¹ Ali ni ngu Melkisedeki, imfumu yaku salemu, shimapepo wa kwa Lesa wasumbukisha, uwakumenye Abraham akobwela mukwipayaula ishamfumu no kumupala ye. ² Nikuli ye eku Abraham epele ice kumi ca pali fyonse. Pakubala, ukupikululwa kwe shina lyakwe kwalokupilibula ati, " Imfumu ya bololoke"; nakambi ye ali ni " Mfumu ya ku salemu," ekweba ati, " Imfumu ya mutende." ³ Takwatapo wishi, takwatapo nyina, takwatapo fikolwe, talipo na kutampa kwa nshiku nangula impelo ya mweo. Sombi, ye apalile umwana waku Lesa, pantu aba ni nshimapepo umuyayaya. ⁴ Boneni ifi akulishe ngu muntu uo icikolwe Abraham apele ice kumi ca mufi afumishe mu bulwi. ⁵ Ifunde lifwaya aba ntuntuko yaku Lebi abapoke incito ya bu shimapepo ukulokupoka ice kumi ku bantu, ekweba ati, kuli ba wabo, nangula cibe nabo, cimo cine, bamubutuntuko bwa kwa Abraham. ⁶ Lelo Melkisedeki, uutapendelwepo ukufuma muli bo, kapokelela ice kumi kuli Abraham, no kumupala ye, oyo uwali ne filayo. ⁷ Tapapo ukukana ati umuntu uucepeleko apalwa ku muntu uukulile pali ye. ⁸ Muli nji nshila, abantu abafwa balapokelela ice kumi, lelo muli njilya yo, calishimikilwe ukweba ati wa mweo. ⁹ Nakambi, mu nshila yakulabilimo, Lebi, uwalokupoka ice kumi, naye alokupela ice kumi ukupitila muli Abraham, ¹⁰ pantu Lebi ali mu mubili wa fikolwe fyakwe ulo Melkisedeki akumenye Abraham. ¹¹ Nomba kani bu kaele bwalikubela muli bushimapepo bwa bwina Lebi (eco muli nci abantu balokupokelela ifunde), mba nindo kwali nokubela kukabila nakumbi ukwa ku shimapepo ukwima mu bukonkani bwa kwa Melkisedeki, nakambi ukutabapo wa mu bukonkani bwa kwa Aaron? ¹² Pantu ulo bushimapepo bwapilibulwa, ifunde nalyo lilingile ukupilibulwa. ¹³ Pantu oyo mfi fintu filabilwapo wa mu mukowa umbi, ukutaafumapo nangula umo uwa kubombela pa cipailo. ¹⁴ Nomba cishibikilwe bwino ni muli Yuda emo Imfumu yafyelwe, umukowa uyo Mose tashimbwilepo palwa ba shimapepo. ¹⁵ Ifitulabila fyabwenekesha kani naumbi shimapepo aima mucimpashanya ca kwa Melkisedeki. ¹⁶ Tayalipo mafunde ya buntunse yamupangile ukuba shimapepo, lelo caimakene pa maka ya mweo wa muyayaya. ¹⁷ Pantu amalembo alacita ubumboni pali ye: Niwe shimapepo umuyayaya ukulingana no bukonkani bwa kwa Melkisedeki. ¹⁸ Ilamuno lyapakubala lilibikilwe pa mbali pantu talikwetepo amaka nakambi lya cabecabe, ¹⁹ (pantu ifunde talyawemyepo nangu cimo), lelo icitetekelo iciweme cililetelwe, muli ceco tupalamininamo apepi kuli Lesa. ²⁰ Nakambi tacalipo apatapo mulapo! Bambi babele bashimapepo apatalipo mulapo nangula umo, ²¹ lelo ye abele shimapepo ulo Lesa amwebele ati, " Imfumu ililapile nakambi taiko alulapo amano aiko: 'niwe shimapepo umuyayaya'" ²² Pali nci Yesu naye kapela ne shininkisho ca cipangano iciweme. ²³ Bashimapepo ba pakutampa balokuba abengi mu mpendwa, apo imfwa yalokubakanya ukupitilisha ukwikalilila mu ncito. ²⁴ Lelo pantu Yesu alikalilila umuyayaya, alikwata bushimapepo bwa mutatakuya. ²⁵ Eco ye nakambi alikwete amaka akupususha umupwilapo babo abesa kuli Lesa muli ye, pantu ye cina nshita alabapapatilako. ²⁶ Pantu calilingile ukweba ati tulingile ukukwata shimapepo wa musango ngu, uushilile, uutakwetepo kalema, uwakaele, uupatukile ku babembu, nakambi uwasumbulwa ukucila pa myulu. ²⁷ Ye tafwaikapo, kubati ni shimapepo mukulu, ukulokupela amalambo cina bushiku, pa kubala pa membu shakwe umwine, panuma pa membu sha bantu. Acitile mfi umuku umo epela ulu aipele umwine enka. ²⁸ Pantu ifunde lisonta ukuba bashimapepo abalalume abakwete ubunake. Lelo icebo ca mulapo, icaishile panuma ye funde, asontele umwana, uubacitile uufikilepo umuyayaya.