¹ Umuntu kaishiba Eva umukashi wakwe naye kaimita no kufyala Kaini. Kalabila ati, "Yahweh angafwa nafyala umwalalume." ² Elo afyele umukwabo Abele. Nomba Abele kaisa kuba ni kacema, lelo Kaini alokulima umushili. ³ Kacisa kuba ati pakupita kwa nshita Kaini kaletako ifisabo fimbi ifya mu mushili ukupa ilambo kuli Yahweh. ⁴ Lelo ye Abele, kaletako isha kubalapo ukufyalwa mu nama shakwe na mafuta ambi. Yahweh kapokelela Abele ne lambo lyakwe, ⁵ lelo Kaini ne lambo lyakwe ye tafipokelelepo. Eco Kaini kakalipa, nakambi ka kalipisha. ⁶ Yahweh kalabila kuli Kaini ati, "Nindo wakalipila no kuponya icinso? ⁷ Kani wacite iciweme, bushe nga taupokelelwepo? Lelo kani taucitilepo iciweme, ulubembu luli pa mulyango obe nalo luko kutungulula, lelo ulingile ukulutungulula." ⁸ Elo Kaini alabile no mukwabo Abele ati, katuye mu mpanga. Kacisa kuba ati ulu bali mwenka mu mpanga, Kaini kaimina Abele umukwabo no kumwipaya. ⁹ Elo Yahweh aebele Kaini ati, "Ali pi Abele umukwanu?" Kalabila ati, "Nshishibilepo. Bushe nine imusunga?" ¹⁰ Yahweh kalabila ati, "Nindo wacita? Umulopa wa mukwanu ukoita kuli nebo ukufuma panshi. ¹¹ Nomba watipwa we ukufuma ku mushili, uwaisula akanwa ukupokelela umulopa wa mukwanu ukufuma mu minwe yobe. ¹² Awalima umushili, ukutampa nduno tawalokukupapo ifya maka yauko. Walokuli uupungaile nakambi uukolulumba likoso pa calo." ¹³ Kaini kalabila kuli Yahweh ati, "Kwakulisha ukukandwa kwandi tekuti nkumanishepo. ¹⁴ Nashininkisha, mwantamfya nkano kasuba pa mushili ngu, nande nalokufisama kuli mwe. Nalokupungaila likoso no kululumba pa calo, no wakunsanga onse akunjipaya." ¹⁵ Yahweh kamweba ati, "Kani umuntu aipaya Kaini, icilandushi cakuba pali ye imiku cinelubali." Elo Yahweh abikile ululembo pali Kaini, ukweba ati onse uwamusanga, oyo muntu ekamusansapo. ¹⁶ Efi Kaini afumine pa cinso caku Yahweh no kuya kwikala mu mpanga ya Nodi, ku mutulesuba wa Edeni. Kaini kaishiba umukashi wakwe naye kaimita. ¹⁷ Kafyala Enoki. Kapanga umusumba no kuwinika mwishina lya mwana wakwe Enoki. ¹⁸ Kuli Enoki kakufyalwa Iradi. Iradi kafyala Meuyaele. Meuyaele kafyala Metushaele. Metushaele kafyala Lameki. ¹⁹ Lameki kaupa abakashi babili. Ishina lya umbi ali ni Adah, ne shina lya munakwe ali ni Zilla. ²⁰ Kuli Adah kakufyalwa Yabali. E wishi wa babo abalokwikala mu fikutulo abalokuteka ifitekwa. ²¹ Umukwabo ali Yubali. Ye ewali wishi wa babo abalokulisha amalimba ne mitolilo. ²² Nomba kuli Zilla, afyele Tubali-kaini, uwalokupanga ifipe fya mukuba ne fyela. Nkashi shakwa Tubali-kaini ali ni Naamah. ²³ Lameki kalabila ku bakashi bakwe ati, "Adah na Zilla, umfweni kwi shiwi lyandi; mwebakashi ba kwa Lameki, umfweni ifi nkolabila. Apo nebo ndipeye umuntu uwancenene, uwa caice pa mulandu wa kuncena. ²⁴ Kani Kaini alandulwa imiku cinelubali, Lameki akulandulwa imiku cinelubali ukufulilako cine lubali." ²⁵ Adam kaishiba umukashi wakwe nakabili, naye kafyala umwana mwalalume. Kamwinika ishina ati Seti no kweba ati, Lesa ampela naumbi umwana mu cipunda cakwa Abele, pakuti Kaini alimwipeye." ²⁶ Kakufyalwa umwana mwalalume kuli Seti naye kamwinika ati Enoshi. Pali njilya nshita abantu kabatampa ukwita pe shina lyaku Yahweh.