¹ Honi shanga kuliyuva kokutanga nakukala no milao thzo kulandelela pa kulombela kalo kwalile shivaka shokenu shopano pa kaye(shivaka sho kulombelela eshi akwamine anu). ² Mukonda Tabanakele kuma thza loishiwile. Munjiyo thzo mutatekelo omu kwakalile shipula sho lampi, methsa, no eshima ei akwamenine Nyambi, ashiishile ci shivaka shoshikenu. ³ Kunyima thzo shito sho mushili kwakalile njiyo thzimweya mu tabanakele, ethzi nathzi ishiwa ci shivaka shokukene nene. ⁴ Kuma kwakalile katala ko gauda apa atumekelangile insense. Kwakalile kalo aleka thzo kuliyuva, ethzi apakile nene gauda. Mukaci kathzo kuma kwakalile kanyungu ko gauda omu mwakalile manna, shivanzi sha Aruni eshi shashoshelile, no mapala apa kwan'oliwile milao thzo kuliyuva. ⁵ Peulu thzo aleka thzo kuliyuva, pakalie kelubimi okutethzima oyu wathsikelelile muhuko, ei katutwesha kuiamba ko kuyala pano. ⁶ Apa yapwile kuloishiwa, apulisita shikati shoshihe shime aingenagile munjiyo thzo mutatekelo kukakwama ekwama yo. ⁷ Unone shime mupulisita shokulu yoliyo waingenangile munjiyo thzo mushili, lofoci mumwaka no mwaka, kalo kali kokupila onyinga ou analeta kulikenisha ku ivi yenji no ivi ya anu ei nakwamanga kokukana kulimuka. ⁸ Mupepo oukenu wamonishile ci amona tabanakele thzo mutatekelo shimbi thzaimanena mulikun'wa shivaka shoshikenu nene shihsime kumonahala. ⁹ Apa neli kumonahalisha shikati shopano tuli. Mbuyo no itabelo ei yapiwangile kayatweshile kukenisha micima thzakakulombela. ¹⁰ Atwala pohuma maano ku ilya nei yokunwa no mikiti thzo kulihupa thzo kulishiyashiya, milao thzo elama shime kukakuma pa shikati sho mulao oupe. ¹¹ Kilesite nakeya aye mupulisita shokulu wenu yoiwa ei inakeya. Onapiti mu tabanakele thzothzikulu, no ukenu nene kathza kwamiwile ko moko a anu, ethzo kali thzapano pa kaye aka kaombiwile. ¹² Kali thzo onyinga o membe no manamani, unone ko onyinga wenji shemwa ou enegena mu shivaka shoshokenu nene mwendo ofoci pohuma no kutuwanena mwoyo okukana kupwa. ¹³ Mukonda ngeci unyinga o membe no mapoho no kukumwena mutwiti o mangomwani kwawa akwamine shivi yakenisha elama yo, ¹⁴ honi onyinga wa Kilesite, oyu walipile ko mupepo okukana kupwa kwa Nyambi, kenge ukenisha micima thzetu ku ekwama yoimango ci tukwamene Nyambi oyu yoya kukuma papi? ¹⁵ Ko livaka lyei, yoliyo mukakuimanena kuliyuva kokupe. Ei kuma yakalile kengeya ci, kufa kwenji kuyoishe awa nakala mu kuliyuva komutatekela ku umango nakwama, awa aishiwa kenge atambula shikulupelisho sho kushwana mwoyo kokukana kupwa. ¹⁶ Mukonda kulaa kwa mufu, kufa koyo munu nalaa kwaloela kulimukiwa. ¹⁷ Mukonda kulaa ko mufu kuli no okwathsi ngeci aye nalaa onafu, mukonda kulaa ko mufu kwithsa ei kutwesha kukwama ngeci oyu nalaa oshiyoya. ¹⁸ Honi shanga kuliyuva ko mutatekelo kanakukwamiwa kokupila onyinga. ¹⁹ Mukonda Mushe ou amanine kupa ituminino yoihe mu mulao kwa anu, washimbile onyinga o manamani no membe,no meyu, no hunga ou kihu, no hosipa, kushamwena pa man'olo shemwa no kushamwena anu. ²⁰ Nehoni ayepo amba ci, ''Ou oliyo onyinga o kuliyuva ou anamitumina Nyambi.'' ²¹ Ko kulipitula, washamawelile onyinga pa tabanakele no paitenga yoihe alikwathsishile omo muikwama(mukulombela). ²² Kuthza ko mulao, enu yoihe yakenishiwa ko onyinga. Kokupila kumwala onyinga kwithsa otetelo o milandu. ²³ Honine nakuloo ci ikupulo yo enu ili kuwilu ikenishiwe ko ei itavelo yo iyama. Shanga kengeyo, enu yokuwilu ayopo kuma naikenishiwa ko itavelo yoiwa kupita eyo. ²⁴ Mukonda Kilesite kanaingena mushivaka sho kukena nene eshi shakwamiwile no moko, esho po shikupulo pohuma sho shinu sho shemwa. Unone kuma aingenine muwilu shemwa, kukalimonahalisha honi kwa Nyambi kuimanena yatwe. ²⁵ Kathzileko ci aka lipe yoshinda miendo thzothzingi, eci eli anakwamanga mupulisita omukulu, oyu waingenangile mushivaka shohsikenu nene mwaka no mwaka no manyinga o unu wawo. ²⁶ Ngaci moliyo nakukalela kengeyo, nga onanyandishiwa lolungi kutunda apa katatekelile kaye. Unone onamonahala kuhula o myaka kunamana shivi ko kulininga shitavelo aye shinda. ²⁷ Eci munu eli anapiwa kufa lofoci, ne munyima kwakeya katulo, ²⁸ honi naye, Kilesite kuma alipile lofoci kunamana ivi ya anu owangi, ne kenge akumonahala lomushili, kali kunamona yo shivi, unone kunayoyisha awa anamutatelela.