa.'' ⁴ Akulu o makumi eli na ane (24) no iumbiwa ine yokuyoya awopo atongama pashi kulombelo Nyambi, oyu wakalile mu pa shipula sho ufumu. Awopo amba ci, ''Ameni. Haleluya!'' ⁵ Nehoni liywi alyopo litunda kushipula sho ufumu, kuamba ci, ''Mushangale Nyambi wetu, mwahe amwe angamba enji, amwe mumuyapa, owaonye nawa owakulu wahe.'' ⁶ Nehoni amepo niyuva kuvuma eci liywi lya anu owangi eci shipupo sho meyu oangi kalo eci kuvuma ko mushika, kuamba ci, ''Haleluya! Mukonda Fumu aendisha, Nyambi wetu, Omukolo. ⁷ Tuhune no kunyanyuka ne tumushangale! Mukonda mukiti o kuyomeka wa nguana unakumu, ne mwenga wenji onaliloishela. ⁸ Onatawethziwa kuvata eto yo line yoikenu yoiwa'' (mukonda eto yoiwa yoliyo ekwama yoiwa ya anu a Nyambi). ⁹ Lin'eloi alyopo liamba kukwange, ''On'ole ei: ''Ali no fiyauthzi awa anakumuniwa ku mukiti o kuyomeka wa nguana.'' Ayepo niambela kalo ci, ''Aa maywi ashemwa a Nyambi.'' ¹⁰ Amepo niwela pashi ku maulu enji kumulombela, unone ayepo niambela ci, ''Lelo wakwama kengeyo! Name no ngamba eci yowe kalo no mwapoe oyu nakwata upaki wa Jesu. Olombele Nyambi, mukonda upaki wa Jesu woliyo mupepo o shipolofita.'' ¹¹ Nehoni amepo nimona liwilu ko liyanjuluka, ne amepo nitaneka kuma kwakalile kakambe kokakenu. Oyu nakathzini eshiwa okusepahala no shemwa. Kuatula kwenji no kulwa kwenji kwa kuluka. ¹² Meho enji alipila eci malimi o mulilo, ne ku mutwi wenji kuli mahuthsi oangi o ufumu oli no lithzina linan'oliwa kukwenji lyokukana kulimuka munu yomuhe shime aye shinda. ¹³ Onavata shikoveyo sho kumbwateka mu manyinga, ne ithzina lyenji aeshiwa ci Liywi lya Nyambi. ¹⁴ Mashwalale o kuwilu kuma amushupwelile pa tukambe totukenu, kwanavata line omuwa, omukenu no kukena. ¹⁵ Mukanwa kenji kwapunine mwele outwe ou afula matunga nao ne kenge akuwavuthsa no mulamu o shifu. Kenge akuwalyatangela mu shiluvelo sho veine sho uanji wa Nyambi shokolo. ¹⁶ Oli no lithzina linan'oliwa pa shikoveyo shenji no pa litambaulu lyenji: ''Fumu o mafumu no Muendishi o aendishi.'' ¹⁷ Amepo nimona lin'eloi kolinemana mu mutanya. Alyopo liisha ko liywi lyoshokulu inyunyi yoihe ei iunduka muwilu, ''Mukeya, muliwane pofoci ku mukiti oshikulu wa Nyambi. ¹⁸ Mukeya namulye nyama thzo mafumu, nyama thzakakuendisha mashwalale, nyama thza anu owakolo, nyama thzo tukambe nawa anatuthzini, no nyama thza anu wahe, aka kuliyala na apika wahe, owaonye nawa owakolo.'' ¹⁹ Amepo nimona shikondwama no mafumu opa kaye no mashwalale oo. Aliwana pofoci ci alwishe oyu nathzini pa kakambe no mashwalale enji. ²⁰ Shikondwama ashopo shikwatiwa, kalo pofoci no shokondwama okopo kukwatiwa mupolofita o n'anda oyu nakwamanga emonisha pa meho enji. Ko ei imonisha ona angela owangi awa natambula nombolo thzo shivatana no kulombela shihanga shenji. Muwili wo awopo akuheliwa kwayoya mu libiya lyo mulilo o sulufula. ²¹ Wahe awa ashiyalie awopo apaiwa ko mwele ou nautundu mukanwa koyu nathzini pa kakambe. Inyunyi yoihe ayopo ilya nyama thzo ivimbi yo.