¹ Yahweh kalabila kuli Noah ati, "Isa, we naba mu nganda yobe yonse, mu bwato, pantu ndibwene ukweba ati uli ololokele kuli nebo muli njino nkulo. ² Pali shonse nama ishisangulukile ukaletepo ishalalume cinelubali ne shanakashi cinelubali. Ukufuma ku nama ishitasangulukilepo, kuli sho ubuleko shibili, iyalalume ne ikashi yaiko. ³ Nakambi ku fyuni fya mwiulu, uleteko ifyalalume cinelubali ne fyanakashi cinelubali, ekusungilila umbuto sha shiko ponse pa calo. ⁴ Pantu mu nshiku cine lubali nkoleta imfula pa calo pa nshiku amakumi yane kasuba no bushiku. Nakonaula panshi pa calo fyonse likoso ifi napangile." ⁵ Noah kacita fyenke fi Lesa amukonkobeshe. ⁶ Noah kali ne myaka imyanda mutanda ulo ilyenshi lyaishile pa calo. ⁷ Noah, abana kakwe, umukashi wakwe, na bakashi ba bana bakwe ka bengila mu bwato pamo pamulandu wa menshi ya lyenshi. ⁸ Inama ishisangulukile ne nama ishitasangulukapo, ifyuni, na fyonse likoso ifi ikulanya pa calo, ⁹ fibili fibili, icalalume ne canakashi, kafisa kuli Noah no kwingila mu bwato, fyenke ifi Lesa akonkobeshe Noah. ¹⁰ Kacisa kaciba ati panuma ya nshiku cinelubali, amenshi ya lyenshi kayesa pa calo. ¹¹ Mu mwaka walengele imyanda mutanda ku nshiku sha kwa Noah, mu mwenshi wa cibili, pa bushiku bwalengele ikumi na cinelubali ku mwenshi, kenkako kasuba, tonse utumfukumfuku twa panshi katwisuka, ne fipunda fya mwiulu kafisuka. ¹² Imfula kaitampa no kuloka pa calo pa nshiku amakumi yane akasuba no bushiku. ¹³ Pali kenka nkalya kasuba Noah na bana bakwe, Shemu, Hamu, na Yafeti, na muka Noah, na bakashi ba bana bakwe batatu nabo pamo, kabengila mu bwato. ¹⁴ Kabengila pamo ne nama sha mu mpanga ukulingana no musango wa shiko, ne mishobo ya fitekwa ukulingana no musango wafiko, ne fi ikulanya pa calo ukulingana no musango wafiko, ne mishobo ya fyuni ukulingana no musango wafiko, icibumbwa conse ica mapindo. ¹⁵ Fibili pa fya mubili fyonse umwali umweo kafisa kuli Noah no kwingila mu bwato. ¹⁶ Inama ishaingilemo shalokuli ishalalume ne shanakashi pa fya mubili fyonse; Kafingila mu kati fyenke fi Lesa amukonkobeshe. Elo Yahweh abesalileko icibi. ¹⁷ Elo ilyenshi lyaishile pa calo pa nshiku amakumi yane, na menshi ka afula no kwimya ubwato no kubusanswila peulu. ¹⁸ Amenshi ka afimbilisha ukukumana pa calo, no bwato kabulo kuseela peulu ya menshi. ¹⁹ Amenshi kayema ukwakuti pa calo icakweba ati ne mpili ishatalimpile ishalokuli munshi ye ulu kashibila. ²⁰ Amenshi kayema imatabi ikumi na yasano ukufuma peulu ya mpili. ²¹ Fyonse ifya mweo ifyalokwenda pa calo kafifwa - ifyuni, ifitekwa, inama sha mpanga, ifibumbwa fya mweo fyonse ifyalokwikala ifingi pa calo, na bantu bonse. ²² Fyonse ifibumbwa fya mweo ifyalokwikala pa nshi, ifyalokupema umwela mu myona yafiko, kafifwa. ²³ Eci fyonse ifya mweo ifyali panshi pa calo ye ka fifumyapo, abantu ne nama ne fi ikulanya ne fyuni fya mwi ulu. Fyonse kafyonaulwa ukufuma pa calo. Enka Noah na bali nakwe mu bwato eba shelepo. ²⁴ Amenshi aikele pa calo pa nshiku umwanda umo na makumi yasano.