¹ Pano kwali umuntu umbi mumusumba wa Kaesaliya, Konelyasi ishina lyakwe, cilolo wafita fyaba Italyani. ² Ali muntu umutekenye uwaletina ba Lesa ne ng'anda yakwe yonse, alepela bantu ifyakupela, nekutembela kuli ba Lesa impindi shonse. ³ Apepinensa isunu na ine iya kasuba, kabona mucimonwa inkalamba yaba Lesa ileisa kuli ye. Inkalamba kailabila kuli ye, "Konelyasi!'' ⁴ Konelyasi kalolesha pa nkalamba kabili alibelene mwenso ukwakuti nekulabila, ''Nindo ifi Shikulu?'' Inkalamba kailabila kuli ye, ''Amatembelo yobe nefyamabupe fyobe fyafika kwiulu koti mabupe akubebukisha ba Lesa. ⁵ Pano tumabantu ku musumba wa Yopa ukuleta umuntu uwinikilwe Simoni uwitikwa kabili ati Petilo. ⁶ Alikele kanyuka uweshina lya Simoni, uyo ing'anda yakwe ili palamine ne nika.'' ⁷ Ili inkalamba iyalabile kuli ye yaile Konelyasi alitile abapyungishi bakwe babili ne cita icitekenye ukufuma pali babo abalemupyungila. ⁸ Konelyasi kabeba fyonse ifyacitikilwe nekubatuma ku Yopa. ⁹ Pano pabushiku ubwakonkelepo pampindi ya nsa shisanu naimo ili bali palwendo lwabo kabilibali palamine ukufika ku musumba. Petilo alininine ukuya peulu lya ng'anda mukutembela. ¹⁰ Kabili ye alyumfwile insala kabili alefwaya ifif angalyapo, pano ili bambi abantu baleipika ifyakulya, alipelwe icimonwa, ¹¹ kabili alibwene umucelebela waisuka necipecimo cileseluka, cimbi cintu icipalile icifundocileisapacalo, cileisa icili nefifutu fino. ¹² Mulico muli ifi nama ifyamolu anene fintu ifikalaba pacalo, nefyuni ifya mwiulu. ¹³ Eli ne shiwi lya labile kuli ye: ''Ima Petilo, ipaya kabili ulye.'' ¹⁴ Sombi Petilo kalabila, ''Tefifyo, Shikulu; pakuti nshingalyapo icili conse icikowelele icitacisangulukilepo.'' ¹⁵ Kabili ishiwi lyalishile kuli nakabili ilyacibili: ''Ici ba Lesa ba sangulula, tekwesha ukucita icikowelele.'' ¹⁶ Icicalicitikile imiku itatu; elinefunda lyenkelyo kacipintw ukucibwelesha mwiulu. ¹⁷ Pano ili Petilo afulunganishiwile pamulandu wa cimonwa ici abwene ifi cingapilibula, boneni, abantu abo Konelyasi atumine balimakene kuntanshi yapa mwingililo, panuma yakwipusha inshina yaboku ng'anda. ¹⁸ Balitile nekwipusha nikwisa banga sanga Simoni uwitikwa Petilo kani alekala kuno. ¹⁹ Ili acili alelanguluka pamulandu wa cimonwa, umupashi kaulabila kuli ye, ''Bona, abantu batatu balekufwaya. ²⁰ Ima kabili koya panshi kabili uye nabo. Wishingashinga ukuya nabo, pakuti nabatuma.'' ²¹ Eli Petilo aselukile panshi kuba bantu nekuylabila, ''Ninebo uyo uumulefwaya. Nindo mwaishila?'' ²² Kalabila, ''Icilolo icitwa Konelyasi, umuntu umulungeme kabili niuyo uutina ba Lesa, kabili niuyo uulabililwa bwino kumushobo onse uwa ba Yuda, alipelwe icebo ukufuma kuliba Lesa ukupitila munkalamba iiswetele nekumwebaukwita webo ukuyaku ng'anda yakwe, ukweba ati angomfwa kucebo ukufuma kuli webo.'' ²³ Pano Petilo kabeeta ukwisa mukwingila nekwikala pamonaye. Mulucelo ulwakonkelepo alibukile nekuya pamo nabo, bambi paba kwabo abo ukufuma kuYopa balimukonkele. ²⁴ Pabushiku ubwakonkelepo balifikile ku Kaesaliya. Konelyasi alebapembelela alitile ba lupwa lwakwe nefibusa ifyamupepi naye. ²⁵ Chailishile mukuba ili Petilo aingile, Konelyasi kamukumanya nekuwa panshi pa makasa akwe mukumupepa. ²⁶ Sombi Petilo alimwafwileko ukumwimya ne kulabila, ''Ima! Nanebondi muntu.'' ²⁷ Ili Petilo alelabila naye, alingilemukati kasanga abntu abengi babungana na pamo. ²⁸ Kalabila kuli, ''Mwebo mwebene mulishi ati tacili cefunde umu Yuda ukukumankana pamo neli kufakashisha umwina fyalo. Sombi ba Lesa bandangisha ati nshilingile ukwata umuntu onse ati alikowelele nangu tasangulukilepo. ²⁹ Emulandu naishila ukwakubula ukutalika, ili natuminwe pali cico. Pano namwipusheni nindo mwantumine ntumi. ³⁰ Konelyasi kalabila, ''Inshiku cine ishapita pakapindi kenka aka, Naletembela pakapindi akansa shisanu na shine mu ng'anda mwandi; kabili boneni, umuntu kaimakana kuntanshi yandi mufyakufwala ifitubile. ³¹ Kalabila kuli nebo, 'Konelyasi, itembelo lyobe lyaumfwika kuli ba Lesa, nabukapekape bobe bwalangulusha ba Lesa pali webo. ³² Panwefyo tuma umuntuku Yopa, aye akwitile umuntu uwinikilwe Simoni uyo uwitikwa Petilo. Alekala mung'anda yakwa kanyuka uwinikilwe Simoni, apepi nenika.' ³³ Pampindi yenkeyo nali mutumine kuli webo uli neluse pakwisa. Panwefyo fwense tulipana ukwikala kwesu pamenso aba Lesa ukumfwa fyonse ifyo ifi bakwebele ba Shikulu ukulabila.'' ³⁴ Pano Petilo kaisula akanwa kakwe nekulabila, ''Mucine, Nabona ba Shikulu tabasalululapo. ³⁵ Mucifulo ico, mumushobo onse uuli onse uumutina nekucita imilimo iilungeme alipokelelwe kuli ye. ³⁶ Ulishi icebo ico atumineku bantu abena Isilaeli, ili abilikishe icebo iciweme pamulanu wa mutende ukupitila muli Yesu Klistu, uyo uuli ni Shikulu wa bonse- ³⁷ mwebo mwebene mulishi ifya citikilwe, ifyo ifyacitikilwe monse mu Yudeya, ukutatikila mu Galili, panuma yalubatisho ulo Yoane abilikishe; ³⁸ ifyacitilwe pamulandu wakwa Yesu umwina Nasaleti, ifi ba Lesa ba musufishe ne Mupashi Uuuswetele nemakosa. Alilekonsekonse ilya cita ififweme nekutendulusha bonse abo bonse abalepenshiwa ne cibanda, pakuti ba Lesa bali naye. ³⁹ Fwebo tulibakamboni bafintu fyonse ifi Yesu acitile, monse mucalo caba Yuda namu Yelusalemu. Balimwipeye mukumukobeka pa citi, ⁴⁰ sombi ba Lesa bali mwimishe pabushiku ubwakulenga shitatu nekumulengesha ukuboneka. ⁴¹ Tekubantu bonse, sombi kuli ba kamboni abo abatatikilwepo ukusalwa naba Lesa-kuli fwebo fwetwalile nekunwa naye panuma abuka ukufuma ku mfwa. ⁴² Alitubulishishe ukubilisha kubantu nekubilisha ukweba ati uyu eo uusalilwe naba Lesa ukuba mupingushi wabalabi nebafwile. ⁴³ Chili kuli ye kweba ati bonse bakasesema balabile ukweba ati onse wacetekela muli ye akapoke ukufitulukilwa kwafibipile ukupitila mwishina lyakwe.'' ⁴⁴ Ili Petilo acili alelabila ifi fintu, Umupashi Uuswetele wali ponene pali bo bonse abale umfwako kucebo cakwe. ⁴⁵ Abantu abo abali mwibumba lya kukopolwa abalibasumini-bonse abaishile na Petilo balikankamene, pakuti ubupe bwa Mupashi Uuswetele waliponene napabena fyalo. ⁴⁶ Pakuti balyumfwile aba abena fyalo ukulabila mumilaka imbi nekubalemya ba Lesa. Eli Petilo aasukile, ⁴⁷ ''Kani umbi angekata amenshi ukufuma kuli baba bantu ukweba ati bebatishiwa, ababantu abapokelela Umupashi Uuswetele pamo lukoso na fwebo?'' ⁴⁸ Eli abasuminishe ukubatishiwa mwishina lyakwa Yesu Klistu. Pano bali mwipwishe ukwikala pamo nabo inshikulu ishingi.