¹ Yosefe kabamuleta ku Egypti. Potiphar, umubomfi waku Farao umukulu waba malonda umwina Egypti, kamushita kubena Ishimaeli abamuletele nkulya. ² Yawe kali na Yosefe nakambi alibele umwalalume uutungulukile. Kaile mu nanda yakwa shikulu wakwe umwina Egypti. ³ Na Shikulu wakwe kabona ukwebati, Yawe kali naye na Yawe katungulula fyonse ifi acitile. ⁴ Yosefe kasanga ububile mumenso yakwe Kabombela Potiphar. Potiphar kabika Yosefe ukuba kapitao mu nanda yakwe, na fyonse ifi abombele, kafisungwa bwino mumaboko yakwe. ⁵ Cali mfi ukufuma panshita njyo amubikile umukulu wa pananda yakwe napalimfyo fyonse efyo akwete, efi Yawe apalile inanda mwina Egypti pamulandu waku Yosefe. Ipalo lya kwa Yawe kalili pali fyonse ifyo Potiphar akwete munanda elo na mwibala. ⁶ Potiphar kabika fyonse efyo akwete mu maboko yaku Yosefe. Tasakamenepo pali fyonse ifi akwete ukufumyakofye ifyakulya alikulya. Nomba Yosefe kali umuweme nakambi nokuboneka bwino. ⁷ Kaciba mfi ukwebati, ngu mukashi waku shikulu wakwe katontomeka amenso pali Yosefe nokulabila ukwebati, "ulale nandebo". ⁸ Nombe kakana nokulabila ukwebati kumukashi waku shikulu kwebati, "bona, ba shikulu tababikapo amano pafyo bacita muli njino nand, nakambi alibikafyonse efyo akwata muminwe yandi. ⁹ Tamupo uucililepo ubukulu muli njino nanda tankanyepo takanyepo nangu cimo pali fyonse ukufumyako mwe, pantu uli mukashi wakwe nga ningacita shani mbu bubi ubukulu nokubembuka kuli Lesa?". ¹⁰ Umo shacela alikwenda umo alabilila kuli Yosefe, nomba kakana ukulabila naye nangula ukuba naye. ¹¹ Kaciba mfi bumbi bushiku kaya mu nanda mukubombe ncito yakwe. Tapalipo nangu umo pabalalume bamunanda uwalimo. ¹² Kamwikata mufyakufwala nokulabila ukwebati, "ulale nanebo". Kasha necakufwala cakwe muminwe yakwe, kabutuka, kaya napanse. ¹³ Kaciba mfi, ulo abwene ukwebati asha ifyakufwala muminwe yakwe nokubutuka nakambi abutukila napanse, ¹⁴ kaita bantu ba munanda yakwe nokubalondolwela, "baneni, Potiphar kaleta umu Ebele mukutusalausha. Kaishila muli ne mukulala nande, nomba kampunda. ¹⁵ Caishile kuba mfi, ulo aumfwile ukwebati napunda, elo asa kusha na malaya yakwe, kabutuka, kuya napanse". ¹⁶ Kabika amalaya yakwe mupepi naye mpaka na shikulu wakwe ka bwela. ¹⁷ Kamweba mbu bulondoloshi, "ngu musha umu Ebele watuletela kaisa mukunsalausha. ¹⁸ Cali ukwebati, ulo napundile, kasha na malaya yakwe nande no kubutukila panse". ¹⁹ Kaciba ukwebati, ulo shikulu wakwe aumfwile ubulondoloshi ubuapele umukashi wakwe, "mfi, efi umubomfi obe ancita", naye kakalipa sana. ²⁰ Yosefe shikulu wakwe kamupita nokumubika mucifungo, kuncende nkulya balikusungila abafungwa ba mfumu kali mulya mucifungo. ²¹ Nomba Yawe kali na Yosefe alikumulanga icipangano cacishinka kuli ye. Kamupa ububile kumenso yakwa kalinda waba fungwa. ²² Kalinda waba fungwa kapa abafungwa bonse abali mucifungo ku maboko yaku Yosefe, nafyonse efyo balikucita nkulya, Yosefe ewakwetepo amaka pali mfyo. ²³ Kasunga waba fungwa tasakamenepo napali fyonse fyali muminwe yakwe, pantu kali na Lesa. Fyonse efi alikucita Lesa kafipala.