¹ Honine, apange owakenu, mwaliwana mu kwishiwa kokuwilu. Muanekele ya Jesu, mwapositola no mupulisita shokulu o kulitawa kwetu tuliamba. ² Kuma asepahalile kwa Nyambi, oyu wamuhangulile, eci eli nasepahala Mushe munjiyo thza Nyambi momuhe. ³ Mukonda Jesu kuma namoniwa ci aloela kutethzima kokukulu kupita Mushe, mukonda oyu umba njiyo alemekiwa nene kupita njiyo. ⁴ Mukonda njiyo no njiyo kwali nathziumbu, unone oyu umba enu yoihe po Nyambi. ⁵ Mukonda Mushe kuma akalile mupika o kusepahala mu njiyo thza Nyambi momuhe, kupaka upaki wenu ei yakuambiwa kuposho. ⁶ Unone Kilesite asepahala eci Mwana oyu endisha njiyo thza Nyabi. Yatwe njiyo thzenji ngeci tukwate ko kutanalisha mu undume wetu no kukulupela oku tulishangala. ⁷ Honine, eci eli uamba mipepo oukenu: ''Lelo, ngeci amwepo yuva liywi lyenji ⁸ mwakolopisha micima thzenu eci eli mwanipilukelile, mushikati sho kuelekiwa mu mumbulwa kukutu. ⁹ Apa poliyo akwathsan'ulu wenu anipilukelile kokunieleke, ou amanine kumona ekwama yange ¹⁰ mu myaka makumi ane. Honine kuma naanjipelile shiya shikuta. Amepo niamba ci, 'Anayauluka mu micima thzo. Kalimukile makun'wa ange.' ¹¹ Eci eli naniliethze mu uanji wange: 'Kakuingena mu kulitulumwisha kwange.''' ¹² Mumamele, apange, eci mukaci kenu katele kukale munu yumweya o mucima oumango okukana kulitawa, mucima ou umutundisha kwa Nyambi oyu yoya. ¹³ Unone mulitongwele mukaci kenu liyuwa no liyuwa, amona apo kuishiwa pohuma ci ''lelo,'' ci mukaci kenu kupile munu oyu kalupishiwa koku angeliwa ko shivi. ¹⁴ Mukonda tunapiluka anu ofoci na Jesu ngeci tukwate ko kutalisha mu kukulupela kwetu kukwenji kutunda kuma tatekelo kukakuma kuhula. ¹⁵ Eci kwei inamniwa ci, ''Lelo, ngecci amwepo muyuva liywi lyenji, mwakolopisha micima thzenu, eci eli mwanipilukelile.'' ¹⁶ Alye awa ayuvile Nyambi ne awopo amupilukela? Eine kali woliyo awo atundile mu Engepita ko Mushe? ¹⁷ Alye awa anjipelile mu myaka makumi ane? Kali woliyo awo akwamine shivi, awo ivimbi yo yawelelile mu mumbulwa kukutu? ¹⁸ Alye awo aliethzelelile ci mbela kauingena mu kulitulumwisha kwenji, ngeci kali awo akanine kumuyuvela? ¹⁹ Twamona ci kanatwesha kuingena mu kulitulumwisha kwenji mukonda okukana kulitawa.