¹ Eco, katufumeko kumasambililo aapakabala aya kwa Yesu no kutelela kuntanshi mukukula. Tulokubikapo nakambi pa mufulwa wa kulapila ukufuma ku milimo iifwile ne citetekelo ca kuli Lesa. ² Kati napa mufulwa wa fisambilisha fya mbatisho, nefya kutambikapwe minwe, fyakushikukwa ukufuma kuba fwile, nafyo no kupingwilwa ku ciyayaya. ³ Nakambi twakucita fyenkefyo kati Lesa asuminisha. ⁴ Kati cili cafishye kuli mbo bonse mbo abasakamikilepo, mbo abasondelepo kufwa bupe bwa mwiulu, mbo abalikwabanako icabupe ca kuli Mupashi uwashila. ⁵ Nakambi mbo abasondelepo imilimo yaku Lesa iyelele nakambi amaka ankulo ishikoisa. ⁶ Nomba kuli mbo afutukileko - cili cafishye ukubwela nakambi mukulapila. Nipali nci pantu bakotanika umwana waku Lesa abene benka nakambi, no kumusebanya pacintu bwingi. ⁷ Pakwebati umushili uukonwa amenshi a kumfula iikolokelapo lonse, ulakwata namaka aakumesha ifilyo ifiweme kuli mbo aba lima ngu mushili uupokelela ipalo lya ku Lesa. ⁸ Nomba kati ukotwala imyunga ne filaso, ninshi walukoso ne tipu lilipalamine, impelo yaiko kuikoleka bwaka. ⁹ Nomba twapelenganishiwa pali mfi fintu ifiweme mfi pali mwe, mwe banensu, mfi fintu ifye pusukilo, nangu ca kwebati tukolabila ifipalene namfi. ¹⁰ Pakwebati Lesa tabapo uutalungemepo, tekutipo alabukilepo imilimo yenu ne citemwiko ico mwalikulangulusha mwishina lyakwe, pantu mwali kubombela abantu bakwe aba shila, nakambi mu kobabombela. ^{11 12} Tukofwaisha sana ukwebati umo umo muli mwe alokulangisha ukukoselesha kwakwe nko ukufuma kumpelo, pa kwebati isubilo lyenu lifikepo. Nci ecikolangisha u kwebati tekutipo mube abanag`ani, lelo kutekanya bali nimpyani shafilayo. ¹³ Pantu Lesa pakupanga nci cilayo kuli Abrahamu, kalapo mwine, pakwebati takupo umbi uwo angalapako uumucililepo. ¹⁴ Kaeba ati "ukwebesha nakukupala no kukukosha impendwa shobe". ¹⁵ Muli nji nshila yenka, Abrahamu kapokelela ico alailwe pakwebati alikulinda mumutekatima. ¹⁶ Pakwebati abantu balalapa kuli ngo uukulilepo palibo. Napampelo ya fitala fyakulibo fyonse, icilapo ecibomba kubati kusuminisha. ¹⁷ Ulo Lesa asalapo ukulangisha bune bune mpyani sha malayano tekutipo pafyo apangile ukucita, alabikapo umulapo. ¹⁸ Acitamfi pakwebati pali mfi fibili takupo cingalululwa - pakwebati cafishe kuli Lesa ukubepa fwe, ba butukile ku cintelelwe, tukwete inkosho no kwikata no mukonsha kwisubilo ilyo batubikile. ¹⁹ Nci ico tuli naco kubati cakulinda nokwikatila umutima, isubilo lyaba muncende yamukati. ²⁰ Ulo Yesu, watangile aingile pali fwe, aingile mucifulo cesu, pakuti abe ninshimapepo umukulu ukuciluka pali Melchizedek.