¹ Honi kulitawa po kukulupela ko kuyala enu tunakulupela no kutawa enu ikana kumoniwa. ² Mukonda oku kulitawa poliyo nakumonahalela uwa wa kuku wetu o kukale. ³ Ko kulitawa twatuyuvishisha ci kaye kuma kaombiwile ko liywi lya Nyambi, ci ei imonahala kayakwamiwile pa enu imonahala. ⁴ Neli ko kulitawa oku kwaletile ci Abele akwame shitabelo shoshiwa kupita sha Kaine, esho shaletile ci Nyambi amumone ci munu o kuluka, ne Nyambi ayepo mushangala mukonda wo shitabelo shenji, kalo ko shitawo Abele oshiamba, shanga ci onafu. ⁵ Neli ko kulitawa oku kwaletile ci Enoke atwaliwe kuwilu ci amona kufa. ''Kawanahalile, mukonda Nyambi wamushimbile.'' Mukonda kushime kutwaliwa kuwilu, kwa ambiwile ci onaloelisha Nyambi. ⁶ Honi kokupila shitawo kakutawa kumuloelisha. Mukonda kwaloela ci munu yomuhe oyu keya kwa Nyambi atawe ci kwali ne ci kalo yoliyo napanga muyambo kwa anu awa amufota. ⁷ Neli ko kulitawa kwaletile ci Nuwe, ou amanine kutongweliwa yo enu ishime kumonahala kutunda kwa Nyambi, ko kuyapa Nyambi ayepo kwama aleka kuyoyisha akwa njiyo thzenji. Pa kukwama ei, kuma atulile kaye ne onapiluka mukakushwana kuluka kuthza ko shitawo. ⁸ Neli ko kulitawa Abrahama, ou eshiwile, watawile ne ayepo katuka kuthza ku litunga oko nga akawanine kushwana. Ayepo katuka kuthza, kokuna kulimuka. ⁹ Neli ko kulitawa ou akayoyile mulitunga amukulupelishile eci munu yoya mulitunga lya anu ao. Kuma akalangile mu tente na Isaka na Jakovo, awa akushwana nawo elyo litunga. ¹⁰ Mukonda kuma atatelelile kumona mbongi, ethzo aumbile Nyambi. ¹¹ Neli ko kulitawa, shanga ci Sara kelekile, ou atweshile kukala no lila. Ei kuma yakwamahalile shanga ci kuma akulupalile nene, pakumona ci oyu wamukulupelishile wakusepahala. ¹² Honine, kutunda koyu mukwelume yofoci- ne kuli popepi no kufa- koliyo kwaelekiwile ekulu awangi eci matungwethzi omuwilu kalo owangi okukata kutawa kutaliwa eci luheke lo paliya lyo lwale. ¹³ Neli mu kulitawa wahe ou awa ou afile kokupila kutambula ikulupelisho. Unone, kuma aimonine on kuikandelela koili kokule, ne awopo amba ci kali apano pa kaye kalo enda pano pa kaye. ¹⁴ Mukonda awo amba eyo enu amonisha popakenu ci afota litunga lyo. ¹⁵ Nga kuma aanekelangile mu litunga atundile nga awanine shikati sho kuhuka. ¹⁶ Unone omu kunakalela, afota litunga lyoliwa, elyo, lyo kuwilu. Honine Nyambi kayuvu honyi kuishiwa ci Nyambi o, ne onawakwamena mbongi. ¹⁷ Neli ko kutalitawa apo Abrahama, ou aelekiwile, ayepo kwama Isaka shitavelo. Neli yoliyo mwanenji yofoci pohuama oyu akwamine shitavelo, aye oyu watambulile ikulupelisho. ¹⁸ Neli Abrahama oyu ambelile ci, ''Ekulyoe kenge akuishiwa ko Isaka.'' ¹⁹ Abrahama kuma alimukile ci Nyambi atwesha kupindula Isaka kwakakufa, ne kuamba yoshemwa, kuma amutambulile kutunda kwakakufa. ²⁰ Kalo neli ko kulitawa Isaka ou afiyawelile Jakobo na Isau ko enu yakukeya kuposho. ²¹ Neli ko kulitawa ou Jakovo, kuhula mwoyo wafiyawelile ana Josefa eli. Jakovo walombelile kunakundamena pa mutaa wenji. ²² Neli ko kulitawa ou Josefa, kuli popepi no kufa, wambile yo kutunda kwa ana o isilaele mu Engepita ne ayepo walaa omu akwamena ishoko yenji. ²³ Neli ko kulitawa apo Mushe, ou aelekiwile, ashemi enji neli amuholeka pa maonda ahatu mukonda kuma amonine ci neli kambu kokawa. Kayapile kutumina kwa fumu. ²⁴ Neli ko kulitawa apo Mushe, ou akulile, wakanine kuishiwa ci njina mwana Faro. ²⁵ Kuma ahangulile kunyandisheliwa pofoci na anu a Nyambi kupita kulikola shihuno sho shivi pa shikati shoshoonye. ²⁶ Kuma amonine ci kunyandisheliwa Jesu shinu shoshikulu kupita lufumo lo u Engepita, mukonda kuma atatelelile muyambo wenji. ²⁷ Neli ko kulitawa Mushe ou atundile mu Engepita. Kayapile uanji wa fumu, mukonda kuma atanalile eci kuma amonine oyu wakana kumoniwa. ²⁸ Neli ko kulitawa ou akwamine paseka no kushamawela onyinga, ci mukakupaa eli akwata eli o akwelume o ana Isilaele. ²⁹ Neli ko kulitawa ou apitile mu lwale lo lukihu eci popa kukutu. Aka Engepita ou aelekile kupitamo nawo awopo athzela wahe. ³⁰ Ko kulitawa mamota a Jeriko awile, ou athzingulukile mayuwa mutanu no mayuwa eli. ³¹ Neli ko kulitawa Rahabe o lihule ou akanine kufela pofoci nakakukana kulitawa, mukonda kuma atambulile shuwana anduthzi. ³² Ine kalo nga niamba? Mukonda shikati kashinitawethza nga nina amba ya Gidioni, Baraki, Samisoni, Jefita, Davida, Samuele, nei ya apolofita. ³³ Neli ko kulitawa ou anyangile mivuthso, kukwamena Nyambi ko kuluka, no kutambula ikulupelisho. Avukile ku twana to nyime, ³⁴ athzimine okolo o mulio, apalile ku milomo thzo miele, kuma nakolopishiwa ou naliyuvanga uva, akalile andume mu mandwa, no kulea mashwalale akwethzimbo yo oku matunga ao. ³⁵ Ambuyama awhushelile afu o kwanapinduka ku afu. Amweya anyandishiwile, katawile kuwashiya, ci akawane kupinduka shuwana kwa afu. ³⁶ Amweya awashomololile no kuwamwashula, no kuwanga no mawenge no kuwapaka mukamenga. ³⁷ Awapovaulile no mawe. Awayatulile pakaci. Awapaile no miele. Alihandile kwanavata mikata thzo mangu no membe. apilile enu yoihe, awa lyatelelile, awakwamine omango. ³⁸ Kaye kakawaloelile. Ayembanine mu mumbulwa kukutu no mumikinya, no mu mawe no mu mateke o mumuve. ³⁹ Shanga ci wahe awa anu Nyambi wawamonine ci akukena mukonda o kulitawa ko, katambulile shikulupelisho. ⁴⁰ Nyambi watuayalelile enu yoiwa, ci kokupila atwe, nga awo kanakwamiwa o kuluka.