¹ Kaciba ati panuma ya mfi fintu, uwakwikata inkombo ya mfumu yaku Egypt no wakupanga umufuba wa mfumu kaba bembukila shikulu wabo, imfumu ya Egypt. ² Farao kakalipa sana pali mba abemakanishi bakwe, umukulu wabapekanya nkombo sha mwangashi no mukulu wabapanga umufuba. ³ Kababesalila mu nanda ya mukulu wa ba malonda, mu cifungo cimo cenka umwali Yosefe. ⁴ Umukulu waba malonda kapela Yosefe kuli bo, naye kalo kubabombela. Kabakokolamo mu cifungo. ⁵ Bonse babili kabalota ifiloto - uwalokupekanya inkombo sha mwangashi no walokupekanya imifuba ya mfumu ya ku Egypt abaisalilwe mu cifungo - cina muntu kalota iciloto cakwe mu bushiku bumo bwenka, na cina ciloto kacilokupilibula fimbi. ⁶ Yosefe kaisa kuli bo ulucelo no kubabona. Pa kubabona, kabali abakalipile. ⁷ Kaipusha mba abemakanishi baku Farao abalokuli nakwe mucifungo mu nanda yakwa shikulu wakwe, kalabila ati, "Nindo mukobonekela abakalipile lelo?" ⁸ Kabamweba ati, "Bonse babili tulilotele iciloto nakambi tapapo no wakucilondolola." Yosefe kalabila kuli bo ati, "Bushe ubulondoloshi tabulipo bwaku Lesa? Njebeni, namulomba." ⁹ Umukulu wa bakapekanya ba nkombo sha mwangashi kalondolola iciloto cakwe kuli Yosefe. Kaeba Yosefe ati, "Mu ciloto candi, boneni, umukuyu wasa mukuli pa ntanshi yandi. ¹⁰ Mu mukuyu, mwasamukuli imisambo itatu. Pa kupakula, ifipapa kafifumako ne fisankunta fya myangashi kafipya. ¹¹ Ulukombo lwakwa Farao lwasa mukuli mu munwe yandi. Nasakubula imyangashi no kufinina mu lukombo lwakwa Farao, nande nabika ulukombo mu minwe yakwa Farao." ¹² Yosefe kamweba ati, "Mbu e bulondoloshi bwa ciko. Imisambo itatu ni nshiku shitatu. ¹³ Mu nshiku shitatu Farao akwimya umutwi obe no kukubwesesha pa ncito. Wakubika inkombo yakwa Farao mu minwe yakwe, fyenka ifi wali ulo wali uwaku mupekanishisha. ¹⁴ Lelo ukanjibukisheko ulo fyaku kuwamina, nakambi napapata ukandangeko inkumbu. Ukanshimbule kuli Farao no kumfumya muno mu cifungo. ¹⁵ Pantu bamfyengele likoso ukufuma ku calo ca ba Hebere. Nakuno nako tapapo ifi ncitile pa kumbika muno umwakuculila." ¹⁶ Ulo umukulu wa balokupekanya umufuba abwene ati ubulondoloshi bwawama, kalabila kuli Yosefe ati, "Nande nasakulota iciloto, nakambi, bona, imiseke itatu iya mifuba yasa mukuli pa mutwi wandi. ¹⁷ Mu museke wasa mukuli peulu mwasamukuli imifuba iipusene pusene iya kwa Farao, lelo ifyuni fyasakulya mu museke pamutwi wandi." ¹⁸ Yosefe ka asuka no kulabila ati, "mbu e bulondoloshi. Imiseke itatu ni nshiku shitatu. ¹⁹ Munshiku shitatu Farao akwimya umutwi obe ukufuma kuli webo naye akukutanika pa citi. Ifyuni fyakulya umubili obe." ²⁰ Kaciba pa bushiku bwa shitatu e kasuba kakwibukisha ukufyalwa kwaku Farao. Kapanga umutebeto wa basha bakwe bonse. Kainuna umutwi wa mukulu waba kapekanya ba lukombo lwa myangashi no mutwi wa mukulu waba kapekanya ba mifuba, pa basha bakwe. ²¹ Kabwesesha umukulu waba kapekanya ba nkombo sha mwangashi pa ncito yakwe, naye kabika no lukombo mu minwe yakwa Farao nakabili. ²² Lelo kakulika umukulu waba kapekanya ba mifuba, Fyenka ifi Yosefe amu londolwelele. ²³ Naye ngu umukulu waba kapekanya ba nkombo sha mwangashi taibukishepo Yosefe, lelo alimulabukile.