¹ Honi ei tuamba ei: Tuli no mupulisita shokulu oyu nakala ku lyoko lyo shilyo lyo wikalo wo Ufumu o kuwilu. ² Yoliyo ngamba o mushivaka shoshikenu, Tabanakele thzo shemwa thza Fumu, kali munu, oyu nathzikwama. ³ Mukonda mupulisita shokulu yomuhe onahanguliwa kukwama mbuyo no itavelo. Nehoni waloela kuwana shokupa. ⁴ Honi Kelesite nga kuma akalile pa kaye, nga kapwile mupulisita shanga kamanaana, mukonda kuma kwakalile akakupa mbuyo kuthza ko mulao. ⁵ Akwamena shikupulo no muthzimbimbi o enu yoku kuwilu. Eci Mushe eli amuambelile Nyambi apa afotile kuumba Tabanakele: Nyambi ayepo ambaci, ''Omone ci wakwama enu yoihe kuthza komu wamonishiwilelile pa mukinya.'' ⁶ Unone Kilesite honi onatambula ekwama yoshokulu kupita eyo, eci eli ali mukakuimanena kuliyuva kokuwawa, oku kunemana pa ikulupelisho yoiwawa. ⁷ Mukonda nga ci kuliyuva ko mutatekelo nga kanakukala no umango, nga kwithsa kuliyuva ko mushili oku nakufotiwa. ⁸ Mukonda Nyambi ou awanine mulandu kwa anu, ayepo amba ci, ''Mumone, mayuwa akeya- kwa amba Fumu- ou nakukwama kuliyuva kokupe nakanjiyo thza thza Isilaele nakanjiyo thza Juda. ⁹ Kakwakulipitula no kuliyuva oku nakwamine nanyakulyo pa liyuwa nawakwatile ku lyoko kuwatundisha mulitunga lya Engepita. Mukonda kamamelile shuwana kuliyuva kwange, ne amepo niwashiya- kwa amba Fumu. ¹⁰ Oku koliyo kuliyuva oku nakukwama nakanjiyo thza Isilaele munyima thzao mayuwa- kwa amba Fumu. Kenge nakupaka milao thzange mu maayalo o, kalo kenge nakuthzin'ola mu micima thzo. Kenge nakukala Nyambi wo, kalo awo kenge akukala anu ange. ¹¹ Kakulifundisha munu na mungenjenji nji munu naminenji, kuamba ci, 'Olimuke Fumu.' Mukonda wahewahe kenge akunilimuka, kutatekela koyu omuonye kukwo kutwala koyu umukulu. ¹² Mukonda kenge nakukala no shihemo ku ekwa yo yoimango, no ivi yo kanakuivuluka kalo ¹³ Ko kuisha oku kulyuva ci ''kupe,'' amba ci kuliyuva kokutanga kunakulupala, ne eshi shinakulupala shinaaya kalo shitanba kupwa.