¹ Lin'eoi limweya kwao man'eloi akwatile tufuma mutanu na twili alyopo likeya kukwange no kunaniambela ci, ''Okeye, Nikumonishe apa kuatuliwa mbuyama o luthziho nene oyu nakongomana pa meyu oangi, oyo akwamine neji yo lithziho mafumu o pa kaye, ² ne no waine wenji o luthziho oyu apendile awa anatungu mu kaye. ³ Nehoni lin'eloi alyopo linishimba mu mupepo kunitwala mu mumbulwa kukutu, ne amepo nimona mbuyama nakongomana pa shikondwama shoshikihu eshi shinayala mathzina o kushomolola. Esho shikondwama kuma shkalile no mitwi mutanu na thzili no manyiya likumi. ⁴ Oyo mbuyama kuma avatile eto yo undilu no ukihu, kunaloishiwa shuwana no gauda, mawe oawa, no lipelela. Kuma akwatelelile nganja thzo gauda mulyoko lyenji ethzi thzinayala enu yoimango no mathzilo o luthziho lwenji. ⁵ Pa lupala lwenji kuma nakun'oliwa lithzina, inu inaholekiwa: ''Babilona shokulu, mama waka luthziho no enu yoimango yo mu kaaye.'' ⁶ Amepo nimona ci oyo mbuyama kuma apendile onyinga wa anu a Nyambi okukena no onyinga o mapaki a Jesu. Ou namumonine kuma nakomokile nene. ⁷ Unone lin'eloi alyopo liniambela ci, ''Ine okomoka? Kenge nikutongwela ei inaholekiwa ya mbuyama nei yo shikondwama shinamushimbi, esho shikondwama shili no mitwi mutanu na thzili no manyiya likumi. ⁸ Eshi shikondwama onamono kuma shakalileko, ne kashilko honi, ne panopano shitunde mu liteke lyokupila pandanda. Nehoni kenge shithza kukuipishiwa. Awa anatungu pa kaye awa anakana kun'oliwa mathzina oo mu buka thzo mwoyo shimbi katatekelile kano kaye- kenge akukomoka nene apa akumona shikondwama, mukonda kuma shakalileko, honi kashiliko, unone kenge shakukeya. ⁹ Ei po kunangula awa ali no unyanyami. Ethzo mitwi mutanu nathzili thzoliyo mikinya apa anakongomana mbuyama. ¹⁰ Nawo kalo mafumu mutanu na eli. Mafumu mutanu anau, yofoci kwali, ne yumweya oshime kukeya, ne ou akeya kenge navuthsa shika shoshionye. ¹¹ Shikondwama eshi shaaklileko, ne kashiliko honi, unone yoliyo fumu omushitanu no ahatu. Naye awela ku mafumu mutamu na eli. Ne athza kukuipishiwa. ¹² Manyiya likumi onamono oliyo mafumu likumi awa ashime kushwana ufumu, unone kenge akutambula okolo ou fumu pa shikati shofoci pofoci no shikondwama. ¹³ Awo kenge ahuka kofoci, ne kenge apa okolo no ufumu wo ku shikondwama. ¹⁴ Kenge akulwisha Nguana. Unone Nguana kenge akuwatwesha mukonda yoliyo Fumu o mafumu no mukakuendisha waaka akakuendisha- ne awo ali nenji woliyo anaishiwa, awa anahanguliwa, no awa asepahala.'' ¹⁵ Lin'eloi alyopo liniambela ci, ''Meyu onamono, apa anakongomana mbuyama o luthziho, woliyo anu, mbunga, no matunga, no mishobo. ¹⁶ Manyiya likumi aa onamono- awo no shikondwama kenge akuthzimba mbuyama o luthziho. Kenge akumunyanga ei ali nayo no kumuhulula eto, Kenge akulya nyama thzenji, ne kenge akumutumeka no mulilo. ¹⁷ Mukonda Nyambi onaipaka mu micima thzo ci akwame ei afota ko kuwakwama ci atwe kupa shikondwama okolo wo kuendisha kukakumena apo maywi Nyambi akuliyalishelela. ¹⁸ Mbuyama onamono tholiyo mbongi thzoshokulu ethzi thzili no okolo o kuendisha mafumu o mukaye.''