¹ Honine, amona yunapakiwa mukaci ko mapaki owangi, tushiye enu ei itulemisha no shivi eshi shinatukakatela. Tundandumuke ko mwooto shiyano ethzi anatupakela. ² Tutwale maano kwa Jesu, aye mutateki no muloishi o shitawo. Mukonda o shinyanyu eshi amutulekelile kuposho, walitanalishile pa mbinda, onashomolola lishwau lyathzo, no kukakongomana ku lyoko lyo shilyo lyo muvuthso wa Nyanbi. ³ Honi mumuanekele, oyo walitanalishile mukupilukeliwa kokengeyo kutunda kwakakukwama shivi kumupilukela, ci katele muaye nji kuvapa. ⁴ Mushime kulwa no shivi kukuma pa kumwaa onyinga; ⁵ kalo munavulama maywi okukolopisha micima namupiwa pakupa ana: "Mwanange, waningisha lipone Fumu ino akukutulula, nji kuvapa ino akuolola. ⁶ Mukonda Fumu wa kukutulula oyu ahima, no kuhumbusha mwane shemwa oyu atambula." ⁷ Mutanale mwikalupa muishimbe eci shikutululisho. Nyambi a mishimba eci anenji. Kwali mwana oyu okuninga ci tata wenji ka mukutulula? ⁸ Ambene ngeci po kamikutulula, eci eli ana kutulula anenji, mwana mwenda kumuongo kali mwanenji. ⁹ Kutunda po kalo, tuli na tata wetu opano pashi awa anatukululanga ne twawapanga lilema. Kali twaloela kulipaka kushi nene kwa Tata wetu o mupepo ci tuyoye! ¹⁰ Atata wetu atukutululanga pa shikaki shoshoonye kwa anekela ci kunaloo. Ambene Nyambi aye atukutulula ci tuyoye, ci tuliwane mu kukena kwenji. ¹¹ Kukutululiwa kakwamonahala owa apo akukutululela, unone kwaleta pohuma honyi. Ambene ku mayuwa o kuposho kwaleta oshuka o kuliyala ko kuluka kwao anayuvu kukutululilwa. ¹² Honi mutanalishe moko enu aa akunjaelela no manwi a tutuma. ¹³ Muloishe makun'wa o maulu enu, ci eli litenyangela lyaendelela ambene lipolishiwe. ¹⁴ Mukwatelele kuyoya mukuliyala no anu wahe, no kukena, mukonda ko kokupila kukena kwithsa oyu wakumona Fumu. ¹⁵ Mumamele ci katele kuwanahale oyu wakupila kuwana shihemo sha Nyambi, ne kalo ci kwamena muthzithzi okulula no kuleta okalu, ci owangi katele uaipishe, ¹⁶ ne kalo ci kwawaniwa yumweya kukwenu oyu yoya ko lungu nji kuyoya kokukana kulemeka Nyambi, eci Isau, oyu waulishile ukulu wenji no eshima yokulya muendo ofoci. ¹⁷ Mukonda mwalimuka ci mumanyima, ou afotile ci afiyaweliwe, kuma amukanenine, mukonda kawanine shivaka sho kuhumba, shanga ci shime afotile fiyauthzi ko mihothzi. ¹⁸ Mukonda kamukeile ku mukinya ou utwesha kukwatiwa, mukinya o mulilo ou uyuuma, milema, shipupo no lingungwa. ¹⁹ Kamukeile ku muyoyo o tolombita, nji ku liywi eli liamba maywi aa aninga ci awa ayuvile alombile ci katele liakuhukelepo kalo liywi limweya kuamba kukwo. ²⁰ Mukonda kuma nayapa ei natumeneniwa: ''Shanga shiyama ashopo shikwata apo pa mukinya, shipovauliwe no mawe nji kuyumbiwa no man'ozi.'' ²¹ Ne eshi shamonahalile kuma yapishile nene mane Mushe ayepo amba ci, ''Ninayapa nene kalo natutuma.'' ²² Uno honi, munakeya ku mukinya o Sione no ku mbongi thza Nyambi oyu yoya, Jelusalema o kuwilu, no ku ita makumi o makumi yo mangeloi kuliwana ko munanyanyuka. ²³ Munakeya kunaliwana ku keleke thza mweli, oyu nan'oliwa mu mabuka okuwilu. Munakeya kwa Nyambi, mukakuatula enu yoihe, no ku mipepo thza anu owakenu awa anakwamiwa okuluka. ²⁴ Kalo munakeya kwa Jesu, oyu imanena kuliyuva kokupe, no ku unyinga ou uhoya ou uamba enu yoiwa kupita unyinga wa Abele. ²⁵ Mumone ci kamukana kuyuva oyu amba nenu. Mukonda ngeci kanapanduka ou akanine kuyuva oyu wawa ambelile kuli pashi atwe kenge tupanduka ngepi ngeci atwepo tutunda koyu tuambela kutunda kuwilu. ²⁶ Pashikati shimweya, liywi lyenji kuma lianyunganyungile kaye. Ambene onakulupelisha no kuamba ci, ''Pashikati shimweya kalo kenge na kunyunganyunga kali kaye pohuno, unone no mawilu nao.'' ²⁷ Aa maywi, '' Shikati shimweya kalo,'' aamba kutundisha enu ei itwesha kunyenganyengiwa, eipo, enu ei yombiwile, ci enu ei ikana kutwesha kunyenganyengiwa ishiyale. ²⁸ Honine, kutambula ofumu ou ukana kutweshala kunyenganyengiwa, tukandelele no kulombela kwa Nyambi ko kumupa lilema no kumuyapa. ²⁹ Mukonda Nyambi wetu po mulilo okupya.