¹ Nehoni tushiye maywi a Kilesite o mutatekelo ne tuthze posho kukula mu maano. Twapaka kalo ekwama yo kuhumba ku ekwama yo kufa nopa shitawo kwa Nyambi, ² shanga matatekelo o ifundisha yo kolovethzo, yo kupaka moko, yo kupinduka kwa afu, no katulo thzokukana kupwa. ³ Natwe kenge twakukwama ei ngeci po Nyambi wakutawethze. ⁴ Mukonda kakutawa kwawo akalile muliyeye, awo ayuvile mbuyo thzo kuwilu, awa atambulile ku mupepo oukenu, ⁵ nawa ayuvile ku liywi lya Nyambi lyo liwa no okolo o myaka thzikeya, ⁶ unone awa awile- kakutawa kalo kuwahushela mu kuhumba. Mukonda awo angongotela Mwana Munu awo ashinda kalo, no kumushomolola ku mbunga. ⁷ Mukonda muve ou unanwanga ku meyu o mvula nalokelanga po, ne wamenisha ilya ei ikwathsa awa analimi apo pa muve- ou woliyo muve ou utambula fiyauthzi kutunda kwa Nyambi. ⁸ Unone ngeci wamenisha itondo yo miondo no tunjata, kauli no okwathsi ne uli popepi no kukutiwa. Mahulelo awo po kutumekiwa. ⁹ Unone tunayuvishisha enu yoiwa kukwenu, enu yokuyoisha, ahemiwa ange, shanga ci twa amba kengeya. ¹⁰ Mukonda Nyanbi kali wakukana kuluka. Kakuvulama ekwama yenu no shihemo munamonisha ku lithzina lyenji, mukonda munayoisha anu enji okukena kalo mushimukwamena. ¹¹ Twahima nene ci munu no munu kukwenu amonishe mukwameno okengeyo kutwala kuhula, ci kukulupela kwenu kukale ko shemwa. ¹² Ei ili kengeyo ci mwakuninga uva, unone mutamenene awo awanine shikulupelisho kutunda pa shitawo no kukwatelela kukwama. ¹³ Mukonda Nyambi ou akulupelishile Abrahama, kuma aliethzile aye shinda, mukonda kwithsa munu omukulu kupita oku nga aliethzile. ¹⁴ Kuma ambile ci, ''Kenge nakukufiyaula shemwa no kukupa ekulu owangi.'' ¹⁵ Omu moliyo, awanenine Abrahama ei akulupelishiwile munyima thzokutatelela shikati shoshile. ¹⁶ Mukonda anu aliethzange kwa munu omukulu kuwapita. Kumahula o likan'i, kuliethza kwapilukanga shitanalisho. ¹⁷ Nyambi ou anekelile kumonisha popakenu kwawa ashwana shikulupelisho ci muikalelo wenji kaupiluka, kuma natanalishangile muambelo ko kuliethza. ¹⁸ Kuma akwamine ko enu ili yokukana kupiluka- Nyambi katwesha kuangela- atwe, tunacilela kukwenji, twakuwane kutanalishiwa kokukolo ci tukwate kutanalisha kushikulupelisho atupakelile. ¹⁹ Apa poliyo unemana no kutanalela mwoyo, kukulupela oku kuingena mukaci kuingenene kunyima thzo shito, ²⁰ omo Jesu, oyu watangile kuthza atwe kotushime, onakengena omo mushivaka kutuimanena. Onapiluka mupulisita shokulu okukana kupwa ko muikalelo wa Melechizedeki.