¹ Kaciba panuma ya mfi fintu, umbi kaeba Yosefe ati, "Lolesha, wiso mulwele." Efi aile pamo naye abana bakwe babili, Manase na Efraim. ² Ulo Yakobo bamwebele ati, "Cebeni, umwana wenu Yosefe aisa mukumubona," Israeli kakwata amaka no kwima pa bulo ³ Yakobo kalabila kuli Yosefe ati, "Lesa wa maka yonse alibonekele kuli nebo pa Lusi mu calo ca Kenaani. Alimpalile ⁴ no kunjeba ati, 'Bona, nakupala ubufyashi bobe, no kukufusha. Muli we nakulonganya inko. Nkapa nci calo ku bana bobe ukuba icakukwata umuyayaya.' ⁵ Nomba abana balalume bobe babili, abo wafyalile mu calo ca Egypt ninshi nshingaisa kuli we mu Egypt, bandi. Efraim na Manase bakuba bandi, fyenka ifi Rubeni na Simeoni baba bandi. ⁶ Abana wakwata panuma yabo bakuba bobe; bakutantikwa pa mashina ya bakwabo mu fyakupyana. ⁷ Lelo nebo, ulo naishile ukufuma ku Padan Aram, ku bulanda bwandi Rakelo afwilile mu calo ca Kenaani mu nshila, ninshi katuli akatalamukila ukufika ku Efrata. Namushikile nkulya mu nshila ya ku Efrata" (e Betelehemu). ⁸ Ulo Israeli abwene ba mwana Yosefe, kalabila ati, "Ba kwani mba?" ⁹ Yosefe kalabila kuli wishi ati, "Bana bandi, abo Lesa ampela nkuno." Israeli kalabila ati, "Balete nkuno, ukweba ati mbapale." ¹⁰ Nomba amenso yakwa Israeli tayalo kubweneshapo pa mulandu wa bukote, efi talokubonapo. Efi Yosefe abapalamishe pepi nakwe, naye ka bafyompa no kuba kumbatila. ¹¹ Israeli kalabila kuli Yosefe ati, "Nshacetekelepo ati nakubonapo icinso cobe nakabili, lelo Lesa ansuminisha no kubona abana bobe." ¹² Yosefe kabafumya pakati ka makufi yakwa Israeli, elo aineme ne cinso cakwe panshi. ¹³ Yosefe ka babula bonse, Efraim ku kuboko kwaku kulyo kwakwe ukulola ku kuboko kwa ku kuso kwakwa Israeli, na Manase ku kuboko kwa ku kuso ukulola ku kuboko kwa ku kulyo kwakwa Israeli, no kubapalamisha kuli ye. ¹⁴ Israeli katambika ukuboko kwa ku kulyo kwakwe no kubika pa mutwi wakwa Efraim, uwali umwaice, no kuboko kwa ku kuso pa mutwi wa kwa Manase. Kapilinganya amaboko yakwe, pantu Manase ali e beli. ¹⁵ Israeli kapaala Yosefe, kalabila ati, "Lesa uwalokwenda na bata Abraham na Isaki, Lesa uwansunga ukufika na nkano kasuba, ¹⁶ malaika uwancingilileko ku kusanswa konse, kapaale mba balumendo. Lekeni ishina lyandi linikwe pali bo, ne shina lyaku bata Abraham na Isaki. Lekeni bakakule no kufula pa calo." ¹⁷ Ulo Yosefe abwene wishi abika ukuboko kwaku kulyo kwakwe pa mutwi wakwa Efraim, kacimukalipa. Kabula ukuboko kwakwa wishi ukukutesha ukufuma pa mutwi wakwa Efraim ukubika pa mutwi wakwa Manase. ¹⁸ Yosefe kalabila kuli wishi ati, "Te mfipo, mwe bata; pantu ngu e beli. Bikeni ukuboko kwenu ukwa ku kulyo pa mutwi wakwe." ¹⁹ Wishi kakana no kulabila ati, "Ndishibile, we mwana wandi, ndishibile. Naye akuba luko, nakambi naye akuba umukulu. Nomba umwaice akukulisha ukumucila, na bana bakwe bakuba icitintangombe ca nko." ²⁰ Israeli ka bapaala nkalya kasuba na nga mashiwi, "Abantu ba mu Israeli balo kulabila amapalo mu mashina yenu ati, 'Lesa amucite kubati ni Efraim na Manase'." Muli nji nshila, Israeli abika Efraim pantanshi yakwa Manase. ²¹ Israeli kalabila kuli Yosefe ati, "Bona, ndi mu kufwa, lelo Lesa alokuba nobe, nakambi akukubwelesha ku calo ca fikolwe fyobe. ²² Kuli we, we uli peulu ya bakwanu, napela amatelo ya lupili ayo napokele ku bena Amori ku lupanga lwandi no buta bwandi."