¹ Munyima thzo eyi enu namonine lin'eloi limweya kolitunda kuwilu kukeya pashi. Lyakalile no okolo oukulu nene, ne litunga lyamonahalile ko kutethzima kwalyo. ² Alyopo likuwa ko liywi lyolikulu kuamba ci, ''Onau, onau Babilona shokulu! Onapiluka liumbo lya athzimu, kamenga ko mipepo thzo mathzilo, no inyunyi yokukana kulya. ³ Mukonda matunga oahe ananu ku waine o luthziho lwenji. mafumu opano pa kaye anakwama lithziho nenji. Akakuuulisha opano pa kaye ana fumu kutunda pa mukalelo wenji o luthziho.'' ⁴ Ne amepo niyuva liywi limweya kutunda kuwilu ko liamba ci, ''Mutunde kukwenji anu ange, eci mwatambula kushivi shenji, ne ci mwatambula shimweya ku okalu wenji. ⁵ Ivi yenji inaungumana kukakuma kuwilu, ne Nyambi onavuluka ekwama yenji yoimango yoihe. ⁶ Mumuhushele omango eci eli anahushela angenjenji naye, ne mumuhushele lwili ku ekwama yenji; mu nganja ananwishanga angenjenji mumunwishe mo lwili. ⁷ Eci eli alishangalile aye shinda no kuyoya mu shihuno, mumupe manene makando no kulila. Mukonda aliambela aye shinda mu mucima wenji, 'Ninakala eci fumu o mbuyama; kali no lifakathzi, ne kana kulila.' ⁸ Honine liyuwa limweya okalu wenji kenge wakukeya: lifu, kulila, no njala. Kenge akupya ku mulilo, mukonda Fumu Nyambi mukolo kalo yoiliyo muka kumuatula.'' ⁹ Mafumu opano pa kaye awa anakwama yo luthziho nenji no kuendisha nenji kenge akumulila kumbolomoka apa akumona mushi o kupya kwenji. ¹⁰ Kenge akuimanena kukole kuyapa makando enji, kwa amaba ci, ''Mamoo, mamoo liulmbo lyolikolo, Babilona, liumbo lyolikolo! Mushika shoshonye kashiliko koe kaneya.'' ¹¹ Aka kuulisha omuno mukaye amulila no kuyuva ongunga mu micima mukonda kwithsa oyu ulanga miulo thzo kalo- ¹² akakuulisha gauda, silivera, mawe omawa, lipelela eto yo line thzothziwa omwawa oshi fumu, shiliki no okihu no etondo yokunuka shuwa yoihe no enu yoihe yo manyiya o ndambi, nei inakwamiwa pa etondo yoiwa yoihe, yo kopa, ifu no mamabulu, ¹³ shinamoni, yo kunuka shuwa, insense, mira, furankincense, waine, mathzi, oshunga, uloto, ngombe no mangu, tukambe no makoli no elama no myiyo thza anu. ¹⁴ Oshuka unafoto mucima woe unakushii. Yoiwa nokala nayo no kumonahala uwa inapu, kayakuwaniwa kalo. ¹⁵ Akwa kuulisha ei enu awa nafumu ko aye kenge akuimanena kokule nenji mukonda ayapa makando enji kwa lila no kumbolomoka nene. ¹⁶ Kenge akuamba, '' Mamoo, Mamoo, mbongi thzothziwa ethzi nathzivata eto yoiwa, yo ikihu, no ohunga onthzilu, kalo kuma akavishile ko gauda, mawe omawa, no lipelela! ¹⁷ Mushikati shoshonye lufumo loluhe lunepa.'' Wahe aka kuendisha isepe yoshokulu na aka kufundawethza miulo mu likulu lwale no akwa kuendisha no waya awana moyo wo wa kutunda mu likulu lwale aimanena kokule. ¹⁸ Awopo alila kwamona mushi o kupya kwenji. Awopo aba ci, ''Thzipi mbongi thzo kukuma pethzi mbongi thzothzikulu?'' ¹⁹ Awopo alithzukululela likungu ku mitwi thzo, kulila no kumbolomoka, ''Mamoo, mamoo mbongi thzothzikulu ethzo wahe awa nakala no isepe mu likulu lwale nawana lufumo kutunda ku lufumo lwenji. Ambene mushikati shoshonye onepa.'' ²⁰ Munyayuke, owe liwilu, amwe anu okukena, apositola na apolofita, mukonda Nyambi oanaleta kuatuliwa kwenu papenji!'' ²¹ Lin'elio linapiwa okolo alyopo lishimba liwe lyokulipitula eci shimanya no kulikuhela mu likulu lwale, alyopo liamba ci, ''Omu moliyo, Babilona , mbongi thzoshokulu, kenge thza kuwa ko kulwa ne kathzakumonahala kalo. ²² Maywi akakushika harepa, aka kuimba, aka kushika mu manyiya o ngombe, nakakushika matolombita kakuyuviwa kalo kukwenu. Kwithsa liywi lyo enu shokushika eli lyakuyuvahala kalo kukwenu. ²³ Mwethzi o nguana kawa kumonahala kukoe kalo. Liywi lya mukakuyeka na mwenga kalya kuyuvahala kukoe kalo, mukonda aka kuulisha oe neli ana o mafumu opano pa kaye, ne matunga kuma naangeliwa ko olothzi woe. ²⁴ Onyinga wa apolofita na anu a Nyambi o kukena unawaniwa kukwenji, no onyinga wa anu wahe awa napaiwa pano pa kaye.