¹ Paulo nao kaisa ku Debe naku Laisitila, pano moneni, naumbi umusambile ishina lyakwe ni Timoti kali kulya, umwana wamwakashi umu Yuda uwali umusumini, sombi wishi ali mu Giliki. ² Balu kumushimika ,ifiweme kuba bwanakashi abali mu Lasitila namu Ikoniamu. ³ Sombi Paulo ali kufwaya yee ukulukwenda nankwe, eli amupintila neku musembulula pa mulandu waba Yuda abaali muli isho incende, pakuti bonse balishi ati wishi ali mu Giliki. ⁴ Pano ili balukuya ukupita mu misumba, balu kupita mu mpangano ifya citilwe naba tumikishi naba kulu ba filonganino abo abaali mu Yerusalemu ukweba ati ba fikonke. ⁵ Lomba ne filonganino kafikoshiwa mu cisumino no kulunbdwapo impenda cila bushiku. ⁶ Paulo nabo ali nabo apitile mu ncende sha Filigia namu Galatia, pakuti bali bakenye ukushimikila amashiwi mu citungu ca Eshia. ⁷ Ili ba ishila mupepi Maisia, kabafwaya ukwingila mu Befiniya, sombi umupashi wakwa Yesu kaubakanya. ⁸ Lomba ukuciluka Maisia, eli batentemukile ku musumba wa Tulowas. ⁹ Eli Paulo ubushiku kabona icimonwa: Umwanalume umwina Makedonia kaimakene palya penka, kalu kumupapata ne kweba ati, "Isa mu Makedonia utwafwe." ¹⁰ Ili Paulo abwene icimonwa, lwenka ulo kalu tampako ukuya Makedonya, mukubona ati Lesa atwitila kuku shimika amashiwi ayaweme kuli bo. ¹¹ Pano ili twali kufuma mu Tulowas, twali ololokele ukulola ku Samotales, napa bushiku bwakonkelepo ka twisa ku Neapoli. ¹² Ili twafumine kulya kayuya ku Filipi, uyo wali musumba wamu Makedonia, umusumba uukulu wamu cisolo umwakwikala abatekeshi, twalikele muli uyu umsumba ukwa nshiku shimo shimo. ¹³ Pa bushiku bwe sabata twalifumine panse ya mulyango peepi ne nika, uku twalangulukile ati kwingabako incende yakupepelako. Katwikala panshi neku labila ku banakashi abo twali nabo. ¹⁴ Umbi umwanakashi ishina lyakwe Lidya, kashitisha wa fiweme fyamu musumba wa fyatali, uwalu kupepa Lesa, kaumfwa kuli fwe. Shikulu ka isula umutima wakwe ukweba ati akutike kufya lukulabila Paulo. ¹⁵ Ili ye naba munanda yakwe baibishiwilwe, ali tupapatile ukweba ati, "Kani mwampingula ukuba uwaccisumino kuli Shikulu, iseni mwikale mu nanda yandi." Nakabili ka tupatikisha. ¹⁶ Califikile koti nififi, ili twalikuya ku ncende ya mapepo, kutu kumanya umukashana uwali ne mupashi wa kalubi katwishiba, alikupeela ba shikulu bakwe ifingi mukubuka. ¹⁷ Uyu mwanakashi kalu kukonka Paulo na fwebo ilya bilikisha, ukweba ati. "Aba abalalume basha bakwa Lesa umukulu. Balu kushimikila kuli mwe inshila ye pusukilo." ¹⁸ Alikucita pa nshiku ishingi. Sombi Paulo pakumfwa ubukali kuli ye, ka pilibuka nekweba umupashi ati, "Ndukukweba ati mwishina lyakwa Yesu KIlisitu nati fuma muli ye." Nakambi kaufuma pali yenkeyo impindi. ¹⁹ Pano ili shikul wakwe abwene ukweba ati isubilo lyaku mpangilamo indalama lilile, kabekati