¹ Oyu Melechizedeki, fumu wa Salemu, mupulisita wa Nyambi shokulu oyu li kuwilu, yoliyo waliwanine na Abrahama kokahuka kutunda kuku paa mafumu ne ayepo mufiyaula. ² Neli kukwenji oku Abrahama apile sho ulikumi kwei akalile nayo yoihe. Matatekelo, lithzina lyenji lya amba ci, ''fumu o muwawa''; kalo lya amba ci, ''fumu o Salemu,'' kokuamba ci, ''fumu o kuliyala.'' ³ Kali no tata wenji, kali no njina kali no mukuta, kali no matatekelo o mayuwa enji nji mahulelo o mwoyo. Ne mukulipitula na Mwana Nyambi, onapiluka mupulisita okukana kupwa. ⁴ Mumone okulu oyu munu oku apile mupatirialeka Abrahama sho ulikumi ku enu ei akanyangile kundwa. ⁵ Mukuta wa Livi owu watambulie o pulisita uli no kutumena kuthza ko mulao kukolekisha sho ulikumi kwa anu, eci, kutunda kwa apo, shanga ci, nawo, akashikuta sha Abrahama. ⁶ Unone Melechizedeki, oyu mukuta wenji kawatunda kukwo, watambulile sho ulikumi kwa Abrahama no kumufiyawela, oyu wakalile nekulupelisho. ⁷ Kwithsa okuhamula ci munu shoonye afiuliwa ku munu shokulu. ⁸ Kukwetu, anu awa afa woliyo atambula sho ulikumi, unone apo oyu watambulile yo ulikumi ambiwa ci wakuyoya kuyoyelela. ⁹ Kalo, ko muambelo, Livi, oyu watambulile sho ulikumi, naye wakulile sho ulikumi ko Abrahama, ¹⁰ mukonda Levi kuma akalile muilama ya kuku wenji Melechizedeki ou aliwanine na Abrahama. ¹¹ Honi uwawa nga wawaniwa ko upulisita o alivi (mukonda anu kuma natambula mulao ko upulisita), ine nga kufotahalelile ci kukeye mupulisita yumweya o muikalelo wa Melechizedeki, kalo kali o muikalelo wa Aroni? ¹² Mukonda upulisita apa upiluliwa no mulao nawo waloela kupiluliwa. ¹³ Mukonda uyu ambiwa ko ei iamba wa shikuta shasho, uko kushime kutunda oyu wakwamine ku aletare. ¹⁴ Honi kunalimukiwa popakenu ci kwa Juda koliyo aelekiwile Fumu wetu, shikuta eshi akanine kuamba Mushe ko upulisita. ¹⁵ Ei tuamba yamonahala popakenu manene mupulisita yumweya apa akeya okulipitula na Melechizedeki. ¹⁶ Oyu kuma akalile mupilisita, kali ko mulao wefota ya anu, unone ko okolo o mwoyo okukana kupwa. ¹⁷ Mukonda man'olo apaka yenji: ''Yowe mupulisita okukana kupwa kuthza ko muikalelo wa Melechizedeki.'' ¹⁸ Mukonda mulao omatatekelo kanautundishiwa pohuma mukonda kaukolopile no kupila okwathsi- ¹⁹ mukonda kwithsa ei nauloisha mulao- unone shikulupelisho shoshiwa shinaletiwa, eshi shituleta popepi na Nyambi. ²⁰ Kalo shikulupelisho kashikeile kokupila kuliethza! Wamweya kuma napakiwa upulisita kokupila kuliethza, ²¹ unone aye kuma napakiwa pa upulisita ko kuliethza koyu wamuambelile ci, ''Fumu onaliethze ne kakupiluka: 'Yowe pulisita okukana kupwa.''' ²² Keyi nayo Jesu onatanalisha kuliyuva ko kuwawa. ²³ Apulisita okutanga neli angi, ambene kufa nakuwakwangisha kutwalelela kukwama. ²⁴ Unone aye mukonda ayoya kokuna kupwa, oli no upulisita okukana kupwa. ²⁵ Honine kalo atwesha kuyoishelela awa akeya kwa Nyambi ko aye, mukonda shikati shoshihe ayoyele kuwakwathsa. ²⁶ Mukonda nakuloo shemwa ci tukale no mupulisita omukulu okengeya, okukena, okupila mulandu, okupila mathzilo, oyu natundishiwa kawa anu o shivi, oyu nathzinishiwa peulu thzo liwilu. ²⁷ Kwithsa ei afota, eci eli anakwamanga apulisita wamweya owakulu, kukwama shitaveli liyuwa no liyuwa, kukwamena shivi shenji tango, mbeci kukwamena ivi ya anu. Kuma akwamine ei lofoci kunapu apa alikwamine shitabela aye shinda. ²⁸ Mukonda mulao wahangula anu ali no umango kuwakwama apulisita oshokulu. Unone liywi lyo kuliethza, eli nalikeya munyima thzo mulao, linahangula Mwana, okuluka shikati shoshihe.