¹ Elo Yosefe afililwe ukuteka umutima pa menso ya basha abaimakene pepi naye. Kabilikisha ati, "Bonse likoso muntalamuke." Efi patashelepo nangula umo ulo Yosefe ailondolwele ku bakwabo. ² Kalilisha umusowa, abena Egypt kabomfwa, naba nanda yaku Farao kabacumfwa. ³ Yosefe kalabila ku bakwabo ati, "Nine Yosefe. Napo bata ekubaba?" Abakwabo kabafilwa ukumwasuka, pantu kabafulungana pa menso akwe. ⁴ Elo Yosefe alabile ku bakwabo ati, "Palamineni kuli nebo, nkomulomba." Kabapalamina. Ye kabeba ati, "Nine Yosefe umukwanu, uumwashitishe ku baku Egypt. ⁵ Mubombomanapo nangula ukukalipa mwenka pafi mwe mwanshitishe nkuno, pantu Lesa antumine ukutangila ukwisa kusunga imyeo. ⁶ Pantu njino myaka ibili icipowe caliba muno calo, nakambi kucili imyaka isano umutakabepo kulima no kusombola. ⁷ Lesa antumine ukutangila mukumupekanish pakuba abakushalapo pa calo, no kumusunga abatuntulu mukupokololwa ukwine kantu. ⁸ Eci tamulipo mwe mwantumine nkuno ni Lesa, naye alindenga ukuba wishi kuli Farao, umukulu wa nanda yakwe yonse, nakambi kateka wa calo ca Egypt. ⁹ Mwendeshe no kuya kuli bata no kubeba ati, 'Mfi efi umwana wenu Yosefe alabile, "Lesa alincita umukulu mu Egypt monse. mukese kuli nebo, mukakokolapo. ¹⁰ Mwalokwikala mu mpanga ya Gosheni, nakambi mwalokuli pepi nande, mwe na bana benu na bana ba bana benu, na matanga ya mpanga shenu ne ngombe shenu, na fyonse ifimuli nafyo. ¹¹ Nalokumusunga nkuno, pantu kucili naimbi imyaka isano iya cipowe, ukweba ati mu kaculapo, mwe, naba mu nanda yenu, na fyonse muli na fyo.'" ¹² Kamulolesha, amenso enu akobona, na menso ya mukwasu Benjamini, ukweba ati kanwa kandi kakolabila kuli mwe. ¹³ Mukabebe bata pa bucindami bwandi bonse mu Egypt na fyonse likoso ifimwabona. Mwendeshe no kuleta bata nkuno." ¹⁴ Kakumbatila umukwabo Benjamini mumukoshi no kulila, na Benjamini naye kalila mumukoshi wakwe. ¹⁵ Kabafyompa bonse abakwabo no kubalangulukila. Panuma ya mfi abakwabo kabalabila nakwe. ¹⁶ Ndi lyashi lya ngu mulandu kalishibwa ku nanda yaku Farao: "Abakwabo baku Yosefe baisa." Kacilenga Farao na basha bakwe ukumfwa bwino sana. ¹⁷ Farao kalabila kuli Yosefe ati, "Eba abakwanu, 'Citeni nci; Twikeni inama shenu no kuya ku calo ca Kenaani. ¹⁸ Mukapinte wishinwe naba nanda shenu no kwisa kuli nebo. Nakwisa kumupa ifiweme fya mu Egypt, nakambi mwakwisa kulya ifinonene fya calo.' ¹⁹ Nomba mwakonkobeshiwa, 'Citeni nci, pinteni ngolo ukufuma mu calo ca Egypt shabana benu na bakashi benu. Mukabule ba wishinwe no kwisa. ²⁰ Mukasakamanapo pa fimwakwata, pantu ubune bwa calo ca Egypt bonse bwenu.'" ²¹ Abana baku Israeli efibacitile. Yosefe kabapela ingolo, fyenke fi Farao alabile, nakambi kabapela ifya kupinta pa bulwendo. ²² Kuli bonse umo umo kapela ifyakufwala pa bulwendo, lelo kuli Benjamini kapela silufele imyanda itatu nefyakufwala fisano. ²³ Kuli bawishi katuma mfi: Bakabalwe ikumi kaisusha ne fiweme fya calo ca Egypt; nabakabalwe banakashi ikumi kaisushamo ne filyo, umufuba, nafimbi ifyaba wishi pa bu lwendo ²⁴ Efi aebele abakwabo ukuya nabo kabaya. Kalabila kuli bo ati, "Tekwesha ukutosha munshila." ²⁵ Kabafuma mu calo ca Egypt no kufika ku calo ca Kenaani, kuli Yakobo wishibo. ²⁶ Kabamweba ati, "Yosefe eko aba, nakambi emukulu pa calo conse ica Egypt."Umutima wakwe kaupapa, pantu ye tacetekelepo ifi bamwebele. ²⁷ Kabamweba onse amashiwi akwa Yosefe ayo alabile kuli bo. Ulo Yakobo abwene ingolo ishi Yosefe atumine ku kwisa kumupinta, umupashi waku Yakobo wishibo kaubuka. ²⁸ Israeli kalabila ati, capwa. Yosefe umwana wandi epo acili. na kuya kumubonapo apo nshingafwa."