¹ Mukwatelele kulihima eci anu o munjiyo thzofoci. ² Mwavulama kutambula enda. Mukonda, omu moliyo amweya omu atambwelile mangeloi kokukana kulimuka. ³ Muvuluke awa ali mukamenga muninge eci namwe muli no mukamenga. Muvuluke awa anyandishiwa muninge eci namwe mwanyanda no mu elama. ⁴ Maluwo alemekiwe ko anu wahe, kalo mukenishe olili o maluwo, mukonda Nyambi kenge akuatula anu olungu nawa o luthziho. ⁵ Mutunde kukuhima mali. Ei muli nayo mumone ci inamikwana, Mukonda Nyambi aye onamba ci, ''Kanakumishiya nji kumishiyelela.'' ⁶ Tumone ci ei tuli nayo inatukwana ci tukale no ondume o kuamba ci, ''Fumu po mukwathsi wange; kana kuyapa. Shine eshi nga anikwama munu?'' ⁷ Muayale awa amiendisha, awa amiambelile liywi lya Nyambi, ne muayale ei itunda pa muikalelo wo. Mutemunune kulitawa ko. ⁸ Jesu kilesite yoliyo omu nakalela yana, moliyo ankalela no lelo, kalo moliyo akukalela noko kuliyele. ⁹ Katele muyauluke no ifundisha yayo yokulishiyashiya. Mukonda shoshiwa po ci micima thzenu thzikolopishiwe ko shihemo, kali ko elya ei ikana kukwathsa awa aenda ko ayo. ¹⁰ Tuli no katala(aletare) apa kana kuloela kulya awa anakwamanga mu tabanakele. ¹¹ Mukonda onyinga wo iyama ei yapaiwangelile evi kuma waingenishiwangile mu shivaka shoshikenu ko mupulisita shokulu. Elama ayo kuma aitumekelangile pola o mafulo. ¹² Jesu naye wanyandelile pola thzo shelo thzo mbongi, ci akenishe anu ko onyinga wenji. ¹³ Honine tuthzenu kukwenji pola thzo mafulo, kotunashimbi honyi ethzi ayuvile. ¹⁴ Mukonda katuli no mbongi thzetu thzo liyele kuno. Unone, tunatatelela ethzi thzikeya. ¹⁵ Ko aye, honine, tupenu shitavelo sho kushangala kwa Nyambi, kushangala woliyo oshuka o kanwa aka kaamba lithzina lyenji. ¹⁶ Twavulama kukwama yoiwa no kulipanga enu, mukonda itavelo yokengeyo yoliyo ahima Nyambi. ¹⁷ Mupe lilema no kulipaka kushi thzawa amiendisha, mukonda woliyo anyunga mioyo thzenu ne woliyo akupa upaki o mioyo thzenu. Muwape lilema ci awa amiendisha akuikwame ko shinyanyu, ne kali kwanaanjipa, nga kayakukala no okwathsi kukwenu. ¹⁸ Mutulombelele, mukonda tunalimuka ci kuhima kwetu kuwa ne twaloela kuyoya shuwa muinu yoihe. ¹⁹ Namilomba ci mukwame kengeyo nene, ci nakumihukele wanguwangu. ²⁰ Honi Nyambi o kuliyala, oyu wapindulile kutunda kwakakufa mulithsani shokulu o mangu, Fumu wetu Jesu, ko onyinga o kuliyuva kokuna kupwa, ²¹ amipe enu yoihe yoiwa ci mukwame ei ahima, kukwama netu ei aloela, ko Jesu Kilesite, kukwenji kukale kutethzima kokukana kupwa. Ameni. ²² Honi namilomba, apange, mutambule maywi o kulihengahenga aa ninamin'olela. ²³ Mulimuke ci mwapetu Timotea onatundishiwa mu kamenga, oyo nakukeya nennji kunamimona ngenji akeye wangu wangu. ²⁴ Muvumenene wahe aendishi enu no anu a Nyambi owakenu wahe. Akwa Itali amivumenena. ²⁵ Shihemo shikale nenu mwahe.