¹ Nehoni lin'eloi alyopo linimonisha lyawa lyo meyu o mwoyo, lyo kukena eci kilisitale. Eli nalitundelela ku shipula sho ufumu sha Nyambi noku kwa Nguana ² pakaci ko likun'wa lyo mushikun'a. Mu mambali o lyawa kwakalile shitondo sho mwoyo, eshi shiima mipambi likumi na thzili zo ushuka, ne sha ima oshuka washo ngonda no ngonda. Mamuna esho shitonda akupolisha matunga. ³ Kakwakukala kalo shikuto. Shipula sho ufumu sha Nyambi neshi sha Nguana kenge yakukala mu mbongi, ne angamba enji kenge akumukwamena. ⁴ Kenge akumona lupala lwenji, ne lithzina lyenji kenge lyakun'oliwa pa lupalo lwo. ⁵ Kakwa kukala ushiku kalo; kakufota kalo mwethzi o lampi nji o liyuwa mukonda Fumu Nyambi kenge akuethsa kuko. Kenge akuvuthsa ko kukana kupwa. ⁶ Lin'eloi alyopo liniambela, ''Aa maywi asepahala ne ashemwa. Fumu, Nyambi o mipepo thza apolofita, onatumu lin'eloi lyenji kunamonisha angamba enji ei yakukwamahala kuposho.'' ⁷ ''Omone panopano nikeye! Oli no fiyauthzi munu yomuhe oyu mamela shipolofita shomu mu buka.'' ⁸ Ame, Joani, yame naniyuvu no kumona ei enu. Ou naniiyuvu no kuimona, amepo niwela pashi ku maulu alyo no kulombela eli lin'eloi nalinimosha ei enu. ⁹ Alyopo liniambela, ''Waikwama eyo! Name no ngamba eci yowe, na apoe apolofita, na anu wahe awa amamela maywi omu mu buka. Olombele Nyambi!'' ¹⁰ Nehoni alyopo liniambela ci, ''Lelo wapaka liswayo pa maywi o shipolofita yomu mubuka, mukonda shikati shili popepi. ¹¹ Oyu kwama omango atwalele kukwamam omango. Oyu yoya uyoye o mathzilo atwalele kuyoya uyoye o mathzilo. Oyu kwama ko kuluka atwalele kukwama kuluka. Okukena, aatwalele kukala okukena.'' ¹² ''Omone! Panopano nikeye. Muyambo wange uli kukwange, kunapa munu no munu kuthza ko ekwama yenji. ¹³ Yame Alufa no Omega, o kutanga no mamaneneno, omatatekelo no mahulelo. ¹⁴ Ali no fiyauthzi awa ahupa eto yo ci apiwe kuloela kulya ku shitondo sho mwoyo no kukengena mu mashelo o mbongi. (Kupita kun'oliwa ci, ''Awa ahupa eto yo.'' Man'olo amweya okale o Agerike anan'oliwa ci, ''Awa akwama milao thzenji). ¹⁵ Pola po kenge kushiyala mbwa, alothzi, o luthziho, aka kulombela athzimu awa ahima no kukwama yo n'anda. ¹⁶ Ame, Jesu, ninatumu lin'eloi lyange kunaamba ei enu kukwenu yo keleke. Yame muthzithzi no mwana David, lilungwe lyo mashikushiku.'' ¹⁷ Mupepo no mwenga awopo amba ci, ''Okeye!'' Yomuhe oyu yuva ambe ci, ''Okeye!'' Yomuhe nafu linotwa, akeye, ne yomuhe oyu hima, alinwene pohuma ku meyu o mwoyo. ¹⁸ Naamba kumunu yomuhe oyu maywi yuva o shipolofita shomu mu buka: Ngeci munu po paka ku maywi o shipolofita ali omu mu buka Nyambi kenge amupakelako ku ukalu wenji unan'oliwa omu mu buka. ¹⁹ Ngeci munu po tundisha kumaywi oshipolofita anan'oliwa omu mu buka Nyambi kenge atundisha shipathsi yenji ku shitondo sho mwoyo no mumbongi thzo kukena inan'oliwa omu mu buka. (Man'olo amweya okale anan'oliwa ci, ''Nyambi kenge atundisha shipathsi shenji mu buka thzo mwoyo no mu mbongi thzo kukena inan'oliwa omu mu buka.''). ²⁰ Oyu naamba ei anu amba ci, ''Eee! Panopano nikeye.'' Ameni! Okeye, Fumu Jesu! ²¹ Shihemo sha Fumu Jesu shikale na anu wahe. Ameni. (Man'olo amweya okale o shigerike anan'oliwa ci, ''Shikale nenu anu a Nyambi o kukena. Ameni.).