¹ Elo Yosefe aingile no kweba Farao ati, "Bata na bakwasu, impaanga shabo, ingombe shabo, na fyonse likoso ifi bakwata, bafika ukufuma ku caloca Kenaani. Boneni, bali ku ncende ya Gosheni." ² Kabula abakwabo basano no kubalondolola kuli Farao. ³ Farao kalabila ku bakwabo ati, "Nincito ndo mubomba?" Kabalabila kuli Farao ati, "Abasha benu ni bakacema, kubati fikolwe fyesu." ⁴ Elo balabile kuli Farao ati, "Twishile ukwisa mukwikalako panono muno calo. Takwabapo umwemfu wa fitekwa fya basha benu, pa mulandu wa cipowe icikulu icili mu calo ca Kenaani. Kanshi nomba, lekeni abasha benu bekaleko mu mpanga ya Gosheni." ⁵ Elo Farao alabile kuli Yosefe, ati, "Ba wiso na bakwanu baisa kuli we. ⁶ Icalo ca Egypt cili mu maboko yobe. Bika ba wiso na bakwanu mu ncende ishiweme, incende ya Gosheni. Kani epabali abakosele pali bo, leka balokumbwenako ifitekwa." ⁷ Elo Yosefe aingishe Yakobo wishi no kumutwala kuli Farao. Yakobo kapaala Farao. ⁸ Farao kalabila kuli Yakobo ati, "Waikala imyaka inga?" ⁹ Yakobo kalabila kuli Farao ati, "Mu kwendauka kwandi ndi ne myaka 130. Imyaka ya mweo wandi yaliba iinono nakambi ya kukalipwa. Tayabapo iingi kubati ya fikolwe fyandi." ¹⁰ Elo Yakobo apalile Farao no kufumapo pa cinso cakwe. ¹¹ Elo Yosefe apokelele ba wishi na bakwabo. Kabapela icifulo mu calo ca Egypt, apaweme, mu ncende ya Ramese, ifi Farao amukonkobeshe. ¹² Yosefe kapela wishi ifilyo, abakwabo, na bonse aba mu nanda yakwa wishi, ukulingana ne mpendwa ya bobalokusunga. ¹³ Nomba takwalipo ifilyo mu calo conse; pantu icipowe calicililemo. Icalo ca Egypt ne calo ca Kenaani kafitenkana pa mulandu wa cipowe. ¹⁴ Yosefe kakolonganya indalama shonse ishali mu calo ca Egypt namu calo ca Kenaani, pakushitisha ifilyo ku bekashi ba mu calo. Elo Yosefe aletele indalama kwisano kuli Farao. ¹⁵ Ulo indalama shonse isha calo ca Egypt na Kenaani shashilile, bonse abena Egypt kabesa kuli Yosefe no kulabila ati, "Tupeleko ifilyo! Nindo twalokufwila mu menso yobe pantu indalama shesu shilishilile?" ¹⁶ Yosefe kalabila ati, "Kani indalama shenu shilishilile, leteni ifitekwa fyenu nande nkomupa ifilyo ukushitula ne fitekwa fyenu," ¹⁷ Efi baletele ifitekwa fyabo kuli Yosefe. Yosefe kabapa ifilyo ukushitula naba kabalwe, impaanga, ingombe, ne mpunda. Kalokubalisha ifilyo muku shitula ne fitekwa fyabo ngulya mwaka. ¹⁸ Ulo ngulya mwaka washilile, kabesa kuli ye umwaka wakonkelepo no kumweba ati, "Tatwafisepo kuli shikulu wandi ukweba ati indalama shesu shonse shalipwa, na matanga ya ngombe yakwa shikulu. Tapapo ifishelepo ifimungabona shikulu, sembi yenka imibili yesu ne mpanga shesu. ¹⁹ Nindo twakufwila mu menso yenu, fwebo pamo ne calo cesu? Tushiteni fwe pamo ne mpanga shesu ukushitula ne filyo, nafwe ne mpanga shesu tube abasha kuli Farao. Tupeni imbuto ukweba ati twikale nakambi tufwapo, no kweba ati icalo cibapo umutapo cintu." ²⁰ Efi Yosefe ashitiile Farao icalo conse ica Egypt. Pantu onse umwina Egypt alishitishe mpanga yakwe, pantu icipowe calicililemo sana. Muli nji nshila, Icalo kaciba cakwa Farao. ²¹ Abantu bo, kabapanga abasha ukufuma kumpelo ya calo ca Egypt ukufika ku mpelo inakwe. ²² Ni mpanga yaba shimapepo likoso eyo Yosefe tashitilepo, pantu bashi mapepo balokupoka icilambu. Balokulya ica kupenda ici Farao alokubapela. Eco taba shitishepo impanga yabo. ²³ Elo Yosefe alabile ku bantu ati, "Boneni, lelo nashitila Farao mwebene pamo ne mpanga yenu. Nomba namupa imbuto, namwe mukobyala mu mushili. ²⁴ Pakusombola, mwakupa ifyakwabanya cimo pali fisano kuli Farao, Ifili fine fyenu, imbuto sha mu mushili ne filyo fya ba mu nanda shenu na bana benu." ²⁵ Kabalabila ati, "Wapususha imyeo yesu. Katusange uluse mu menso yobe. Tukoba abasha bakwa Farao." ²⁶ Efi Yosefe apangile icipope icabako mu calo ca Egypt ukufika na nkano kasuba, ukweba ati cimo pali fisano cakwa Farao. Yenka likoso impanga ya bashimapepo eitalipo yakwa Farao. ²⁷ Efi Israeli aikele mu calo ca Egypt, mu mpanga ya Gosheni. Abantu bakwe kabanonka nkulya. Kabafyalana no kufulisha. ²⁸ Yakobo aikele mu calo ca Egypt imyaka ikumi limo na cinelubali, efi imyaka ya mweo wakwa Yakobo yali umwanda umo na makumi yane na cinelubali. ²⁹ Ulo inshita yapalamine iya kwa Israeli ukufwa, kaita umwana wakwe Yosefe no kumweba ati, "Kani nomba ndisangile uluse mu menso yobe, bika ukuboko kobe panshi ya cibelo candi, no kundanga bucishinka no kutetekelwa. Napapata ukanshikapo mu Egypt. ³⁰ Ulo nakulala kuli bata, ukampinte ukufuma mu Egypt no kunshika uko bashikile ifikolwe fyandi." Yosefe kalabila ati, "Nakucita fyenka ifimwalabila." ³¹ Israeli kalabila ati, "Lapa kuli nebo," Na Yosefe kalapa kuli wishi. Elo Israeli ainamine panshi pa mitwe ya bulo bwakwe.