Paulo na Sailasi neku batwala kucintu bwingi kuba buteko. ²⁰ Ili babatwele kuba pingushi, kabeba ati, "Aba bantu balu kufulunganya umusumba wesu. Ba Yuda. ²¹ Balu kushimikila inkonka ishitashili mwifunde ku bena Loma ukumfwa neli kucita." ²² Eli ibumba lyonse lyaimine Paulo na Sailasi; aba pingushi kaba lepaula imingila ba fwele nekweba ati ba pumeni ku nkoli." ²³ Pano ili ba bapumine makosa, eli ba batwele mu cifungo neku konkomensha umukulu wa cifungo ukuba lama bwino. ²⁴ Ili aumfwila uku kukonkomesha, umukulu wa cifungo kaba posa mu cipinda ica mukati ne kuba kakisha amoolu mu makusu. ²⁵ Sombi pakati ka bushiku Paulo na Sailasi balu kutembela ne kwimba inimbo kuli Lesa, na bambi aba kakilwe kabali kumfwa kuli bo. ²⁶ Penka kwalishile ici nkukuma icikulu ukwakuti ne mufulwa wa cifungo ka usunkanishiwa; penkapo nefibi fyalisukile, nabonse ifi bakakilwe kafi kakuluka. ²⁷ Lomba ili umukulu wa cifungo abukile mutulo nekubona ifibi fya cifungo filisukile; kasolomona ulu panga lwakwe nekufwaya ukulipaya, pakuti kabona kweba ati abakakilwe babutuka. ²⁸ Sombi Paulo alibilikishe kwishiwi ilikulu, ati, "wiyonaulapo iyo bonse emotuli." ²⁹ Eli mukulu wa cifungo kabula inyali neku butukila mukati ne, kututuma ku mwenso, kawa panshi pali Paulo na Sailasi, ³⁰ neku bafumisha panshi nekulabila ati, "Mwe ba shikulu, ningacita fiisa pakuti mpusuke?" ³¹ Kaba labila ati, "Sumina muli Yesu Shikulu, eli ukapusuka, webo naba mu nanda yobe." ³² Bali labila amashiwi aba shikulu kuli ye, pamo na onse uwali ma nanda yakwe. ³³ Eli umukulu wa cifungi kaba pinta muli ye yo impindi mu bushiku, neku basamfya ifipumo ne kwibishiwa ye na bonse aba mu nang'anda yakwe penkapo. ³⁴ Pano ili aletele Paulo na Sailasi mu nga'nda yakwe neku batebeta ifyakulya, ali sangalele icakuti na baabo bonse aba mungánda yakwe, ukweba ati asumina muli Lesa. ³⁵ Pano ili bwa ceele, aba pingushi ka batuma amashiwi kuli ba malonda, ati, "Lekeni abo abalalume baye." ³⁶ Eli umukulu wa cifungomkaeba amashiwi kuli Paulo, ati, "Abapingushi batuma amashiwi kuli nebo kukuleka muye. Kanshi fyenka efyo fumine, nekuya umutende." ³⁷ Sombi Paulo ka labila kuli bo ati, "Bali tupumine pa cintu bwingi ukwa kubula ukutwipushisha, nangabati tuli ba Loma-kabili bali tuposele mu cifungo. Pano balu kufwaya ukutufumya mubu mfisolo? Awe! Lekeni nibo bese batu tungulwile kunse." ³⁸ Nabo ba malonda kaba twala amashiwi ku ba pingushi, ili baumfwile ati Paulo na Sailasi bali ba Loma, bali tinine. ³⁹ Lomba aba pingushi kabesa muku lomba ukufitulukilwa kuli bo neku ba fumya, ukubalomba ati baye ukutali ukufuma mu musumba. ⁴⁰ Eli Paulo na Sailasi kafuma mu cifungo ne kwisa ku ngánda yakwa Lidia. Pano ili Paulo na Sailasi babwene ababwanakashi, bali bakoseleshe neku patuka ukufuma mumusumba.