¹ Enco, apo icilayo cakwingila mukutusha kwakwe cicili cikosuminishiwa ukwimakana, tulokuba abacenjele ukwebati nangula umo pali mwe ebonekapo kubati aputukilwa. ² Pantu twalibilile mbila iiweme ifi nabo baebelwe. Nomba njilya mbila taya afwilepo mbalya abataikatenepo mu cicetekelo na mbalya abaumfwile. ³ Pantu fwe fwebasumina twingila muli nkulya kutusha, nga mfilya alabile, "mfi nalapila mubukali bwandi, tabakengilepo mukutusha kwandi". Fyenka mfyo, incito shakwe shalipwile ukutula pa kutampa kwa calo. ⁴ Pantu alilabile pambi palwa bushiku bwa cine lubali: "Nakambi Lesa katusha pa bushiku bwa cine lubali ku ncito shakwe shonse". ⁵ Elo nakambi muli ndi lyashi kalabila, "Tabakengilepo mukutusha kwandi". ⁶ Eico, cashalila bambi ukwingila muli nkulya kutusha, nakambi mbalya mbo nku kunuma imbila iiweme kaibilwa kuli bo tabaingilepo pa kutomfwilapo kwabo. ⁷ Penkapo Lesa nakambi kasonta akasuba kambi, ukuketa ukwebati, "Akalelo," ulu alabile ukupitila muli Davidi panonuma mu mashiwi aya labilwe kale: "Lelo kati mwaumfwa ishiwi lyakwe, mukoshapo mitima yenu". ⁸ Nga chakuti Yoshua kabapelwa ukutusha, Lesa ngatalabilepo ulwa kasuba nakambi. ⁹ Eco kulishele Isabata lyakutusha ilya ilyasungilwa abantu baku Lesa. ¹⁰ Pantu ye uwaingila mu kutusha kwa ku Lesa ninshi ye umwine naye atushako ku ncito shakwe, ifi na Lesa atushishe kushakwe. ¹¹ Eco, katulokuipamfya ukwingila muli nkulya kutusha, ukwebati nangula umo ekawilapo mu musango wabucintomfwa mbo abo bacita. ¹² Pantu imbila yaku Lesa ya bumi nakambi iicincile nakambi iitwile ukucila icimaye cacitwile kubili. Cipulinkanya nakukupatukanya kwa mweo no mupashi, amafupa na tompwe cileshiba namatontonkanyo namapange ya mutima. ¹³ Takupo icintu icapangwa icafisama kuli Lesa. Nomba, ye fyonse filaboneka nakambi fili apatubile ku menso ango uutwakulondololako. ¹⁴ Eico, apo tulikwete shimapepo umukulu uwapita mu myulu, Yesu umwana waku Lesa, tulokwikatisha kukuisosela kwesu. ¹⁵ Pantu tatukwetepo nshimapepo uutangomfwapo nkumbu pa bunake bwasu. Nomba ye, tulikwete umo uubaesha munshila shonse kubati fintu nafwe batwesha, nomba ye takwetepo. ¹⁶ Katulokuya no kucetekela ku cipuna ca nkumbu sha kwafwa munshita ya kukabila.