¹ Yakobo aikele mu calo umo wishi alokwikala, mu calo ca Kenaani. ² Mfi e fyali mu bwikashi bwaku Yaokobo. Yosefe, uwali ne myaka ikumi na cinelubali, alokwembela impaanga nabakwabo. Ali naba balalume bakwa Bilha na bana balalume bakwa Silpa, abakashi bakwa wishi. Yosefe kaleta ilyashi litawemepo pali bo kuli wishibo. ³ Nomba Israeli alitemenwe Yosefe ukucila abana bakwe bonse pantu ali mwana wamu bukote. Kamubilila icakufwala iciweme. ⁴ Abakwabo kababona ukweba ati wishibo alimutemenwe ukucila bonse abakwabo. Kabamupata nakambi tabalo kulabilapo bwino kuli ye. ⁵ Yosefe kalota iciloto, no kwebako abakwabo pali co. Kaba mupatilako ukucilamo. ⁶ Kabeba ati, "Napapata umfweniko kuli nci ciloto ndotele. ⁷ Boneni, twasa mukukaka imipo ya filimwa mwibala nakambi boneni, umupo wandi wasakwima no kwimakana, nakambi boneni, imipo yenu yasakushinguluka no kutota ku mupo wandi." ⁸ Abakwabo kabalabila kuli ye ati, "Bushe wakututeka fwe? Bushe cacine wakuba no bufumu pali fwe?" Kabamupatilako pa filoto na mashiwi yakwe. ⁹ Kalota na cimbi iciloto no kwebako abakwabo. kalabila ati, "Boneni, ndilotele nacimbi iciloto: Akasuba no mwenshi ne ntanda ikumi na lumo fikoinama panshi kuli nebo." ¹⁰ Kaebako wishi fyenka ifi aebele abakwabo, na wishi kamukalipila. Kamweba ati, "Ciloto ca ndo nci walota? Bushe banoko nande na bakwanu twakwisa mu kwinamina panshi pamushili kuli we? ¹¹ Abakwabo kabali na kaso pali ye, lelo wishi kasunga ngu mulandu. ¹² Abakwabo kabaya mu kwembela impaanga ku Shekemu. ¹³ Israeli kaeba Yosefe ati, "Bushe abakwanu tabali mukwembela impaanga ku Shekemu? Isa, nande nkokutuma kuli bo." Yosefe kalabila ati, "Ndi ipekenye." ¹⁴ Kamweba ati, "Kabiye nomba, kabone kani fyonse fili bwino ku bakwanu naku fitekwa, nawe ukoisa unjebe." Efi Yakobo amutumine mwi lungu lya Hebroni, na Yosefe kaya ku Shekemu. ¹⁵ Umuntu umbi kasanga Yosefe. Boneni, Yosefe alokufwayafwaya mu mpanga. Ngu muntu kamwipusha ati, "Nindo ukofwaya?" ¹⁶ Yosefe ka asuka ati, nkofwaya abakwasu. Njebako, napapata, uko bako cemena impaanga." ¹⁷ Umuntu kamweba ati, "Bali fumineko kuno ncende, pantu kambomfwa bakoeba ati, 'Katuye ku Dotani.'" Yosefe kakonka abakwabo no kubasanga ku Dotani. ¹⁸ Kaba mubwena akatalamukila, nakambi ninshi tangafika, kabapingana ukumwipaya. ¹⁹ Abakwabo kabailabisha ati, "Boneni, ngulya kalota akoisa. ²⁰ Iseni nomba, mfi caba, katumwipaye no kumuposa muli cimo pa filindi. Twakulabila ati, 'Icinama cibi cilimulile.' Twakubona uku fyakulola ifiloto fyakwe." ²¹ Rubeni kaumfwa no ku mupokololako mu minwe yabo. Kalabila ati, "Tumwipayapo." ²² Rubeni kalabila kuli bo ati, "Musumyapo mulopa. Muposeni muli nci cilindi icili mu matololo, lelo mu mwikatapo iminwe pali ye"- ukweba ati enga mupususha muminwe yabo uku mubwesha kuli wishi. ²³ Ka ciba ati ulo Yosefe afikile pa bakwabo, kabamufuula icakufwala cakwe iciweme. ²⁴ Kabamubula no kumuposa mu cilindi. Mu cilindi tamwalipo nangula kamo na menshi tamwalipo. ²⁵ Kabekala panshi pa kulya umufuba. Kabenuna ifinso no kulolesha, nakambi, boneni, abena Ishimaeli bakoisa ukufuma ku Gileadi, ne ngamali shabo balisendele na utubula utununkiile na Balsamu na muri. Balo kutwala ku Egypt. ²⁶ Yuda kalabila ku bakwabo ati, "Nindo tukononkelapo pa kwipaya umukwasu no kufimba pa mulopa wakwe? ²⁷ Iseni, katumushitishe ku bena Ishimaeli nakambi tubikapo minwe yesu pali ye. Pantu ye mukwasu, wamu mulopa wesu." Abakwabo kabamumfwila. ²⁸ Kakupita abena Midiani abasulu. Abakwabo kabatinta Yosefe no kumufumya mu cilindi. Kabashitisha Yosefe ku bena Ishimaeli pa sha silufele amakumi yabili. Abena Ishimaeli kabapinta Yosefe ku Egypt. ²⁹ Rubeni kabwelela ku cilindi, nakambi, boneni, Yosefe talimo mu cilindi. Kalepula ifyakufwala fyakwe. ³⁰ Kabwelela ku bakwabo no kulabila ati, "Umwaice taamo mulya! Nda nebo, nkoya pi?" ³¹ Kabepaya imbushi no kubula icakufwala cakwa Yosefe nokucibikako umulopa. ³² Elo baletele kuli wishibo no kulabila ati, "Twasanga mfi. boneni kani cakufwala ca mwana wenu nangula teco." ³³ Yakobo kacishiba no kulabila ati, "Ca kufwala ca mwana wandi. Icinama cibi cilimulile. Yosefe ca cine balimuputawile mu tupimfya." ³⁴ Yakobo kalepula ifyakufwala fyakwe no kufwala ifisamu mu musana wakwe. Kalo kuloosha umwana wakwe pa nshiku ishingi. ³⁵ Bonse abana bakwe abalalume na banakashi kabema muku musangalasha, lelo kakana ukusangalala. Kalabila ati, "Nakuya panshi ku manda nkoloosha umwana wandi." Wishi alimulooseshe. ³⁶ Abena Midiani kabamushitisha ku Egypt kuli Potifari, cilolo wakwa Farao, umukulu wa ba kacingilila.