¹ Mukonda mulao po mumbule pohuma wo enu ei nga ikeya, kali woliyo mumonahalelo weyo enu shemwa. Awa afota Nyambi katwesha kukenishiwa ko itavelo nakwatelela kulenga apulisita mwaka no mwaka. ² Nga kengeyo, ei itavelo nga kanashii kuikwamanga? Mukonda akwa kulombela nga nakenishiwa lofoci kalo nga kanalimonga ci ali no shivi. ³ Unone eyo itavela neli ya kulivulukishanga ivi mwaka no mwaka. ⁴ Mukonda kakutawa ci onyinga o mapoho no membe utundishe shivi. ⁵ Kilesite ou akeile muno mukaye, kuma ambile ci, ''Itavelo no nupu konoihimi, unone onaniloishela elama, ⁶ nupu thzo kutumeka no nupu thzo ivi konoiloela. ⁷ Nehoni amepo niamba ci, 'Omone, yamono- eci eli kuna n'oliwa yange mu lin'olo- nakeya kunakwama ei ohima, Nyambi.''' ⁸ Kumatatekelo wambile ci, ''Kali itavelo, nji nupu, nji nupu thzo kutumeka thzothzihe, nji nupu thzo shivi ei wahimine. Shanga kuloela konoiloela.'' Ei yoliyo itavelo ipiwa kuthza ko mulao. ⁹ Nehoni ayepo amba ci, ''Omone, yamono nakeya kunakwama ei ohima.'' Atundisha mukwameno omutatekelo no kuleta mukwameno omushili. ¹⁰ Ko kuhima kwa Nyambi, tunakenishiwa ko shitavelo sho elama ya Jesu Kilesite lofoci pohuma kunapu. ¹¹ Liyuwa no liyuwa mu pulisita emana kukwama ekwama ya Nyambi, kupa nupu thzo itavela yo kulipitula kuhukahukela- Itavelo ei ikana kutwesha kutundisha ivi, ¹² Unone Kilesite ou amanine kupa shitavelo shofoci yo ivi sho myaka thzothzihe, onakala ku lyoko lyo sholyo lya Nyambi. ¹³ Onatatelela shime kukakumena apo akwethzimbo yenji akukwameniwa epula yo malyatelo o maulu enji. ¹⁴ Mukonda ko shitavela shofoci pohuma onaloishela kokukana kupwa awa anakenishiwa. ¹⁵ Mupepo oukenu nawo watuambela. Pakutanga amba ci, ¹⁶ ''Oku koliyo kuliyuva nakukwama no munyima thzao mayuwa, kwa amba Fumu. Kenge nakupaka milao thzange mu micima thzo, kalo kenge nakuthzin'ola mu maayalo o.'' ¹⁷ Kalo ayepo amba ci, ''Ivi yo no kupila mulao(umango wo) ko kana kuivuluka kalo.'' ¹⁸ Honi apa kuli otetelo wei, kwithsa shitavelo sho shivi eshi shifotahala kalo. ¹⁹ Honine, apange, tunaloela kuingena mu shivaka shoshokenu nene ko onyonga wa Jesu. ²⁰ Ou woliyo mwikalelo oupe ou uyoya ou anatupa ko shito eshi nashivuku, eyo po ko, elama yenji. ²¹ Mukonda tuli no mupulisita shokulu oyu endisha njiyo thza Nyambi, ²² tuhenyene no micima thzo shemwa no kulitawa ko shemwa, micima thzetu kothzinakenishiwa ku maayalo o shivi no elama inahupiwa no meyu oakenu. ²³ Tukwate kutanalisha shikulupelo tuamba, mukonda oyu natukupelisha po muwawa. ²⁴ Tuanekelenu nawa omu tutwesha kulikwameme shuwana kulihima no kukwama ekwama yoiwa. ²⁵ Lelo twashiya kuliwana pofoci, eci eli anakwama wamweya. Unone, tulikolopishe munu na munagenjenji, ne tukwame kengeyo nene ou tumona liyuwa ko lihenyena. ²⁶ Mukonda ngeci atwepo tukwatelela kukwama shivi ko kuhima munyima thzo kutambula kulimuka yoshemwa, shitavelo sho ivi kashikwathsa. ²⁷ Uno honi, shinu shofoci tunatatelela eshi tuyapa po katulo, no mulilo o kapyeya ou wakutumeka akwethzimbo ya Nyambi. ²⁸ Munu yomuhe oyu nakana mulao wa Mushe apaiwa kokupila shilila n'eke ko upaki wa anu eli nji ahatu. ²⁹ Honi mwanekela ci kenge ukuma kupi mulandu ou uloela munu oyu nalyatangela Mwana Nyambi no maulu, oyu nashomolola onyinga o kuliyuva ci kali ukenu- onyinga ou wamukenishile- no kutuka mupepo o shihemo? ³⁰ Mukonda twalimuka oyu wambile ci, ''Kutemununa po kwange; kenge nakuhushela.'' Ne kalo, ''Fumu kenge akuatula anu enji.'' ³¹ Kuwela mu moko a Nyambi oyu yoya shinu shiyapisha! ³² Unone muayale mayuwa okunyima apa namumana kumonishiwa, eli namutanalisha mundwa thzothzikulu thzo makando. ³³ Pamweya kuma namishomololanga pa meho o mungi wa anu ko kumitukathzana no kuminyandisha, kalo pamweya kuma namulielanga makando nawa nanyandishiwa. ³⁴ Muoknda kuma namuyuvelanga n'eke awa nakala mukamenga, kalo kuma mwatawile ko munanyanyuka kuminyanga lufumo lwenu. Kuma mwalimukile ci amwepo muli no lufumo loluwa lokukana kupwa kupi eyo. ³⁵ Honi mwakonja kukulupela kwenu, oku kuli no muyambo oshokulu. ³⁶ Mukonda mwaloela kukala no mwaooto ci ou mumana kukwama ehima ya Nyambi, kenge mwakutambula ei anakulupelisha. ³⁷ Mukonda pashikati shoshoonye pohuma, oyu naloela kukeya kenge akeya shemwa kalo kathzihama. ³⁸ Anu ange owakenu kenge ayoya ko shitawo. Ngeci munu ayepo hukela mumanyima mwoyo wange kawa kumuloela.'' ³⁹ Unone katuli kwawo ahukela munyima kukepishiwa, unone tuli kwawo ali no shitawo no kuyoyisha mwoyo wo.