¹ Kacisa kuba njilya nshita ulo Yuda ashile abakwabo no kwikala na umo mfi uwa ku Adula, uwe shina lya Hira. ² Kakumanya kwenka nkulya umwana mwanakashi wa mwina Kenaani uwe shina lya Shua. Ye kamubula no kulala nakwe ³ Kaimita no kufyala umwana mwalalume. Kabamupa ishina lya Eri. ⁴ Kaimita nakabili no kufyala umwana mwalalume. Amwinikile ati Onani. ⁵ Ye nakabili kafyala umwana mwalalume no kumwinika ishina ati Shela. Pali ni pa Kesib epo amufyalile. ⁶ Yuda kabwena Eri umukashi, umwana wakwe umukulu. Ishina lyakwe ali ni Tama. ⁷ Eri, umwana wakwa Yuda umukulu, ali umubi imibo mu menso aku Yahweh. Yahweh kamwipaya. ⁸ Yuda kalabila kuli Onani ati, "Koya ku mukashi wa mukwanu. Cita incito yakwa mulamo kuli ye, no kufyalila umukwanu umwana." ⁹ Onani kaishibile ukweba ati umwana takabepo wakwe. Lonse ulo alokuya kuli muka mukwabo, alokusundila panshi pakuti ekafyalilapo umukwabo umwana. ¹⁰ Ifi acitile fyalibipile mu menso aku Yahweh. Yahweh kamwipaya naye. ¹¹ Elo Yuda aebele Tama, umupongoshi wakwe, "Ikala fyenke fyo mukamfwilwa mu nanda yakwa wiso mpaka Shela, umwana wandi, akakule." Pantu katina ati, "Naye angafwa, kubati bakwabo." Tama kafumako no kwikala mu nanda yakwa wishi. ¹² Panuma ya nshita iitali, umwana wa kwa Shua, muka Yuda, kafwa. Yuda alokusansamushiwa no kuya kuli babeya impanga pa Timna, ye no munakwe Hira uwa ku Adula. ¹³ Tama kabamweba ati, "Bona, umupongoshi obe akoya ku Timna mu kubeya impanga shakwe." ¹⁴ Kafulako ifyakufwala fyakwe ifya bu muka mfwilwa no kuifimba icitambala no kuifimbilisha. Kaikala mu mwinshi wa Enaimu, iyali mu nshila yaku Timna. Pantu kabwene ati Shela alikulile nomba tabamupelepo kuli ye ukuba umukashi. ¹⁵ Ulo Yuda amubwene katontonkanya ukweba ati ali mwanakashi wabulalelale pantu alifimbile pa menso. ¹⁶ Kaya kuli ye pa mbali ya nshila no kulabila ati, "Isa, leka ndale nawe"- ye taishibilepo ati mupongoshi wakwe - naye kalabila ati, "Nindo mukompela pakuti mulale nande?" ¹⁷ Kalabila ati, "Nkokutumina imbushi ukufuma pe tanga." Umwanakashi kalabila ati, "Bushe mukompela icikatilo mpaka ulo mwakutuma?" ¹⁸ Ye kalabila ati, "Cikatilo ndo nkokupela?" Umwanakashi ka asuka ati, ".... ne nkoli iili mu minwe yenu." Kamupela umwanakashi no kulala nakwe, naye kaimita kuli ye. ¹⁹ Umwanakashi kaima no kuya. kafulako icitambala cakwe no kufwala ifya bu mukamfwilwa. ²⁰ Yuda katuma umunakwe wa ku Adula ukutwala umwana wa mbushi ukweba ati angapoka icikatilo cakwe ku maboko ya mwanakashi, lelo tamusangileko. ²¹ Elo umwina Adula aipwishe abalalume baku ncende ati, "Mba ali pi umwanakashi wa bulalelale uwasamukuli pa Enaimu pa mbali ya nshila?" Kabalabila ati, ''Tapasamukulipo umwanakashi wa bulalelale mpano." ²² Kabwelela kuli Yuda no kulabila ati, "Nshimusangilepo. elo, nabalalume ba ku ncende bebele ati, 'Tapasamukulipo umwanakashi wa bulalelale mpano.'" ²³ Yuda kalabila ati, "Ka sunge fintu, ukweba ati etubikapo mu mwansha nsoni. Ukuba, ndimutumine nji mbushi, lelo taumusangilepo." ²⁴ Ati papite imyenshi itatu kacumfwika kuli Yuda ati, "Tama umupongoshi obe alicitile ubulalelale, no kuba, alimitile mu bulalelale." Yuda kalabila ati, "Muleteni nkuno nakambi ye tumoce." ²⁵ Ulo bamufumishe panse, katumina shifyala wakwe ilyashi, "Ku mwalalume umwine wa mfi eko njimitile." Kaeba ati, "Cencenteni mfi kani fya kwani, ....,,, ne nkoli." ²⁶ Yuda kafibukisha no kulabila ati, "Wa kaele ukucila nandebo, pantu nshamupelepo ukuba umukashi kuli Shela, umwana wandi." Talelepo nakwe nakabili ²⁷ Ulo cafikile pa nshita yakwe iya kupapa, boneni, kamuli ba mpundu mwi fumo lyakwe. ²⁸ Kaciba ukweba ati ulo alo kupapa umbi kafumya ukuboko, no wa kumwafwa pakupapa kabula akatambo akakashikile no kumukaka pa kuboko no kulabila ati, "Ngu eutampilepo ukufuma" ²⁹ Lelo nomba kabweleshamo ukuboko, elo, boneni, umukwabo kabalilapo ukufuma. Uwalokumwafwa pa kupapa kaeba ati, "Ifi watobeka ukufuma panse!" Kabamupa ishina Perez. ³⁰ Elo umukwabo naye kafuma, uwali na katambo akakashikile pa kuboko, naye kabamupa ishina ati Zera.