1 Caishile kuba mfi kumpelo ya myaka ibili iikumanine ulo Farao alotele icoshi. Boneni, ye kaimakene ku kululamba. 2 Boneni, ing`ombe cine lubali ka shifuma mu mulonga, shikoboneka bwino nakambi ishinine, elo shikoenda mu matete. 3 Boneni nashimbi ng`ombe cine lubali kashifuma mu mulonga kashikonkamo, ishondele elo ishitalikubonekapo bwino. Kashilya kashimakana ukwali ng`ombe shimbi ku lulamba lwa nika. 4 Elo nomba in`ombe ishitalikubonekapo bwino nakambi ishondele kashilya in`ombe cine lubali ishali shinine no kuboneka bwino. 5 Elo Farao abukile mutulo. Elo ye alele nakambi kalota ulwa konkelepo. Boneni imitwi cine lubali ilyanseke kaifuma mu mulupimbilumo iikoboneka bwino. 6 Boneni imitwi cine lubali, iyondele nakambi iyali kutenkana kuli kabesha wa ku kabanga, Kaisa kuwila pali yo. 7 Imitwi yeyo iyalikuboneka ukucomonoka kaimina imitwi iyalikuboneka ukukula bwino. Farao kabuka mutulo, elo, boneni, kanshi cali coshi. 8 Caishile mukuba mfi muluchelo umupashi wakwe kauba mukushupika. Katuma abamukwita bonse abafinjelengwe nabalalume ba mu Egupt abacenjele. Farao kabalondolwela ifyoshi fyakwe, nomba tapalipo nangu umo uwapikulwile Farao. 9 Elo umukulu waba kasumika alabila kuli Farao ukwebati, "Lelo nalanguluka pa filubo fyandi. 10 Farao alikalipile ababomfi bakwe, elo alimposele muli bucitente mu nanda ya mukulu wafita, nebo elo namushika mukulu. 11 Bonse katulota icoshi muli mbo bushiku bwenka, ye nandebo. Twalilotele cina muntu ukulingana nefintu icoshi bangacipikulula. 12 Eko alinkulya mulifwe umulumbwana umu Hebrew, umubomfi wa mukulu wafita. Katumulondolwela ye elo kapikulula ifyoshi fyesu. Apikulwile kuli cina muntu ukulingana ne coshi cakwe. 13 Caishile kuba mfi ukwebati atupikwile fwe, kafisa kaficitika. Farao alimbweleshe apo nali kubomba, nomba umbi kabamu kulika" 14 Elo Farao katuma amukwita Yesefo. Bwangu bwangu kaba mufumya umwa kulindilwa. Kabeyele umwine, nefyakufwala kafwala fimbi, kaisa kaingila na muli Farao. 15 Farao Kalabila kuli Yosefe ukwebati, "Nalilotele icoshi, nomba uwakucipikulula tapapo. Nomba ndyumfwile pa mulandu wakuli we, ukwebati uwaumfwa icoshi uungapikulula". 16 Yosefe kaasuka Farao, kalabila ukwebati, "tenebopo. Lesa kuti aasuka Farao mu mutende". 17 Farao kalabila kuli Yosefe ukwebati, "mu coshi candi, bona, kanjima kululamba lwa Nile. 18 Bona ing`ombe cine lubali shikofuma mu Nile, ishinini elo ishikoboneka bwino, elo shikonde mu matete. 19 Bona, ing`ombe neshinakwe cine lubali shikofuma ukukonka palinsho, ishondele, ishitakobonekapo bwino, ishitakwetepo namaka. Nshabonapo mu calo conse ica Egypti ishitakobonekapo bwino kubati nisesho. 20 Ing`ombe shesho ishondele nakambi ishitalikubonekapo bwino kashilya ishabalilepo ishinini ishiweme mukuboneka. 21 Ulo shalile ukupwa shonse, tacaishibikilwepo ukubati, shalya ishinankwe, pantu kashilokuboneka ukondoloka fyenka ifishali ninshi tashingalya ishinankwe. Elo nabukile mutulo. 22 Nkandolesha mu coshi candi, elo, boneni, imitwi cine lubali kaifuma ukuwa pa lupimbili lumo, iisuma mukwiula. 23 Boneni, imitwi naimbi cine lubali iitotele, iyondele nakambi no kupintwa nomwela wakukabanga ukwisa pali ye. 24 Imitwi cine lubali iyondele kaimina imitwi cine lubali iiweme. Nalondolwele mfi fyoshi ba finjelengwe, nomba nangu umo tapalipo wakupikulula kuli nebo". 25 Yosefe kalabila kuli Farao ukwebati, "ifyoshi fya ku Farao tafipusenepo. Ifi Lesa atantikile ukucita, alilondolwele kuli Farao. 26 Ing`ombe cine lubali ishiweme myaka cine lubali, elo ne mitwi cine lubali myaka cine lubali. Mfi fyoshi fimo likoso. 27 Ing`ombe cine lubali ishondele ishitawemepo ishatuminwe panuma yashinakwe, myaka cine lubali, elo nakambi imitwi cine lubali yondele ya mintilwe ku mwela wakukabanga yakuba myaka cine lubali iya cipowe. 28 Nci e cintu nalabilepo kuli Farao.Imfi Lesa atantikile ukucita alifisulwile kuli Farao. 29 Bona, imyaka cine lubali iyafyakulya ifingi ya kwishila mu calo conse ica Egypt. 