¹ Amepo niyuva liywi lyoshokulu kutunda mu tempele eli liambela man'loi mutanu na eli ci ''Muthze mukamwaele pa kaye tufuma mutanu na twili to uanji wa Nyambi.'' ² Lin'elio lyomutatekelo alyopo lithza kukamwaela kafuma kalyo pa kaye; ilonda yoimango no kukola ayopo imena anu akalile no nombolo thzo shikondwama, awa nalomelanga shikupulo shahso. ³ Lin'eloi lyomushili alyopo limwaela kafuma kalyo mu likulu lwale. Likulu lwale alyopo lupiluka onyinga eci onyinga o munu okufa, ne yoihe yokuyoya inakalanga mu likulu lwale ayopo ifa. ⁴ Lin'eloi lyomushihatu alyopo limwaela kafuma kalyo mu mawa no mu maweluwelu o meyu, ne ayopo ipiluka onyinga. ⁵ Amepo niyuva lin'eloi lyo meyu ko liamba ci, ''Omukakuluka- owe liko owe wakalile ko, okukena- mukonda onaatula ei enu. ⁶ Mukonda kuma amwaile onyinga wa anu a Nyambi o kukena na apolofita, onawapa onyinga ci anwe; yoliyo iwaloela.'' ⁷ Amepo niyuva aletare kothzitawa, ''Eee, Fumu Nyambi shokolo, miatulelo thzoe thza shemwa no kuluka.'' ⁸ Lin'eloi lyomushine alyopo limwaela kafuma kalyo pa liyuwa, ne alyopo lipiwa kutumeka anu no mulilo. ⁹ Awopo atumekiwa ko kupya kokulu nene, ne awopo ashomolola lithzina lya Nyambi, oyu li no okolo pou ukalu. Kanahumbu nji kumulombela. ¹⁰ Nehoni lin'eloi lyo ushitanu alyopo limwaela kafuma kalyo pa shipula sho ufumu sha shikondwama, ne milema athzopo thzisika muvuthso washo. Anu awopo alihuma pa malimi mukonda o kukola. ¹¹ Awopo ashomolola Nyambi okuwiu mukonda o kukola kwo no ilonda, ne ashikana kuhumbela ekwama yo. ¹² Lin'eloi lyomushitanu na lyofoci alyopo limwaela kafuma kalyo mu lyawa lyoshokulu, lya Eufureti. Meyu alyo aopo akukuta kuloishela mafumu atundu ku mumvoyuwa likun'wa. ¹³ Amepo nimona mipepo thzihatu thzo mathzilo ethzi thzamonzhali eci mambotwe aa atundile mukanwa ka drakone, no mukan'wa ka shikondwama, no mukanwa ko mupolofita o n'anda. ¹⁴ Mukonda thzoliyo mipepo thzo madimona ethzi thzinakwamanga imonisha ikomokisha. Kuma nathzithzi ku mafumu oahe o pa kaye kukawawaneka pofoci kuwawanekela mvo thzo paliyuwa lyolikulu lya Nyambi shokolo. ¹⁵ (''Mumone! nakeya eci mwithzi! Oli no fiyauthzi oyu tatelela, oyu tuleka eto yenji ci katele aende shin'ekan'eka ne ci anu lelo amona honyi thzenji.'') ¹⁶ Athzopo thziwawaneka pofoci pa shivaka shiishwa mu Shiheru ci Armageddoni. ¹⁷ Nehoni lin'eloi lyomushitanu na eli alyopo limwaela kafuma kalyo mu muwilu. Nehoni liywi alyopo liyuvahala kutundelela mu tempela no ku shipula sho ufumu, kuamba ci, ''Kunakwamahala!'' ¹⁸ Kuma kwakalile myethzo, maywi ouanji, mishika, no kulinyunga ko kaye kokukulu nene- kulinyunga kokukulu kupita kulinyunga ko kaye kunakwamahalanga kokuhe anu shimbi atatekela kukala pano pa kaye, oku kulinyunga ko kaye neli kukulu nene. ¹⁹ Mbongi thzoshokulu athzopo thziiyatula luhatu pakaci, ne mambongi o mu matunga awopo awa. Nehoni Nyambi ayepo buluka Babilona shokulu, ne ayepo nwisha ethzi mbongi mu nganja thzinayala waine tunda pa uanji wenji. ²⁰ Makanda oahe aopo acila, ne mikinya kanathziwanahala kalo. ²¹ Mawe o mvula oakulu, aa ali no ulemu eci talenta, aopo aloka kutunda kuwilu kuwela anu. Anu awopo ashomolola Nyambi omomu ukalu o mawe mukonda oo ukalu neli ukulu nene.