30 Imyaka cine lubali nji ya cipowe yakwisa kukonkapo pali njoo, elo nefilyo ifingi teti kukabepo ukufibukisha mu calo ca Egypti, elo ne cipowe icikulu cakukumana icalo. 31 Ubwingi bwa fyakulya tekuti kukabepo ukubwibukisha mu calo pamulandu wa cipowe cakwisa kukonkapo, pantu co cakucilamo ukukosa. 32 Kanshi icoshi calikubwelelapo kuli Farao ni pamulandu wa kwebati nci cintu calibikwa na Lesa, nakambi akucicita bwangu. 33 Nomba lekeni Farao afwayepo muntu wamano nakambi uukutulukile, amubike ye pa calo conse ca Egypti. 34 Lekeni Farao asonte ba cilolo pa calo, elo mbo balokubulako icapali fisano pa fisabo fya Egypti mu myaka cine lubali iya filyo ifingi. 35 Lekeni bo balokubika pamo ifilyo fyonse fya mulinji myaka iiweme iikoisa nolusunga inseke mumaka akwa Farao, ifilyo fyakwisa mukulya mu misumba. Balingile ukusunga. 36 Imfi filyo fyakwisa kuba fya ku kumanya icalo mu myaka cine lubali iya cipowe icakwisa kuba mu calo ca Egypti. Mulinji nshila icalo tekutipo cikonaikepo ku cipowe." 37 Nku kupandwa kwa mano kwaliweme mu menso aku Farao elo na mu menso aba bomfi bakwe bonse. 38 Farao kalabila kubabomfi bakwe ukwebati, "Napo tungasangapo umuntu uuli kubati ningu, muli ye muli umupashi waku Lesa?". 39 Eco Farao kalabila kuli Yosefe ukwebati, pakuti Lesa akulanga mfi fyonse we, tapapo naumbi uukutulukile nakambi uwamano kubati niwe. 40 Wakuba umukulu pananda yandi, nakambi ukulingana na kwishiwi lyobe abantu bandi bonse balikutekwa. Ukufumyako lukoso mu cipuna emo nalikukucilapo kubukulu". 41 Farao kalabila kuli Yosefe ukwebati, "Bona, nakubika umukulu pa calo conse ca Egypti." 42 Farao kafula ne ninda munwe yakwe ukufuma ku minwe wakwe kaifwika napa munwe waku Yosefe. Kamufwika nefya kufwala fya kolokondwe ifiweme, nakambi nakambi nokumukobeka umunyololowa golide pa mukoshi wakwe. 43 Kamuteka na mwiceleta ili akwete ilya bubili. Abantu kabapunda ukubilikisha kuntanshi yakwe, "Fukameni kumakufi". Farao kamubika pa calo conse ca Egypti. 44 Farao kalabila kuli Yosefe ukwebati, "Ninebo Farao, elo ukufumyako we, takupo muntu uwakusumbula ukuboko kwakwe nangula ulukasa mu calo conse ca Egypti." 45 Farao kainika Yosefe shina lya "Zaphenath - Paneaoh". Kamupela Asenath, umwana waku Potiphera shimapepo waku On, kaba umukashi. Yosefe kafumina mu calo conse ca Egypti. 46 Yosefe ali ne myaka amakumi atatu ulo alimakene ku menso aku Farao, imfumu Yosefe kafumapo pamenso aku Farao, elo aendele mu calo conse ca Egypti. 47 Mu myaka cine lubali iya filyo icalo calikwete ubusomboshi ubwingi nganshi. 48 Alilonganikile ifilyo fyonse ifya myaka cine lubali ifyali mu calo ca Egypti nakambi kabika mu misumba. Kabikile mu musumba ifilyo fyafumine mu mabala aashingulukile umusumba. 49 Yosefe atutile inseke ubwingi kubati mucanga wa muli bemba, ubwingi ubwakwebati alilekele nokupenda, pantu kaficilamo ubwingi. 50 Yosefe kakwete abana babili ninshi imyaka ya cipowe taingaisa, babo mbo- Asenath, umwana umwanakashi uwakwa Potiphera shimapepo waku On, amufyalile. 51 Yosefe aninikile umwana wakwe umubele Manase, pantu ye alabile ukwebati, "Lesa alinengele ukulabukilako kuli fyonse fya kushupikwa napitilemo na fyonse fya munanda yakuba ta". 52 Ainikile neshina lya mwana uwabubili ati, Efraim, pantu alabile ukwebati, "Lesa alincitile ukuba umufyashi mu calo ca kucula kwandi". 53 Imyaka njilya iya filyo ifingi ifyali mulya mu calo ca Egypti kaifika kumpelo. 54 Imyaka cine lubali iya cipowe kaitampa, kubati nimfilya Yosefe alabile. Kamube cipowe muli fyonse fyalo, nomba mu calo conse ca Egypti ifilyo kafilimo. 55 Ulo icalo conse ca Egypti caponenwe cipowe, abantu kabatampa ukulilila kuli Farao palwa kufwaya ifilyo. Farao kalabila kubena Egypti bonse ukwebati, "kamuyeni kuli Yosefe - neco akoya kumweba ukucita mukacite. 56 Icipowe ka cikumana ponse pa calo. Yosefe kaisula amatala onse umwali ifilyo katampa ukushitisha kubena Egypti. Icipowe calikosele sana mu calo ca Egypti. 57 Bonse abamufifulo kabalokwisa ku Egypti mukushita ingano kuli Yosefe, pantu icipowe calikosele pano sonde ponse.